¹ Topii, recuätö curä ruhuä ttu̧ru̧hua̧rö̧ täcö 'choipa pä'ötä ja̧'a̧tó Jerusalén'inä, Judá'inä ttu̧cuȩ aditö iyopä̧rä̧cuä̧huä̧ ttö̧ja̧'i̧nä̧ o'catoi'önä pan (i̧ri̧si̧) iyopärätörö'inä ja̧'hua̧ta̧'a̧nö̧ ajiya ttahua pä'ö iyopärätörö'inä. ² Ja̧u̧ ubo ju̧ru̧hua̧, ja̧u̧ curä rohuähuäcuähuä ttö̧ja̧sa̧, jau ötahuiya ttö̧ja̧rö̧ ä'canä oicuä i̧sa̧ huȩnȩtö̧ ttö̧ji̧pa̧ pä'ö ttejächi'önä ppä̧dä̧rä̧cuä̧huä̧ i̧sa̧'i̧nä̧, ja̧u̧ Dios i̧huȩnȩ jiäcuähuä ttö̧ja̧sa̧'i̧nä̧ ja̧u̧ ä'canä 'cuäopäcue jiähuäräcua̧ ttö̧ja̧'i̧nä̧ ja̧u̧ bö̧o̧sa̧'i̧nä̧; ³ Ja̧u̧ ttö̧ja̧ ttu̧ru̧hua̧ cincuentanö jo̧mȩnä̧ huotö ttu̧ru̧hua̧ ja̧'a̧, ja̧u̧ ubo ttö̧ja̧ ttucuotäcu'inä, huȩnȩ jo̧mȩnä̧ 'quȩcuä̧ i̧sa̧'i̧nä̧, korojuei tä̧tä̧rö̧ adicuä i̧sa̧'i̧nä̧ ja̧'hua̧ra̧'a̧nö̧ märi'inä. ⁴ Ttömä päcuotö muäyotö ä'canä oicuä ttö̧ja̧ pä'ö chu̧ju̧nä̧cua̧sä̧, ja̧'hua̧ta̧'a̧nö̧ suro muäyotötä huettäcuotö jahuätörömä. ⁵ Ttö̧ja̧ o'catoi'önä ttabo iyotötä ttäcuotö, ja̧u̧ ya̧tȩrö̧'i̧nä̧ korotö'inä, ja̧'hua̧ta̧'a̧nö̧ ttipeyänä ka̧cuä̧tö̧rö̧'i̧nä̧; ja̧u̧ i̧tti̧ pä̧i̧cu̧nä̧ ra̧huä̧rö̧ yepe'acua̧ bö̧o̧sa̧rö̧. Ja̧'hua̧ta̧'a̧nö̧ suro i̧sa̧ micuähuocömä ucuotäcuähua̧rö̧ ucuttu'inä abonänö hua̧sä̧ pä̧cua̧ ja̧u̧rö̧. ⁶ Ya̧tȩ ubomä̧ 'chuä̧dä̧cua̧ ubuorö ja̧u̧ ojusodenä kö̧rö̧ ja̧'hua̧ta̧'a̧nä̧ pä̧cua̧: "Ucumä ju̧nä̧rö̧jä̧ juäocuäcuähuätä; ucu ujutu tu̧ru̧hua̧ päi'önä ku̧ja̧ pä'ätöjä̧ ruhuo huecuatö pä'ö, ja̧'hua̧t'a̧nö̧ ucu cumöpi̧yä̧ttö̧ surojupcuepomenätä ma̧'ä̧chä̧cua̧'a̧nö̧. ⁷ Ja̧u̧nu̧ mo̧ro̧tä̧ ja̧u̧mä̧ huopö ja̧hua̧ta̧'a̧nö̧ pä̧cua̧: Ttömä recuä rö̧jö̧ iyä i̧sa̧ päi'önämä chö̧ji̧yä̧cua̧sä̧; Ttömä jui̧'a̧sä̧ ire o̧si̧'i̧nä̧, i̧sä̧ti̧yu̧ pö̧jä̧ti̧yö̧'i̧nä̧. Ucumä jahuätö ötahuiyä ttö̧ja̧rö̧ hueähuä i̧sa̧jö̧nä̧mä̧ cu̧ji̧ni̧yä̧cua̧jä̧ ttörömä. ⁸ A̧a̧ isopäi'önä jȩ'cua̧ttö̧jä̧ ötahuiyä ttö̧ja̧ ttu̧ru̧hua̧ chö̧jö̧nä̧ päi'önä. Jerusalén'inä pparächi'ö ma̧ä̧chä̧cua̧'a̧, ja̧'hua̧ta̧'a̧nö̧ Judá'inä