¹ Amashiwi yapa musumba wa Ninife. Icitabo icacimonwa ica kwa Nahumu, umwina Elikoshi. ² Yawe ni Lesa uwakwata ubufuba kabili alalandula; Yawe alalandula kabili aisulamo icipyu; Yawe alalandula pa balwani bakwe, kabili alatwalilila ubukali bwakwe pa balwani bakwe. ³ Yawe tafulwa bwangu kabili alikwatisha amaka; takalekefye abantu ababi. Yawe apita muli kankungwe kabili namu cimwela, kabili amakumbi elukungu lwa makasa yakwe. ⁴ Alakalipila bemba nokumulenga ukukana; alakamya ne mimana yonse. Bashani takosa, kabili na Kameli wine; amaluba yakwa Lebanoni nayabonsa. ⁵ Impili shilatenta pa cinso cakwe, kabili ne fyulu filasunguluka; Isonde lilatenkana pa cinso cakwe, icine fye, isonde nabantu bonse abekalapo balasunkana. ⁶ Bushe ninani uwingashanshako nga afulwa? Bushe ninani uwinga pusukako ku bukali ne cipyu cakwe? Icipyu cakwe cisuma ngo lubingu lwa mulilo, kabili ne fimabwe filalepauka pa cinso cakwe. ⁷ Yawe musuma, elinga mu bushiku bwa bwafya; kabili acingilial bonse ababa muli ena. ⁸ Lelo akaloya abalwani bakwe umupwilako ku lyeshi ilyamaka; akabapuminkisha fye mu mfifi. ⁹ Bushe imwe mwe bantu bubi nshi ubo mulepanga ukucita Yawe? Imwe akamulofya umupwilapo; ubwafya tabwakabwele umuku wacibili iyo. ¹⁰ Nge myunga iyakobana kabili ngo mwangashi waba cakolwa efyo mukatutaika nge mpimbili ishauma. ¹¹ Ukufuma muli iwe, Ninife, ewafuma umuntu umo uwamapange ayakucita ifibi kuli Yawe, uupanda amano yafya bubifi. ¹² Ifi efyo Yawe asosa ati, "Nangu fye bengakwata ubulamba shani kabili nangu bafula shani, bakaloba fye bonse; abantu babo bakafwa. Lelo iwe, Yuda: Nangu line nakusalapula, nshatwalilile ukukusalapula. ¹³ Nomba nkakontaula ilyo ikoli lyabantu ukufuma kuli imwe; nkaputaula iminyololo yenu." ¹⁴ Yawe napela icipope pali iwe, Ninife: "Tamwakabe abana babe abasenda ishina. Nkonaula utulubi utwa baswa kabili notwa kwenga ukufuma mu mayanda ya tulesa tobe, Nkakuteyanishisha inindi, pantu naliba uwasebana. ¹⁵ Lolesha, pampili epo yali amakasha ya uleleta imbila nsuma, uulebila imbila yamutende! Akusefya inshiku nkulu, Yuda, kabili ufikilishe ne filayo walaya, pantu ababi tabakabale abawililila icalo cenu nakabili; Pantu nalobelela fye umupwilapo.