¹ Poro bo, a chitía lo ke tá ri akueddo con fié insiñansa. ² Má karrusiano tén ke sé moderao, digno, sensible, fimme endi fé, gongorokó i perseveransia. ³ Má karrusiana tambié tén ke motrá asina memo kú repeto, nú jarekera. Nú tén ke tomá chochá ri bino. Tén ke insiña lo ke sendá kaiko ⁴ i insiña má mujé majanasita a kelé ri manela ke tó gende polé güatialo a birigueta sí i a mona ri elé. ⁵ Tén ke insiña asé sensible, puras, i birikueta kaiko ri possá i asé kaso a birikueta memo. Ané tén ke asé é kusa pa ke Palabra ri Rioso nú poleba sé negá. ⁶ I tambié insiñá a má ombe majanasito. A ke tén kontrol bié ri elé memo. ⁷ Endi tó kusa bo tén ke motrá kumo ejemplo ri obra kaiko; i kuandi a insiñá, motrá retto i tén dignirá. ⁸ Insiñá a má gende ri manela ke narié poleba kritiká a elé, pa ke kuakié ke tá poné endi merio sindí pondonó, pokke nú tené ná malo ke chitía ri suto. ⁹ Má eklabo tén ke sé oberiente a amo sí, a komplasé i nú epepitá kú ané, ¹⁰ nú tén jutá, ané tén ke sé fié a má amo, pa ke endi tó manela polé ndá fé ri insiñansa asekka ri Rioso salbaró ri suto memo. ¹¹ Pokke grasia ri Rioso tá motrá pa salbasió ri tó gende. ¹² Ané a insiñá a rechasá kusa ke nú tén fé i má kusa ri mundo, a bibí ri fomma retta, kú miserikordia endi é époka, ¹³ miedla a güatía pa lande pa lesibí esperansa ri suto memo kaiko, i gloria ri Rioso suto i Salbaró Jesuskristo. ¹⁴ Jesús a entregá a Elé memo pó suto pa libetá a tó suto ri tó algarete i purifiká, pa elé memo a gende ke tén reseo ri asé obra kaiko. ¹⁵ Chitía ri é kusa, saká a má gende asé i korregí kú autorirá. Nú rejá i nú pemmití ke narie tán kelé kuchá lo ke bo a chitía.