24 ¹ Pä'äjita'anö TÖ̧Ä̧NÄ̧HUA̧mä̧ Israel ttö̧ja̧rö̧ rö̧ä̧nä̧ a̧mi̧surächi'inäcu̧ ja̧'hua̧nö̧ jä̧cu̧ Davidrö huehuepinö jahuätörö to'ija̧'a̧cu̧ pa̧'a̧nö̧ päiyarö pä'ö: "Israel ttö̧ja̧rö̧'i̧nä̧ ja̧'hua̧ta̧'a̧nö̧ Judá ttö̧ja̧rö̧'inä ttö̧ja̧cuo̧mȩ 'chä̧nö̧ pa̧ja̧tä̧ji̧." ² Ru̧hua̧mä̧ su̧ro̧da̧u̧ ttu̧ru̧hua̧ chutäcu kö̧ Joabrö pä'inö: Israel ttahuaruhuä 'cotö ttö̧ja̧cuo̧mȩ 'chä̧nö̧ Danttö kä̧mä̧dö̧ Beerseba jubö ka̧cuä̧tö̧rö̧, ttö̧ja̧ o'catoi'önä̧ curä tturohuähua pä'ö jo̧mȩnö̧ huotörö chu̧huo̧jua̧ pa̧ja̧tä̧ji̧." ³ Joabmä ru̧hua̧rö̧ pä'inö: TÖ̧Ä̧NÄ̧HUA̧ ucu Cu̧ä̧nä̧hua̧tä̧ ttö̧ja̧rö̧mä̧ 100nö̧ huotöttö'inä yabonänö rö̧ä̧da̧jä̧, chu̧ru̧hua̧ ru̧hua̧ toönä päi'önä. Ja̧'hua̧nö̧ ja̧'a̧nä̧ ¿Tta̧'a̧nö̧ pä'ömä chu̧ru̧hua̧ ru̧hua̧mä̧ pi̧yȩmä̧ jȩa̧ pä'attö̧?" ⁴ Ja̧'hua̧nö̧ pä'anä, ru̧hua̧ röji päömä su̧ro̧da̧u̧ ttu̧ru̧hua̧ Joabrömä to'ija̧'a̧cu̧ pähuächina̧'a̧. Ja̧'hua̧nö̧ ja̧'a̧ttö̧ Joab'inä ja̧'hua̧ta̧'a̧nö̧ su̧ro̧da̧u̧ tturuhuotö'inä ru̧hua̧ ä'ca jo̧mȩttö̧ rä'opächinä̧tö̧ Israel ttö̧ja̧rö̧ pa̧ja̧tö̧ 'chä̧nö̧mä̧. ⁵ Jahuätömä Jordán aje ji̧jä̧cu̧ kähuinä̧tö̧ ja̧'hua̧nö̧ kähuäjä'cotö pämäroppä päi'ome huȩjö̧ ötahuiyä ö'ohuecu ka̧cu̧ Aroer ötahuiyättömä tö'cönänö ka̧cuä̧mi̧nä̧tö̧. ⁶ Ja̧u̧nu̧ o'ca'a jahuätömä Gad ötähuiyä kä'conä 'cuä'o'ö Jazer ötahuiyära̧'a̧ ichinätö̧. Jahuätömä Tahtim Hodshi rȩjȩttö̧mä̧ Galaadra̧'a̧cu̧ ichinä̧tö̧, ja̧u̧nu̧ o'ca'amä Dan Jaánra̧'a̧cu̧ Sidón ötahuiyä jäyä jubö rȩbȩhui̧nä̧tö̧. ⁷ Tiro ötahuiyä 'quiyönä adicuome'inä rȩbȩhui̧pi̧nä̧tö̧ ja̧'hua̧ta̧'a̧nö̧ heveos ttö̧ja̧ ttidepiyunä'inä juhuaátäcu canaán ttö̧ja̧ ttidepiyunä'inä o'cajuiyötä. Ja̧'hua̧nö̧ ja̧'a̧ Judá ttö̧ja̧ ttidepiyöttömä ö'ohuecu Beersebanä 'chä̧hui̧'i̧nä̧tö̧. ⁸ Jahuätömä ja̧huä̧jä̧ o'cajuiyönä cue'ächäjä'cotö, kä̧hua̧tö̧tä̧ 9nö päi'omenä mo̧ro̧mä̧ 20nä̧ jahuätömä Jerusalénra̧'a̧cu̧ ppa̧'ä̧chi̧nä̧tö̧. ⁹ Ppa̧'ä̧chi̧'ä̧ji̧'ca̧ Joabmä curä rohuähuätö o'catoi'önä̧rö̧ ö̧'a̧tä̧ji̧mä̧ ru̧hua̧rö̧ ji'ähuinö. Israel ttahuaruhuä 'cotöttömä umä̧tö̧ juruhuätö curä o'chunö rohuähuäcuähuä jo̧mȩnö̧ huotömä 800 milnö jo̧mȩnä̧ ja̧'a̧ ja̧'hua̧ta̧'a̧nö̧ Judá ahuaruhuä 'cotöttömä 500 milnö u̧mä̧tö̧ jo̧mȩnä̧ ja̧'a̧. ¹³ Ja̧'hua̧nö̧ ja̧'a̧ttö̧ Gadmä 'chi̧nö̧ David ö̧ja̧'a̧cu̧ ja̧'hua̧ta̧nö̧ pä'inö ja̧u̧rö̧: "¿Rȩbȩhuä̧cua̧'a̧ huäbodäcuä a̧'ȩ jo̧mȩnä̧ ppäi ttöcuätucu mo̧ro̧ pi̧jä̧nä̧? ¿Ja̧'hua̧ta̧nö̧ huäbodäcuä kä̧hua̧tö̧ jo̧mȩnä̧ tucuipäcua'a jä̧cu̧ cuaboiyotöttö ja̧'hua̧nö̧ ja̧'a̧nä̧ jahuätömä röttäcua̧jä̧? ja̧'hua̧ta̧'a̧nö̧ jä̧cua̧'a̧ huäbodäcuä mo̧ro̧ isotö ttirecunä? Jitämä pä'i däje huȩnȩ chȩpä̧cua̧'a̧ttö̧ ttörö hue'äjirömä. ¹⁴ Ja̧u̧nu̧ o'ca'a Davidmä pä'inö Gadrö ttömä rö̧ä̧nä̧ usurä ȩmä̧u̧sä̧... ja̧'a̧tä̧ topitö tu̧ru̧huä̧ umönä mata̧'a̧nä̧, ja̧'ta̧'a̧nö̧ ubo umönämä mata̧ pä'ocotöjä̧ ja̧'hua̧nö̧ ja̧'a̧ttö̧ re ö̧jö̧mä̧ rö̧ä̧nä̧tä̧ ja̧'a̧tó. ¹⁵ Ja̧'hua̧nö̧ ja̧'a̧ttö̧ tu̧ru̧hua̧mä̧ hue'inö isotörö Israelra̧'a̧ pä'ö mo̧ro̧ juoa'a ja̧'hua̧ta̧nö̧ 70 milnö ttö̧ja̧ to'e'inätö̧ ja̧u̧nu̧ pä̧nä̧ Danttö kä̧mä̧dö̧ Beerseb jubö. ¹⁶ Ja̧'hua̧nö̧ ja̧'a̧ Ángelmä umö te'ädinö Jerusaléncu̧ ja̧u̧ ötahuiyä pparopö icua pä'ö tu̧ru̧hua̧mä̧ a̧mö̧cuädö pärohuinö. Rö̧ä̧nä̧ suroju'anö ji̧yä̧cu̧, ja̧'hua̧ta̧nö̧ päinäcu ángelrö̧ ttö̧ja̧rö̧ surojuoepa pä'ö: "Jo̧mȩ ja̧'a̧ jitämä cumö