¹ وقتی عیسی مین دوره ی هیرودیس پادشاه، مین بیت لحم یهودیه وِ دنیا اِوِی، هَمُو موفع چَنتا ستاره شناس اِز مشرق زمین اِوِیِن اورشلیم،وپُرسیِن ² : کُجَنه هُو پادشاه یهود ک وِ دنیا اِوِی؟ چونکه ستاره ی هُون مین مشرق دیدیم و اِوِیم تا بپرستیمش. ³ وقتی ای خِوَرُ وِ گوش هیرودیس پادشاه رِِسی، خُوش و همه ی اورشلیم وا یَک ترسِستِن. ⁴ پس هُو همه ی گَپیَل کاهن و عُلمای قومِن جار زِی و اِزِشون پُرسی: مسیح کُـجه وا وِ دُنیا بیا؟ ⁵ جواب دان: مین بیت لحم یهودیه،چونکه پیامبردر ای مورد ایطورونی نوشته بی: ⁶ اِی بیت لحم که مین سرزمین یهودایی مین فرمانروایی یهود اِز هیچ کدوم کمتر نیستی ، چونکه یه فرمانروایی اِز تو اییاهه که قوم مُون اسرائیلِن چوپونی ایکونه. ⁷ پس هیرودیس وِِستاره شناسا گُو که بی سر و صدا بِرِِن تِیش و موقع دقیق اِوِِیَنِ ستارَه نِ اِز اونو پُرسی. ⁸ بعد اونُون به بیت لحم رِِوونه کِرد، وِِاونو گُو: بِرین در مورد اُو بچهیُو پُرس و جو بکنین هَرسا جُستینِش وِِ مُو هَم بُگُوین تا مُو هَم بیام ،وِِش تَعظیم بُکُنوم. ⁹ اونو وقتی حرفا پادشاه فهمیِن رَهدِن، و هَمُوسو ستاره ای که مین مشرق دیِن بی جلوشون هِی ایرَهد تا بالاخره بالا سرهَمو جایی که بچه بی واستا. ¹⁰ اونو وا دیَنِ ستاره خیلی خوشحال وُویِن. ¹¹ وقتی رَهن مین هُونه، و بچهنِه وا مریم داش دیِن سَرنان وِِ گِل، و بچهنِ پرستش کِردِن بعد صندوقاشون واز کِردِن و سوغاتی هایی اِز طِلا و کُندُر و مُر وِِش پیش کِش کِردِن. ¹² و چون مین خُو هشدار وِِشون داده وُویی که نَرِِن تِی هیرودیس، وِِ یه رَه دیه رَهدِن مین شهر خوشون. ¹³ بعد اِزرَهدَنِ ستاره شناسا، فرشته ی خدا مین خُو وِِ یوسف ظاهر اُویی و گُو: ویری، بچه و داشِن وَردار و فِرار کن بِرومصرو هَمُوچو بِمَن تا وِِت خِوَر بُوم، چونکه هیرودیس دیندا بچه ایگَرده تا بُکُشش. ¹⁴ هُوَم شُو وِِ شُو ویریستا بچه وُ داشِن گِرِه و رَه مصر ¹⁵ تا مردن هیرودیس هَمُوچو مَند، ای اتفاقا وَست تا هرچی خدا وِِ زِِوُنِ پیامبر گُو بی اتفاق بیفته که کُر خُومِن اِز مصر جار زِِیوم. ¹⁶ تا هیرودیس فَهمی که ستاره شناسا گولِش زِِیِن،خیلی عصبانی وُویی و گُو، تمام کُرگَل 2 سال وِِ وازیر مین بیت لحم و دُورُواش بیِن، مین اووَقتی که اِز ستاره شناسا پُرسی بی، بُکُشِن. ¹⁷ هَمیُووُویی که هرچی ارمیای نبی گُو بی، روشنا وُویی که : ¹⁸ صدایی اِز رامه وِِ گوش ایرِِِسه، صدای شیوَن و لیکه و ماتمی گَپ.راحیل سی بَچیَلِش ایگیریوِِه و جا نیگِرِِش، چونکه دی نیستِن. ¹⁹ بعد اِز مُردَن هیرودیس فرشته خدا اِوِِی مین خُو یوسف وِِش گُو: ²⁰ ویری، بَچه و داشِن وَردار و بِرُو مین زِمین اسرائیل چونکه اونوکه ایخواستِن بَچَنِه بُکُشِن مُردِن. ²¹ پَ هُوَم ویریستا، بَچه و داشِن وَرگی و رَه مین سرزمین اسرائیل. ²² اما وقتی فَهمی که آرکِلائُوس وِِجا بُوش هیرودیس مین یهودیه پادشاه وُویه، تَرسِست بِره اوچو چونکه مین خُو وِِش هُشداردان بی رَه وَست و رَه دورُبا جلیل. ²³ و رَه مین شَهر ناصره حونه گِرِِه، یُو اِتفاق وَست تا حرف پیامبرا حَقیقت پیدا کُنه که گُون ناصری ایخونِنِش.