4 ¹ Saú i̧tti̧ Isbosetmä̧, Abnermä Hebrónttö̧ 'corujuo'ächäji pätta'a ä̧ju̧cuo̧mȩnä̧, juiyupächi'inö̧, ja̧'hua̧ta̧'a̧nö̧ Israel ttö̧ja̧'i̧nä̧ o'catoi'önä̧ tta̧'cua̧ ro'ecuipinä̧tö̧. ² Ja̧'hua̧nö̧ ja̧'a̧ Saúl i̧tti̧mä̧ i̧tti̧mö̧ ta̧ju̧rö̧ ku̧nä̧ri̧nö̧, jahuätömä̧ su̧ro̧da̧u̧ tturuhuotö ji̧na̧'a̧. Ya̧tȩmä̧ Baana pä'ö micuinö, ja̧'hua̧ta̧'a̧nö̧ ka̧ra̧mä̧ Recab pä'ö micuinö̧, Benjamín ahuaruhuä 'cotöttö beerot ttö̧ja̧sa̧ Rimón pä'ö micua̧ i̧tti̧mö̧ ji̧na̧'a̧ ( ja̧'hua̧nö̧ ja̧'a̧ Beerot ttö̧ja̧mä̧ Benjamín ahuaruhuä 'cotöcu todepätö ji̧na̧'a̧, ³ Beerot ttö̧ja̧mä̧ Gitaím ötahuiyära̧'a̧ dö'ecuächinö'cotö jitä mo̧ro̧ jubö päi'önä juȩnȩtä̧ ka̧cuä̧tö̧). ⁴ Saúl i̧tti̧, Jonatánmä i̧tti̧ ö̧jä̧pi̧yä̧ 'te'chächächinörö̧ ku̧nä̧ri̧nö̧. Cinco a̧'ȩ jo̧mȩnä̧ u̧ju̧nä̧ra̧'a̧, Saúl'i̧nä̧ Jonatáncu̧ ttötö'cö huȩnȩ Jezreelra̧'a̧ttä̧ huȩnȩ rȩbȩhui̧po̧mȩnä̧, ji̧'qui̧cha̧hua̧rö̧ tta̧'ä̧rä̧ju̧mä̧ ȩmi̧pö̧ tö'ipächö jojächomenä̧, Jonatán i̧tti̧mä̧ ma'i̧nö̧, ja̧'hua̧nö̧ ma̧o̧mȩnä̧ 'te'chächipinö, ja̧u̧mä̧ Mefiboset pä'ö micuinö. ⁵ Ja̧'hua̧nö̧ ja̧'a̧ttö̧ beerot ttö̧ja̧sa̧ i̧tti̧mö̧ Recab'i̧nä̧ ja̧'hua̧ta̧'a̧nö̧ Baana'i̧nä̧ mo̧ro̧ kä'cö rö̧ȩnä̧ du'a Isboset ojusodera̧'a̧cu̧ 'chi̧nä̧tö̧, chutämä nipä̧ro̧mȩcu̧ päia'a 'cuä'ächi'ö ä'ö ö̧'a̧'a̧nä̧. ⁶ Isaju äpate ä'ca tta̧'ä̧rä̧jö̧mä̧ ä'i'inä̧ju̧ trigo o'co'cua poji icu kä̧nö̧, ja̧'hua̧nö̧ ja̧'a̧ Recab'i̧nä̧ ja̧'hua̧ta̧'a̧nö̧ Baana'i̧nä̧ yo̧ä̧huä̧i̧nä̧ do'ächi'ö jahuäju kö̧'o̧mȩttö̧mä̧ otonä̧nö̧ 'cuä'o'inä̧tö̧. ⁷ Ja̧'hua̧nö̧ ja̧'a̧ isodenä dodepä'cotömä̧ ta'ö icu cuä'ö tticuinä̧cu̧ ä̧'o̧ca̧nä̧ ä̧'ä̧huä̧ma̧nä̧ ö̧'a̧'a̧nä̧. Ja̧'hua̧nä̧ jȩpö̧ u'i̧nä̧ 'cui'opö icuäjä'cotö ȩpö̧mä̧ yodo 'cuäo'önä̧ i̧hui̧nä̧tö̧ Arabára̧'a̧cu̧mä̧. ⁸ Isboset umä Davidrö ȩpö̧ iyinätö̧ Hebrónä̧ 'chä̧hui̧'ö̧ jahuätömä̧ ru̧hua̧rö̧ pä'inätö̧: "Topi, cuaboi̧ya̧ Saúl ucuru cuä'ö icua pä'inö i̧tti̧ Isboset umä piyusä. jitä mo̧ro̧ TÖ̧Ä̧NÄ̧HUA̧mä̧ Saúl'i̧nä̧ ja̧'hua̧ta̧'a̧nö̧ i̧tti̧mö̧'i̧nä̧ tu̧ru̧hua̧ ru̧hua̧rö̧ suroju jȩtti̧nö̧ micuämä mitäji." ⁹ Davidmä beerot ttö̧ja̧sa̧ Rimón i̧tti̧ Recabrö'i̧nä̧ ja̧u̧tä̧ ö̧jä̧hua̧ Baanarö̧'i̧nä̧ ädätinö; "TÖ̧Ä̧NÄ̧HUA̧mä̧ 'cuäopönä̧tä̧ kö̧ cha̧'cua̧rö̧ ji̧yȩcu̧nä̧ huȩnȩ jö̧ttö̧ chu̧ji̧pö̧nä̧ ppä'ädinö̧mä̧, ¹⁰ Ya̧tȩ ttörö päomenä̧: Topittö̧ Saúlmä 'corujuo'ächäji, adihuäjuei huȩnȩ i'cächöcö̧ pä'ö a̧mö̧cuädö 'chu'ädäji'ca̧mä̧ Siclag ötahuiyättö cuä'ö chicuinä̧cu̧. Ja̧u̧ ji̧na̧'a̧ mi̧cuä jö̧nä̧ chiyinömä̧ adihuäjuei huȩnȩ jiähuäjueimä. ¹¹ Jua'a yabonä̧nö̧ suropätö ttö̧ja̧jä̧ ttö̧ja̧sa̧ suronä jȩpo̧cö̧rö̧ chutä ojusodettö ä̧'ä̧huä̧ma̧nä̧ ö̧'a̧'a̧ cuä'ö cuicuinä̧tu̧cua̧'a̧mä̧, ¿Ttömä̧ ucutu cuä'ö cuicuinätu̧cua'amä̧ ro̧'ȩpö̧ kä̧nö̧ pi̧jä̧ rȩjȩttö̧mä̧ rä'epö chicu juiyö'anö̧ ja̧'a̧ tä̧ji̧?" ¹² Ja̧'hua̧nö̧ ja̧'a̧ Davidmä mö̧ä̧yotörö hue'inö̧, huȩä̧jä̧u̧mä̧ cuä'ö tticuinä̧u̧ ja̧'hua̧ta̧'a̧nö̧ ttu̧mö̧pi̧yä̧'i̧nä̧, ttö̧jä̧pi̧yä̧'i̧nä̧ 'cui'ö icuäjä'cotö Hebrón ötahuiyänä̧ ajiya acuose ko̧mȩ jäyä ti̧'chö̧ ttö̧ni̧nä̧u̧. Ja̧'hua̧nö̧ ja̧'a̧nä̧ Isboset umä ȩmi̧pö̧ Hebrón ötahuiyänä̧ Abner minä̧rö̧ 'turu tticuinomȩ 'turu icuinä̧tö̧.