1 Un ri ma sielingó angel ke a kaggá ma basija a miní i chitiá: "Miní ku Yo pá insiñá lo ke i tan asé ku ma changaina ri kabaré kiené a sentá endi apú, 2 kien ma rey ri ma siruma abusa elé." Sendá po merio ri ma imoralirá ri seso ke ané peká". 3 Antose ma angel a kagá ma Epiritu mí endi un desierto i miná ma changaina lo ke tabá ai sentá endi un betia ku ma nombre ri ma blafemiaro. Ma betia a ten trilingó kabea ku dielingó kacho. 4 Ma changaina a ten traje ri kolo pupura ku oro ri adonno, piegra ri balo ku perla. Elé taba kaggá endi mano elé un basija repleto ri inmoralirá ri seso. 5 Endi flende elé taba ekrito un nombre ku ma sinifikao kundilo: "BABILONIA MA NGANDE, MA ME RI MA CHANGAINA RI KABARÉ I RI MA KUSA RI MA BAJO BALÓ RI MA TIELA." 6 I miná ke ma changaina a raká ku ma pola ri ma gende lo ke kree endi elé i ku ma pola ri lo ke kree endi Jesus. Kuandi i miná elé, i soprendé. 7 Poro ma angel a chitiá mí: "¿Pokke bo asustá? I tán nda enú ma sinifikao ri ma changaina ri kabaré i ri ma betia lo ke ta kaggá elé, ma betia lo ke tené ma sielingó kabea i dielingó kacho. 8 Ma bestia lo ke bo miná, a ekanforá, poro polé bobbé ri ma profundirá, ri ma posa sin fondo. Ripue elé tan bobbé a ma retrussion. Kiene ta bibí endi tiela, kiene ma nombre ri elé nú tá ekrito endi ma libro ri ma mbila renje kreasió ri ma mundo - ané tán asutá kuandi miná ma animao, ke ekanfora, poro tan bobbé. 9 Ma gende ten ke pensá ku sabiruria pa polé entendé ma kusa. Ma sielingó kabea sendá ma sielingo kolina kien ma changaina ri kabaré a sentá. 10 Ané sendá ma rey. Ma kilingó rey a kaí, uno a miní i ma uto nú miní; kuandi elé miní, elé tan kelá solo po tiembo lago. 11 Ma bestia ke kela, poro a ekanforá aora, sendá ma memo rey; pokke ele sendá uno ri ma sielingó rey, poro Rioso tán akaba ku elé. 12 Ma dielingó kacho lo enú miná sendá ma dielingó takurimbo kien nú a resibí un reino, poro ané tán angalá kutú kumo takurimbo po un tiembo jundo ku ma betia. 13 Ané sendá ri un ma mende, i ané tán tandá na poré a ma bestia. 14 Ané tán asé guerra ku ma Kodero. Poro ma Kodero tán akabá ku ané pokke Ño sendá Ño ri to ma ño i takurimbo ri ma takurimbo - i ku Éle atá lo ke elé ñama, lo ke elé kuje, i ma fiel." 15 Ma angel a chitiá mi: " Ma apu ke enú a bebé, ronde ma changaina ri kabaré a sendá, sendá ma pueblo, ri ma nasion i ri ma lengua. 16 Ma dielingó kacho ke bo miná - ané i ma bestia tan oria ma changaina ri kabare. Ané tan kita chepa ri elé, ané tan kumé kane ri elé i tan kemá elé. 17 Pokke Rioso a poné elé endi kolaso pa asé proposito elé pa ané polé ten kutu pa gobená ma bestia. 18 Memo changaina lo ke enú miná endi ma suirá ke ta gobená ma takurimbo."