8 ¹ Tu̧ru̧hua̧ Dios Josuérö pä'inö: yecuecuä; cuju'quinämä jȩ'cuä̧. O'catoi'önä curä rohuähuäcuähuä ttö̧ja̧rö̧ ȩpö̧ tä'i Haira̧'a̧ huä̧mi̧pi̧. Topi, ttömä chiyäcujä̧ ucu cumö̧nä̧tä̧ Hai ru̧hua̧rö̧mä̧, ja̧u̧ u̧mö̧huäyätörö'inä, öäre ötahuiyä'inä, i̧rȩjä̧'i̧nä̧. ² Jȩcu̧'ä̧cua̧jä̧ Hai ötahuiyä'inä, ru̧hua̧rö̧'i̧nä̧, Jericó ötahuiyä ru̧hua̧rö̧ jȩcu̧'i̧nö̧ta'anö, ja̧'hua̧nö̧ ja̧'a̧nä̧ jitämä ttiäremä cuȩmä̧cua̧jä̧ pä̧cä̧yö̧rö̧'i̧nä̧ ucututä cuä̧ji̧mö̧tu̧cu̧ päi'önä. Jeruhuönätä̧ cu̧jä̧tu̧cua̧ ötahuiyä jäyänä. ³ Ja̧'hua̧nö̧ ja̧'a̧ttö̧ Josuémä ä̧rä̧mi̧'ö̧ o'ipinö u̧mä̧tö̧ o'catoi'önä curä rohuähuätörö Haira̧'a̧, ja̧'hua̧nö̧ ja̧'a̧ttö̧ Josuémä́ ȩmi̧nö̧ 30 milnö huotörö, u̧mä̧tö̧ juruhuätörö, ye'ecuocotörö hue'ö icuinö tti̧'cha̧ pä'ö yodo u̧mi̧cu̧. ⁴ Ja̧u̧mä̧ hueinä̧u̧ yo̧huȩi̧nä̧ tätucui ötahuiyä aboja'anä, ötahuiyättömä otomä cui̧chä̧tu̧cuo̧ ja̧'hua̧nö̧ ja̧'a̧nä̧ o'catoi'önä ucumä jo̧mȩnö̧ cu̧jä̧tu̧cua̧. ⁵ Ttö o'catoi'önä ttöcu 'chä̧tö̧mä̧, ötahuiyä tö'cö päti'äcuotöjä̧ ujuturu cua'ö tticua pä'ö rättoi'omenä jotäcuotöjä̧ juätöttömä otomenä pä'äji jotäjita'anö. ⁶ Rä'o'ö ujuturu jopö rutti'äcuotö ötahuiyä otomenä pätti'önä ja̧'hua̧nö̧ ja̧'a̧ttö̧ pättäcuotö. Jahuätömä ye'ecu tö'ipächätö ujuturu pä'äji töttichipota'anö, ja̧'hua̧nö̧ ja̧'a̧ttö̧ jopö tötipächäcuotöjä̧. ⁷ Ucutumä ja̧hua̧nö̧ päi'omenä cudäjuächätucumettömä rä'o'ö ötahuiyä 'chöcuädäcuotöjä̧. Cu̧ru̧hua̧tu̧cu̧ Diosmä iyäcuotöjä̧ cu̧mö̧tu̧cu̧nä̧ ja̧u̧ ötahuiyämä. ⁸ Ja̧'hua̧nö̧ 'chucuädäjätucumä ja̧u̧ ötahuiyä, ocurä cu̧rä̧dä̧cuo̧tö̧jä̧. Pi̧yȩmä̧ jȩ'cu̧'ä̧cuo̧tö̧mä̧ Dios hueäji huȩnȩ cucuotätucua'attö. Topätucui ttö ja̧'a̧ hue'ömä". ⁹ Josuémä jahuätörö hue'ö icuinö yo̧huȩinä tti̧'cha̧ pä'ö jahuätömä dajahuächinätö̧ Betelttömä Hai 'cä̧tȩ Haittömä kä̧hua̧ mo̧ä̧cha̧'a̧cu̧. Ja̧'hua̧nö̧ ja̧'a̧nä̧ Josuémä ä'inö ja̧u̧nu̧ yodomä jahuätötäcu. ¹⁰ Josuémä yoönä jä̧i̧ mo̧ro̧ päia'a ä̧rä̧mi̧'i̧nö̧ umöhuäyotö su̧ro̧da̧u̧ jo̧mȩnö̧ ttö̧ja̧ pä'ö toa pä'ö, ja̧'hua̧nö̧ ja̧'a̧ttö̧ Josué'inä Israel ttö̧ja̧ tä̧mö̧ sotö'inä, rohuähuö kä̧mä̧di̧nä̧tö̧ Hai ötahuiyä ttö̧ja̧rö̧ ¹¹ O'catoi'önä curä rohuähuäcuähuä ttö̧ja̧ ja̧u̧cu̧ kä̧jä̧tö̧mä̧ ä̧rä̧mi̧'ö̧ ötahuiyä tö'cö päi'önä 'chä̧hui̧'i̧nä̧tö̧. Jahuätömä ötahuiyä tö'cö pȩjä̧mi̧nä̧tö̧ Hai ötahguiyättömä kä̧hua̧ u̧huo̧jua̧'a̧cu̧. Ju̧huȩnȩmä̧ ya'ute pämäroppä ki̧na̧'a̧ jahuätö ttö̧jo̧mȩcu̧ Hai ötahuiyäcu 'cä̧tȩ jo̧mȩnä̧. ¹² Ja̧u̧mä̧ cinco milnö jo̧mȩnö̧ ȩmi̧nö̧ yo̧huȩi̧nä̧ dajahuächö ttö̧ja̧cua̧ pä'ö Betel'inä Hai ötahuiyättömä kä̧hua̧ mo̧ä̧cha̧'a̧cu̧ päte'ö ka̧cui̧nä̧tö̧. ¹³ O'catoi'änä umöhuäyotö curä tturohuähuäcuotömä pa̧'a̧nö̧ hue'ö ku̧ni̧nö̧, su̧ro̧da̧u̧ jue'ipotörömä ötahuiyättömä kä̧hua̧ u̧huo̧jua̧'a̧cu̧ hue'ö ku̧ni̧nö̧. Josué ja̧u̧nu̧ yodomä juȩnȩ pä̧mä̧roppänätä 'cuä'opinö. ¹⁴ Ja̧'hua̧ta̧'a̧nö̧ Hai ötahuiyä ru̧hua̧mä̧ topinö, ja̧u̧'i̧nä̧ umöhuäyotö su̧ro̧da̧u̧'i̧nä̧ yo̧ä̧sa̧ ja̧'a̧nä̧ ä̧rä̧mi̧'i̧nä̧tö̧ rohuähuö tti̧'cha̧ pä'ö Israel ttö̧ja̧rö̧ Jordan aje jäyoto pämäroppänä. Ja̧u̧mä̧ jerupinö ötahuiyä aboja'anö ya̧tȩ'i̧nä̧ tta̧ttä̧ra̧'a̧nä̧ ötahuiyä jȩpö̧ ticua pä'ö. ¹⁵ Josué'inä o'catoi'önä Israel ttö̧ja̧mä̧ juiyätö jä̧'i̧nö̧'ä̧nö̧ jȩpi̧nö̧tö̧ pä'äji ( ) jȩti̧nö̧ta'anö de'a jui̧yä̧jä̧ra̧'a̧cu̧, tö'ichinätö. ¹⁶ O'catoi'önä ötahuiyämä ka̧cuä̧tö̧rö̧ huopinätö̧ rutti'a pä'ö ötahuiyättömä oto päi'önä ru'i'inätö̧ Josué o'ca'anä. ¹⁷ Ya̧tȩ'i̧nä̧ ki̧'i̧po̧cö̧ pinö Hai ötahuiyättö'inä Betel ötahuiyättö'inä Israel ttö̧ja̧ tto'ca'anä ru'i'ocömä, ötahuiyämä toönätä̧ rä'opächinätö̧ äpate'inä bahuecuänötä ku̧ni̧pinätö̧ Israel ttö̧ja̧rö̧ ru'i'ömä. ¹⁸ Tu̧ru̧hua̧ Diosmä Josué pä'inö: "Päteti cudapä'chu cu̧mö̧nä̧ 'chucuärä'chu Hai ötahuiyära̧'a̧cu̧, Hai ötahuiyämä ucu cumö̧nä̧tä̧ chi̧yä̧cua̧jä̧". Josuémä pätetinö ödacuä'chu 'chu̧huä̧rä̧'chumä ötahuiyära̧'a̧cu̧. ¹⁹ Su̧ro̧da̧u̧ yo̧be'inä dajahuächö