ma̧ä̧chi̧na̧'a̧, dä̧bö̧ pä'öjä̧ttö̧ ti̧hhuȩnȩ tucuocu'inä jȩttö̧'i̧nä̧, Tu̧ru̧hua̧ Tö̧ä̧nä̧hua̧ öjö'cocö jȩta̧'a̧ttö̧, öadihuä ö̧jö̧'i̧nä̧ totta'anä Tu̧ru̧hua̧ i'äre tuä'cua päi'önä jȩtta̧'a̧ttö̧. ⁹ Jahuätö suronä jȩttä̧ji̧mä̧ jeruhuoca'a tti'änä i̧jȩpö̧nä̧ jiähua'a: ja̧'hua̧ta̧'a̧nö̧ jahuätö surojö jȩttä̧ji̧mä̧ jiähuä̧ra̧'a̧ Sodomattö̧ ji̧nö̧a̧'a̧nö̧; jahuätömä daju tticua pä'ömä jjuiya'a ¡Ayoo jahuätuhue! Ttumönätä surojö i'cächäcuähuäjä̧tó jitötätä. ¹⁰ Ji'ähui ttö̧ja̧ surojö juiyönä kä̧tö̧rö̧mä̧ adiutä 'chä̧cua̧'a̧ pä'a, a̧a̧ jahuätö ja̧'a̧ ttaditähuä u̧huä̧ju̧ttö̧ ttucuäcuotömä. ¹¹ ¡Jacoo suronä jȩpö̧hue! suronätä 'chä̧'cua̧ chutä amönä aditäjimä micuä päi'önä ä̧tȩcua̧ päi'önätä jjä̧cua̧'a̧ ja̧u̧ru̧mä̧. ¹² Chu̧ju̧nä̧rä̧u̧ chumöhuäyotö, cuabo iyotömä ppo̧'ä̧tö̧tä̧ pätti'äcuotö; ja̧'hua̧ta̧'a̧nö̧ nä̧tö̧tä̧ huettäcuotö jahuätömä. Ttö chahuaruhuä, jitö mänä suräjämänä'inä ja̧'hua̧ta̧'a̧nö̧ mä̧nä̧ cui̧'chä̧tu̧cua̧ pä'ö cuamöcuädinämä'inä jerutö tticuäcuotö. ¹³ Ja̧u̧ Tu̧ru̧hua̧ tö̧ä̧nphua̧tä̧ ä̧rä̧mi̧'ö̧ kö̧ ö̧jä̧pö̧nä̧ isappänä cuäa pä'ö, umöhuäyotörö ja̧u̧mä̧ ä̧rä̧mi̧'ö̧ kä̧mä̧dö̧ ö̧jä̧pö̧nä̧ yo̧ä̧huä̧i̧nä̧ jȩtti̧nö̧ jiähua pä'ö ötahuiyä ttö̧ja̧rö̧. ¹⁴ Ja̧u̧ Tu̧ru̧hua̧mä̧ i̧chä̧cua̧ buäcuächinä̧tö̧rö̧ ötahuiyä ttö̧ja̧rö̧ ro̧ȩcuä̧ i̧sa̧ päi'önä, ja̧'hua̧ta̧'a̧nö̧ u̧mö̧huä̧yo̧tö̧rö̧ ä̧'ca̧nä̧ oicuä isotörö ucutumä surojuo'epö be'ecuächinätö̧jä̧ juätta uva pätta; usurä isotörö nä̧u̧cuä̧rä̧cuä̧huä̧ ttö̧ja̧mä̧ cuojusodenä ka̧cuä̧tö̧. ¹⁵ ¿Dä̧bö̧ kä̧dö̧ i̧nȩpä̧'chö̧ cuicuätucua'attö̧ ucutumä ttö cuahuaruhuärö tti'ä nori'chönu jȩttö̧nä̧ usurä isotörömä? Pi̧yȩ ja̧'a̧ Tu̧ru̧hua̧ Tö̧ä̧nä̧hua̧ ji'äu päinömä curä ruhuä ttu̧ru̧hua̧. ¹⁶ Ja̧u̧ Tu̧ru̧hua̧ Tö̧ä̧nä̧hua̧ pä'inö Sión i̧tti̧mö̧ nä̧tö̧mä̧ tta̧mö̧nä̧ repeäcuähuätä huotö, tti'cho̧mȩnä̧mä̧ ichätö ttupiyä sanebänötä, ja̧'hua̧ta̧'a̧nö̧ tti'ärenä nori'chunutä jȩpö̧ kö'cähuä jȩpä̧'chä̧tö̧ rererö