pporädi." Ja̧'hua̧nö̧ ja̧'a̧ tu̧ru̧hua̧ umöhuä̧ya̧ ángelmä usurä ȩmä̧u̧nä̧ jȩpi̧nö̧. Ja̧'hua̧nö̧ ja̧'a̧ tu̧ru̧hua̧ umöhuä̧ya̧mä̧ ángelmä ki̧nö̧ Arauna Jebuseo ppa̧'ȩpö̧ aditome. ²¹ Ja̧u̧nu̧ o'ca'a Arauna pä'inö: "¿Tta̧'a̧nö̧ pä'ö ttö chu̧ru̧hua̧, ucuo ru̧hua̧ ichäja'ató umöhuäyotö huettö jȩä̧cuä̧ ttö̧ja̧cu̧mä̧?" David ädätinö: "Juhua'amä chema pä'ö icu cuiäre juatähuäcä, juhua'amä CHU̧RU̧HUA̧RÖ̧ ku icu iyähuome chadita pä'ö isotö'inä koromecu̧ pporädö ku̧nu̧ ttö̧ja̧ ttö̧jo̧mȩttö̧'i̧nä̧ imicu̧nä̧." ²² Arauna pä'inö Davidrö: "Potó ucutumä, ttö chu̧ru̧hua̧, ucuo ru̧hua̧. Jȩpi̧ ucurutä adihuomenä, topihuä pȩnȩ kacuätötó pä̧cä̧yu̧ u̧mä̧tö̧ ku icu cuiyäcuotömä dau isodä'inä ka̧'a̧, pä̧cä̧yu̧rö̧ käcuoränö ti̧'ä̧dö̧ rö̧nä̧huodä. ²³ Pi̧yȩ o'ca'a juiyönä, ttö chu̧ru̧hua̧ ucuo ru̧hua̧, yo Arauna ucuru chi̧yä̧cua̧sä̧ ." Ja̧u̧nu̧ o'comenä pä'inö ucuo ru̧hua̧rö̧: CU̧RU̧HUA̧ Diostä a̧ päcuajä̧." ²⁴ Ucuo ru̧hua̧ pä'inö Araunarö: "Ja̧'hua̧nö̧mä̧cö̧, ttömä 'quiyönä amöcuädösä micuähuometä chimita pä'ö. Ttömä ja̧u̧ juhuäi cuä'ö icu chi̧yä̧cua̧sä̧ pä'ocösä CHU̧RU̧HUA̧rö̧ yorö'iso micuähuocönämä" Ja̧'hua̧nö̧ ja̧'a̧ David mitähuinö trigo isä'cua ppa̧'ȩpö̧ icuäcä ja̧'hua̧ta̧'a̧nö̧ pä̧cä̧yö̧ u̧mä̧tö̧rö̧'i̧nä̧ cicuentanö pärä o̧bi̧nä̧. ²⁵ Davidmä TÖ̧Ä̧NÄ̧HUA̧rö̧ ku icu iyähuome juȩnȩtä̧ aditinö, ja̧'hua̧nö̧ ja̧'a̧ juoröttö ttiäre ku icu iyähuä'inä ja̧'hua̧ta̧'a̧nö̧ iäre huȩnȩ juiyönä kä̧cuä̧huä̧nä̧ ku icu iyähuä'inä iyinö. Ja̧'hua̧nö̧ iyomenä jahuätömä tti̧rȩjä̧ tö'cö TTÖ̧Ä̧NÄ̧HUA̧rö̧ jä'epinätö̧ ja̧'hua̧nö̧ ja̧'a̧ ja̧u̧mä̧ Israel tti̧rȩjä̧nä̧ isotö ttucuäjimä̧ yabonö ttucu juiyönä jȩpi̧nö̧.