ka̧cuä̧tö̧mä̧ rä'o'ö topö 'chi̧nä̧yö̧ ttö'ätetä pä'ö ötahuiyära̧'a̧cu̧. Jahhuätömä jopinätö̧ ötahuiyära̧'a̧ do'ächi'ö 'chu'ädö jurunä kuhuö icuinätö̧ ötahuiyämä. ²⁰ Hai ötahuiyä ttö̧ja̧mä̧ tto'ca'acu kärächi'ö topinätö̧. totto mȩnä̧ ötahuiyämä ocurä isoppa mo̧ro̧jä̧ra̧'a̧cu̧ cäepa'a topinätö̧, ja̧'hua̧nö̧ ja̧'a̧ tottomenä kara'acu'inä töttichö juiyönä päi'inä̧u̧, Israel ttö̧ja̧ su̧ro̧da̧u̧ tötticha pä'ö jä̧'i̧nö̧'a̧nö̧mä̧ jȩpä̧tö̧ päjatömä tto'ca'acu kärächi'inätö̧ yitörötä rohuähuö tticua pä'ö. ²¹ Josuémä o'catoi'önä Israel ttö̧ja̧mä̧ topinä̧tö̧ yo̧beinä dajahuächö ka̧cuä̧tö̧ päjatö ötahuiyä 'chuttäda'a tottomȩnä̧ ocurä isoppa'inä tottomȩnä̧, jahuätömä ppa̧'ä̧chä̧chi̧nä̧tö̧ Hai ötahuiyä ttö̧ja̧rö̧ cuä'ähuö tticua pä'ö. ²² Korotö su̧ro̧da̧u̧ Israel ttö̧ja̧mä̧, jitö ötahuiyä jacuä do'ächi'ätömä. Rä'opächinätö̧ ttörohuähua pä'ö, ja̧'hua̧n ja̧'a̧ Hai ötahuiyä ttö̧ja̧mä̧ Israel su̧ro̧da̧u̧ jacuätä pätti'önä jȩpö̧ 'chuttädinä̧u̧ korotömä kara'anä. Israel ttö̧ja̧mä̧ rohuahuö cuä'ö icuinätö̧ Hai ötahuiyä ttö̧ja̧rö̧mä̧ ya̧tȩ'i̧nä̧ ki̧'i̧po̧cö̧ pinö tö'ichö'inä tö'ichocö pinö. ²³ Hai ru̧hua̧rö̧ 'chu'ädäjä'cotö a̧'cua̧ra̧'a̧nä̧tä̧ 'cächinätö̧ Josué ä'ca jo̧mȩ. ²⁴ Israel ttö̧ja̧ Hai ttö̧ja̧rö̧ cuä'ö tticuäji o'ca'a rȩjȩ de'a jui̧yä̧jä̧ttö̧ Israel ttö̧ja̧rö̧ rutti'omenä tö'cöttö, o'catoi'önärö̧ röji sa̧ jubö curodänä cuä'ö tticuäji o'ca'a o'toi'önä Israel ttö̧ja̧mä̧ ppa̧'ä̧chi̧nä̧tö̧ Haira̧'a̧. Jahuätömä Hai ötahuiyänä ka̧cui̧pä̧jä̧tö̧rö̧mä̧ o'catoi'önä̧rö̧ curodänä cuä'ö icuinätö̧. ²⁵ Ja̧u̧ mo̧ro̧ to'e'inätö̧ umätö̧'i̧nä̧, nä̧tö̧'i̧nä̧ doce milnö jo̧mȩnä̧ o'catoi'önä Hai ötahuiyä ttö̧ja̧mä̧. ²⁶ Josuémä umö̧ jui'ädocö pinö dacuo'quȩ 'chu̧huä̧rä̧nö̧ cä'epö u̧ju̧no̧mȩtä̧ jö̧nä̧, Hai ötahuiyä ttö̧ja̧rö̧ o'catoi'önä̧rö̧ cuä'ö ticuome jubö päi'önä. ²⁷ Israel ttö̧ja̧mä̧ ȩmi̧nä̧tö̧ pä̧cä̧yö̧'i̧nä̧ ttiäre'inä ja̧u̧ ötahuiyättömä, Tu̧ru̧hua̧ Dios Josuérö