¹ Yaawä amorreos cajiichanaanaichomo, ñanno tuna Joodadan dö'se cönä'ja'todö wäiñe eta'jäcä, tameedä cananeos cajichaanaichomo, Mar Mediterraneo ña cönä'ja'todö wäiñe eta'jäcä mmaja, iyää Wanaadi Joodadan inshe'namjö'dö, Israelita we'dätäädöcoomo wetä, shaadöcoomo cöneejä, töweewä'täse'daiñe tödöene, Israelitacoomo nontädööje. ² Iyää anooto Cajiichana Wanaadi cönä'döaacä Josue wä: " Täju cömö'cäje ännöcä, tameedäädä dhanwaacomo Israelita circuncidhaaje tödööjocooto'de yaawä" quee cönä'döaacä. ³ Mädääje Josue täju cömö'cäje cönnöjoojätöi, circuncidhaaje cönnöjoojätöicho yaawä tameedä dhanwaacomo Israelitacoomo, colina de Aralot ña. ⁴ Edääje yeijäcä Josue circundhaaje ñanno cönnöjoojätöicho: tameedä dhanwaacomo Egipto ñanno cöneeja'caichodö, yä'jajo'jocoomo weijäcä jata jemjönö aca Egipto ñanno töweeja'ca'jejeiñe. ⁵ Circuncidhaaje tödööe yeijäcoomo yeichaame ñanno tameedä dhanwaacomo Egipto ñanno cöneeja'caichodö, ñanno tameedä mudeshichä jata'jemjönö aca cönennuichodö mmaane circuncidhaaje tödööe'da cönä'ja'to ⁶ Israelitacoomo cönoojoimaicho jata'jemjönö aca cuarenta añoto'cäwa'cä, soto cönä'jajoicho dea yaawä ñanno tameedä töweewänä'taamo cöneeja'caichodö Egipto ñannode, Cajiichaana Wanaadi a'deddu woije ännö'da yeijäcoomo weijäcä. Cajiichana Wanaadi ta'deddu cuntui yaawä nono aneenejo'da töweichojo chäwwäiñe, iyä nono ñeecammadö cönä'ja'dö dhadaijocoomo wäiñe, inñataaje natö wa'tatoojo ñano, inñataaje äcöönö inñejencatoojo ñano mmaja. ⁷ Ñanno nacoomo'jödö janñoone Cajiichana Wanaadi circuncidhaaje cönnöjoicho Josue wwä, circuncidhaaje tödööe'da yeijäcoomo weijäcä jata'jemjönö aca cönoojoima'todaawä. ⁸ circundhaaje tameedä töwä'döja'jäcäiñe, tä'sacaiñe cönä'ja'to yaawä tameedäädä, töwääjöchö'tädööcomo'cä wa'cä. ⁹ Cajiichana Wanaadi cönä'döaacä yaawä Josue wwä: "Edä anooto awä ema'jödööje äwä'döjoodöcoomo Egipto ñancomo wä wacoichaja" quee cönä'döaacä. Mädääjeene eduuwa yää Gilgal ñanooje chäätö na, eduuwa naadö jona tödööene. ¹⁰ Israelitacoomo cöneejata'toicho Gilgal ña. Celebraaje cönnöicho ääma'da wei'jä anootoichädö, amoojadooto de'wä acäichea anooto yeichö, cho'mamöödawä, yäätä yeejataata'como cönä'ja'dö dö'ta acaanajato Jerico ñano de'wä. ¹¹ Yää jenamma yaawä ääma'da wei'jä celebraaje tödö'jeje, yää anooto awä dea, cönääwashinchoicho yää nono de'wäno äwanshiche, pan levadura'jemjönö cönä'jaacä, änña shaddaajä mmaja. ¹² Iyää anooto awä mmaja, mana töwä'medö cönä'cai, yää nono de'wäno äwanshi ameea'jäcä chäwwäiñe. Mana cönaatamei yaawä Israelitacoomo ewanshöyööje cönä'ja'dö, yaawä'ne yää wedu cönääwashinchoicho Canaan ñano äwanshi yeeja'caajäque. ¹³ Josue amoiche'da yä'döa'jäcä Jerico ñano jäcä, töwö ene'madö cönaajäntäi, cöneeneaacä yaawä tooni dhanwa towaajo, yaanöngajä jiidi, töcöömöi dha'me. Josue cöntämä yaawä chäwwadäädä, cönä'döaacä: "¿Iñaa jadääca manä, iñaa tu'detomo jadääne manä? quee cönä'döaacä. ¹⁴ Töwö cöneccujä'acä cönä'döaacä: "Ajaadoncomoojönö öwö, ätu'de'tomo jadoncomoojönö mmaja. öwö ñäädä Cajiichana Wanaadi sotoi edhaajätoncomo. Yääje yeijäcä weejä sadä" quee cönä'döaacä. Yaawä Josue tä'mudhe cänä'döi töjeecaichöque noono tajoojoone ije'taca, tönoiñe eneedöque, cönä'döaacä yaawä chäwwä: "Yaanontäjätö'se aweiya'jäcä, canontäjä'cä, osootoi öwö." quee cönä'döaacä. ¹⁵ Cajiichaana Wanaadi sotoi edhaajätoncomo cönä'döaacä Josue wä: "Asaajatui u'cacä, äwätajaajä naadö dö'tä nossaje je'da weichojo madä", quee cönä'dööacä. Mädääje Josue tösaajatui cunu'cai yaawä.