2 ¹ Ja̧u̧mä̧ päinäcu̧sä̧: "Ttö̧ja̧sa̧ i̧tti̧, ä̧rä̧mi̧'ö̧ kä̧mä̧di̧; ja̧'hua̧nö̧ ku̧jä̧mä̧do̧mȩnä̧ chu̧cuo̧cuä̧cua̧jä̧." ² Ja̧'hua̧nö̧ ja̧'a̧ ja̧u̧ ttörö ucuocua'anä, a̧'cua̧ru̧hua̧mä̧ ttönä kä̧mä̧di̧nö̧ ja̧'hua̧nö̧ kä̧mä̧dö̧ chö̧jä̧pi̧yä̧ juepinäcu̧sä̧ ja̧'hua̧nö̧ jȩpö̧ ucuocua'a ä̧ju̧cui̧nö̧sä̧. ³ Ja̧u̧mä̧ päinäcu̧sä̧: "Ttö̧ja̧sa̧ i̧tti̧, ttömähuedäcujä̧, ttö̧ja̧ pä̧i̧cuä̧tö̧ ttörö'inä to'ija̧'a̧cu̧ jitä mo̧ro̧ jubö päi'önä jȩpä̧'i̧jä̧tö̧ Israel ttö̧ja̧ ttö̧ja̧cua̧'a̧cu̧! jahuätömä ja̧'hua̧ta̧'a̧nö̧ ttö̧tä̧mö̧ mi̧nä̧'inä ttörö to'ija̧'a̧cu̧ jȩtti̧na̧'a̧mä̧ jitä mo̧ro̧ jubö päi'önä jȩpä̧tö̧! ⁴ Jahuätö tti̧tti̧mö̧mä̧ tti'ämä jarodätö tti'ä ku̧nä̧rä̧tö̧ ja̧'hua̧ta̧'a̧nö̧ tta̧mi̧'inä 'qui'ädäcuähuätö. Ucumä jahuätörö huedäcujä̧, ucumä jahuätörö jicuähuäcua̧jä̧: TÖ̧Ä̧NÄ̧HUA̧MÄ̧ pa̧'a̧nö̧ pä'äji pä'ö. ⁵ Ttä̧ju̧cua̧ pättöttö'inä ttä̧ju̧cu̧ juiya pättöttö'inä. Jahuätömä jarodäcuähuä ttö̧ja̧ ja̧'a̧, ja̧'hua̧nö̧ ja̧'a̧nä̧ ujutu tö̧'quȩtȩnä̧ ya̧tȩ profeta ki̧nö̧ pä'ö ttu̧huo̧juä̧cua̧'a̧nö̧. ⁶ Ucú, ttö̧ja̧sa̧ i̧tti̧, jahuättörömä yecuecuä ttihuene'i̧nä. Yecuecuä, so̧ö 'cä̧tȩ cu̧ja̧'anäinä̧ jahuata'anöta̧ idíyu̧tu̧cu̧ cu̧ja̧dä̧'inä . Yecuecuätö ttihuȩne'i̧nä ttiäpiyä'inä, jahuättömä jarodäcuäcuä isotötä huotö. ⁷ Ja̧'hua̧nö̧ ja̧'a̧nä ucumä cucuocuäcua̧jä̧ ttö chihuȩnȩ jahuätö ttäju̧cua̧ pä'ö ja̧'hua̧ta̧'a̧'nö̧ ttäjcu̧ juiyöttö'inä, jahuättömä juiyó jarodätö ja̧'a̧ttö̧. ⁸ Ja̧'hua̧nö̧ ja̧'anä ucú ttö̧ja̧ i̧sa̧ tti̧, ä̧ju̧cui̧ ttö ucuru jidäu. Cu'arodä jahuätö ttö'arodö'anömä. !Cuä ba'epu cuití ttö chiyö'anö päi'ötä.! ⁹ Ja̧'hua̧nö̧ ja̧'a̧ topinösä̧, u̧mö̧ ki̧ä̧dä̧mö̧nä̧mä̧ cuyäruba huȩyu̧cuäba 'chu̧huä̧ra̧'a̧. ¹⁰ Ja̧u̧mä̧ chä'ca jo̧mȩttö̧ ba'epinö pätecu huȩyu̧cua̧'a̧ ja̧'hua̧ta̧'a̧nö̧ jahuäbanämä huȩyu̧cui̧na̧'a̧ ajahuäcuähuä'inä, tta̧'cua̧ tta̧huȩcuä̧cuä̧huä̧'inä juhua'atäcu ttijiyuhuächi'ö'inä.