hueinö ta'anö ²⁸ Josuémä Hai ötahuiyämä juiyinome jö̧nä̧tä̧ kuhuö icuinö. Ju̧huȩnȩmä̧ jitä pi̧yȩ mo̧ro̧ jubömä ttö̧ja̧mä̧ toome. ²⁹ Josuémä Hai ru̧hua̧rö̧ daunä ti̧'ä̧dö̧ rö̧ni̧nö̧ ni̧pä̧ro̧mȩ päi'önä. Täcö kä̧hua̧ toänä mo̧ä̧cha̧'a̧, Josuémä dauttö tti̧mȩyȩda̧ pä'ö hue'inö ru̧hua̧ o'co jähuä, ja̧u̧ru̧mä̧ ötahuiyä äpatiyä pä̧tȩcuä̧nö̧ do'opö tticuinäcu̧, ju̧huȩnȩmä̧ inäduttö mö̧ä̧'ca päi'önä icuähuinätö̧ juhuä'ca möä'camä, jitä pi̧yȩ mo̧ro̧ jubö päi'önä ka̧'a̧. ³⁰ Ja̧'hua̧nö̧ ja̧'a̧ Josuémä Tu̧ru̧hua̧ Diosrö ku icu iyähuome aditinö Ebal möä'canä. ³¹ Dios adihuä u̧mö̧huä̧ya̧ Moisés Israel ttö̧ja̧rö̧ hueinö ta'anö, Moisés hueähuä huȩnȩ cuyärubanä huȩyu̧cui̧'i̧nö̧ ji̧nö̧ ta'anö "Ido'qui jättäyä'quitä ku̧nö̧ aditinö, coräuttu suböcuächönä rötähuä juiyönä." Pi̧yȩ ku icu iyähuämä Tu̧ru̧hua̧rö̧ iyinö, huȩnȩ juiyönä kä̧cuä̧huä̧ päi'önä. ³² Juhuorötä Israel ttö̧ja̧ ttä̧'ca̧ jo̧mȩttö̧, ja̧u̧mä̧ i̧do'quinämä Moisés hueähuä huȩnȩttö̧ bo'epö huȩyu̧ti̧nö̧. ³³ O'catoi'önä Israel ttö̧ja̧ttö̧ tä̧mö̧ sotö'inä, ruhuotö'inä, micuähuächönä pähuä ttö̧ja̧'i̧nä̧, soböcuächönä kä̧mä̧di̧nä̧tö̧ Diostt'inä, ttö̧ja̧ttö̧'i̧nä̧ kä'co päte'ö adicuä ttö̧ja̧, Levi ahuaruhuä'inä Dios öäre hueähuä huȩnȩ ȩco̧ca̧ 'chu̧huä̧rä̧nö̧ ttö̧ja̧'a̧nä̧, karattö ichöcuähuotö'inä, juhuorötä uhuäpächinätö̧'i̧nä̧, juhuätöttö jö'totömä Gerizin möä'ca pä̧tȩcuä̧nö̧ kä̧mä̧di̧nä̧tö̧. jahuätömä adiu ucuocu pä'inätö Israel ttö̧ja̧rö̧, Dios adihuä u̧mö̧huä̧ya̧ Moisésrö ä̧cuo̧mȩnä̧ji̧ hueinö ta'anö. ³⁴ Ja̧u̧ o'cajuiyönä 'cuäopäji o'ca'a Josuémä hueähuä huȩnȩmä̧ o'cajuiyönä ucuocunö, adiunä pä'ö rutähuä'inä, suronä pä'ö rutähuä'inä hueähuä huȩnȩ huȩyu̧cui̧'i̧no̧ ta'anö jueönä ucuocuinö. ³⁵ Ya'ute pähuä'inä ki̧'o̧ca̧'a̧ ji̧na̧'a̧ Moisés hueinömä, Josuémä o'catoi'önä Israel ttö̧ja̧ ji̧nä̧ yo̧mȩtȩ pätti'omettö̧ ucuocuinö: nä̧tö̧'i̧nä̧, ppo̧'ä̧tö̧'i̧nä̧, kara'attö ichäcuähuotö'inä ttä'ca jo̧mȩttö̧.