अध्याय 1
1
येशु ख्रिस्ता दास आन याकोबा पावुहू यहुदा इयाहिने पत्रो; देवबाहकाल खुब पोटेहे एहंन्डो आन ख्रिस्त येशु केअता तियाय राखी थोवलो, एहंन्डा बाद्दा हादलाहान
2
दया, शांती मोया इ तुमाहान खुब मिलती रे
3
ए पावुहू, जाहा माय तुमाहान ती उध्दाराबाबतीम लिखाकेअता खुब मेहनतीहीकी कोशीश केअतलो, जियाय आपु बाअद्दे हाय, ती विश्वासा केअता कोशीश केअरा का तो पवित्र माअहान एकुज दावु होपी देवाम आलो आथो,
4
काहाका जे इ शिक्षा केअता पेहलानेज नेमाले आथे एहंन्डा कोताहा तेबी लोक चोइन माअज आलाहा; ते भक्तीनाय केअनारा लोक हाय, तियाहाल ते आपु देवा कृपा पालटीन तियुल कामातुर पणा स्वरूप दिइन आपु एकुज देव प्रभु येशु ख्रिस्त इयाल वोअखुता नाहा,
5
जरी तुमाहान इ पेहलानेज माहीती हाय तेबी माय तुमहान इतवी दिहु एहकी मा इच्छा हाय का, परमेश्वराय त्या माहान मिसर देशामने बारे काड्ये आन जियाहाय तियाहाप विश्वास थ्योव्यो नाहा, तियान तियाय फाचे नाश की टाक्ये,
6
आन जी देवदुताहाय आपु अधिकारा जागो नेय सामालता आपु स्वत: योग्य रेवनु जागो सोड्या, तियाय तियाहान सादानकादा बधनामने खुब आंधाराम ती न्याया द्याहा केअता सामाली थोवली हाय,
7
सदोम गमोर आन तिया जागे जागे ने गावे इयाही तियाहोचुज जारकर्मे केअयी आन पाराया डिअला फाचला लाग्ये, आन ते उदाहरण म्हणुन सादानकादा आगी शिक्षा भोगतो थोव्योहो,
8
तेहकीज होपने वेअणारेबी डिलाहाकी बाटळातेहे ते अधिकारी तुच्छ मानताहा आन स्वर्गदुताहा निंदा केअताहा,
9
पेन मोडो देवदुत मिखायल याय सैतानाआरी जाहा मोशे मोअला शरीर केअता वादविवाद केअयो, ताहा तियाल हारो माठो गोगणु हिम्मत नाहा केअही, पेन एहकी आख्यो, “प्रभु तुल धमकावे,
10
पेन ए माअहे ज्या गोठया जाअते नाहा, तेहंन्डी गोठी केअता खाराब गोगतेहे , पेन तियाहान बिगर ओकली जनावोराहा होच, नैसर्गिकरीत्या ज्या गोठ्या होमजात्याहा तियाद्वारे ते स्वता:ज नाश की लेताहा
11
तियाहा केअहंन्डी खाराब दशा वेअरी, काहाका ते काईना वाटीपे चालतेहे, आने स्वता लोभा केअता बलामा होच खाराब विचार वि गियाहा,
12
ए लोक तुमा प्रमापांगातीम कलंक एहंन्डे हाय ते तुमा आरी बिनलाजी खातेहे आन सोताहा देड पोअतेहे ते वारा आरी निंगी जाणारे बिनापाया वादलो हाय ती पेहल्या पिकाम फलवो नाय देणारो एहन्डो हाय पेन दाव मोअय गेहेली आन उपटी टाकली एहन्डो चाडे हाय,
13
ते समुद्रा मोड्या लाटांहोस स्वता लाज लावतेहे जियाहा खातोर सादान कादा केअंता कालोकींट आधारो राखी थोव्योहो, एहंन्डा भोटक्या तारा ते हाय,
14
आन आदामाहीन सातवो, हनोख यायबी इयाहाविषयी संदेश दिइन आख्यो का, वेरा प्रभु आपे लाखो पवित्र जाअवा आरी आलोहो,
15
तो तियाहा न्यायनिवाडो केरा आन तियामेने बाद्दा भक्तीनाय केअनारा माअहान, तीयाहाय भक्तीहीना होच भक्तीहीन कामा खातोर आन भक्तीहीन पाप्यान तीया बोद्दोल तियाय आखला बाद्या कठोर गोठीकेअता दोष ठरवुलाम आवी रियेहे
16
ते कुरकुर केअणारे, असंतुष्ट वाटील दोष लागवुनारे आन आपु वासनाहाकी चालणारे, ते मुयाहाकी गर्वा गोठृया केहतेहे आन आपु लोभाकेअता ते माअहा वाँह वॉ केहतेहे
17
पेन मा पावु बोयुहू, तुमा ता आपु प्रभु येशु ख्रिस्ता इया प्रेषिताहाय पेहलांज आखल्या वचनाहान तुमा अतवा,
18
तियाहाय तुमाहान आखलो आथो का, “ शेवट्या कालाम ठट्टा केअणारे माअहे दठी आन आपु भक्तीहीन पावनाहोच चाअली,
19
ऐ ते हाय जे फुट टाकताहा ऐ शरिरीक माअहे हाय जियाहाम आत्मो नाहा,
20
पेन पावुहू बोयुहू तुमा आपु परमपवित्र विश्वासाप आपु रचना केअते रिइन पवित्र आत्माहाकी प्रार्थना केअरा,
21
स्वोताहाल परमेश्वरा मोयाम बोनवी थोवा आन सादान काअदा जीवना केअता आपु प्रभु मासि दया वाट जोअवते ऱ्या.
22
पेन जे शक केअतेहे तियाहाप दया केअरा
23
आण थोडाहान आगीमने ताआय काढीन वाचवा थोडाहाप बी बीन दया केअरा पेन ती पोतडाल बी दुरी केअरा जो शरिराहांकी खाराब वी गीयोहो नाश की लेताहा
24
आन आमी जो तुमाहान ठोकाहाणुस वाचावी आन आपु महीमा भरपुरी हुंबर मगन आन बिगरगुन्हा किइन उबो की सके हे
25
एहंन्डो जो एकुज देव आपु तारणारो, तियाल येशु ख्रिस्त आपु प्रभु इयाहीने गौरव, महीमा पराक्रम आण अधिकार बी युगा पेहलांनेज आमी आन सादानकांदा हाय, आमेन,