rähua rosurosunö tö'ätö ttö̧jä̧pi̧yä̧nä̧ tottatö pä'ö. ¹⁷ Ja̧'hua̧nö̧ ja̧'a̧ttö̧ Ja̧u̧ Tu̧ru̧hua̧mä̧ huare huasi i'qui oyanä 'cärächu märichei Sión i̧tti̧mö̧ nä̧tö̧ ttö̧jä̧pi̧yä̧nä̧ i'quihuäcuotö pä'inö Ja̧u̧ Tu̧ru̧hua̧mä̧ ttuhuo'che saunä sahueba päi'önä jȩä̧cua̧. ¹⁸ Ji̧yȩnö̧ mo̧ro̧mä̧ ja̧u̧ Tu̧ru̧hua̧ Tö̧ä̧nä̧hua̧ 'choipäcua̧ rö̧ä̧nä̧ micuäu ttutturuhuä'canä ttö̧nä̧huä̧'i̧jö̧, ttunä a̧'cua̧cu̧nä̧ ttu̧huȩnä̧huä̧'i̧jö̧ pöttähuä obä, yodo kä̧hua̧ pä'ö tȩo̧bu̧ jö̧nä̧ räopa'a jä̧'i̧nö̧'a̧nö̧ jö̧ juäi'inä. ¹⁹ Ttä̧ja̧nä̧ a̧'cua̧cu̧nä̧ rö̧jö̧ o̧sa̧'i̧nä̧, ttu̧mö̧ca̧ca̧nä̧ rö̧nä̧cuä̧huä̧'i̧nä̧ ja̧'hua̧ta̧'a̧nö̧ ttunä tȩä̧ta̧ huȩnä̧rä̧cuä̧huä̧'i̧nä̧; ²⁰ Tti'ä 'ca̧huä̧cuä̧huä̧ o̧ta̧'i̧nä̧ cuoräu o̧sa̧'i̧nä̧ ttu̧jä̧pö̧ ttutturuhuä'canä ru̧nä̧huä̧'i̧nä̧, ttu̧cuä̧ba̧ 'quiyönä ti̧ä̧dä̧cuä̧huä̧'i̧nä̧ ja̧'hua̧ta̧'a̧nö̧ a̧mȩhuoya ȩjö̧ o̧ca̧'i̧nä̧, pparata emähuä märä'inä ^{21 23} Ja̧u̧mä̧ ttödo'che o̧bö̧'i̧nä̧ 'cho̧i̧pä̧cua̧ ja̧'hua̧ta̧'a̧nö̧ tti̧ji̧yu̧nä̧ a̧'cua̧cua̧ pä'ö ru̧nä̧rä̧cuä̧huä̧'i̧nä̧. ²² Pä'cärinä jȩpö̧ ö'cäu 'ca̧tä̧cuä̧huä̧ o̧ta̧'i̧nä̧ ttunä huȩnä̧cuä̧huä̧ o̧ta̧ ja̧'hua̧ta̧'a̧nä̧ tto̧dä̧ru̧huabiyä ttu̧mö̧nä̧ 'chuä̧rä̧cuä̧huä̧'i̧nä̧. ²⁴ A̧dö̧nä̧ amehuä'inö jueimä huautä huase jä̧cua̧'a̧; ttäcä isäya rä̧'i̧nö̧ jueimä suröjuäi isappätä rä̧cua̧'a̧, ttunä a̧'cua̧cu̧nä̧ 'cuittähuä'inöjueimä cahuäränö jä̧cua̧'a̧; ja̧'hua̧ta̧'a̧nö̧ pö̧jä̧ta̧ pä'cärinä 'ca̧tä̧cuä̧huä̧ta̧ jä̧ji̧ jueimä hua'are pä̧nä̧ 'ca̧tä̧cuä̧huä̧ta̧ i̧di̧cuä̧ta̧ jä̧cua̧'a̧; tta̧'cua̧cuä̧'i̧nö̧ jueimä ja̧'hua̧ta̧'a̧nö̧ ocuränä cuottäppä̧ räopä'inö'anötä jä̧cua̧'a̧. ²⁵ Ucu cumöhuäyotomä curä'chunä 'cui'cuipö icuähuäcuotö 'corujuottächönä päi'önä ja̧'hua̧ta̧'a̧nö̧ cumöhuäyotö curä rohuäu juruhuätömä tturohuähuäcuotö. ²⁶ Jerusalén äpate bäreö a̧'cua̧ tta̧huȩcuä̧cua̧'a̧ jiröjirönö ajuäcuähuä jä̧'i̧nö̧'a̧nö̧ jä̧cua̧; ja̧'hua̧ta̧'a̧nö̧ katä kä̧cua̧'a̧ rȩjȩtä̧ pȩjä̧cua̧'a̧.