¹ Pablo, apóstol ri Jesukristo pó bolutá ri Rioso i pa má sandos endi Éfeso i fié endi Kristo Jesús. ² Bugungá i pá sendá pa enú ri Rioso Pae ri suto memo i ri Ño Jesukristo. ³ Ke Rioso i Pae ri Ño Jesukristo sendá alabao, kié a bendesí kú tó bendisió epiritua endi parage selestia endi Kristo. ⁴ Rioso a kujé denje primó ri mundo, pa ke suto poleba sé sandos i sin kulpa ante ri suto nasé. ⁵ Rioso a chitía ri é tiembo pa adopsió kúmo moná a trabé ri Jesukristo, ri akueddo kú lo ke Éle a kelé. ⁶ Adopsió ri suto a resultá endi alabansa ri bugungá sí, ke Éle a ndá kú libertá endi akel ke Éle amá. ⁷ Endi Jesukristo suto a tén redensión a trabé ri pola sí i peddó ri pekaro, ri akueddo a má rikesa ri bugungá sí. ⁸ Éle ndá tó bugungá sobre suto kú tó sabiduria i entendimiendo. ⁹ Rioso asé a suto kunosé proposito ke tá kundilo ri é kusa ke Éle a kelé, ri akueddo a agrado sí, ele kúa Éle a remotrá endi Kristo, ¹⁰ güatiando endi plan endi kumplimiendo ri má tiembo, pa tree tó má é kusa jundo, tó má é kusa endi nsulú i endi tiela, bajo kabea, Kristo. ¹¹ Endi Kristo suto asendá eredero, pokke Éle a kujé a suto denje un chochá ri tiembo, ke a makanea tó ri akueddo kú fin ri asé lo ke Éle a kelé. ¹² Rioso a elegí a suto kumo eredero pa ke suto poleba sé primó ri tén eperansa ri konfiá endi Kristo, pa ke suto poleba sé pa alabansa ri ngloria sí. ¹³ Endi Kristo, enú tambié, kuandi a kuchá palabra ri belá, evangelio ri salbasió sí i kuandí a kree endi Éle i sendá seyao kú promesa ri Epiritu Sando, ¹⁴ kié sendá garantia ri erensia suto, ata ke a tomá kumpleta posesió ri ele, pa alabansa ri ngloria sí. ¹⁵ Pó é lasó, denje ke i a kuchá sobre fe endi Ño Jesús, i ri gongorokó sí pa kú tó terruño sando endi Rioso, ¹⁶ i nú a rejá ri ndá bugungá a Rioso pó enú kuandí a mensioná a enú endi orasió mí. ¹⁷ I a orá pa ke Rioso suto Ño Jesukristo, Pae ri ngloria, ndá a enú epiritu ru sabiduria i rebelasió endi kunosimiendo ri Éle. ¹⁸ I a orá pa má ojo ri kolasó sí polé sé iluminao, ke poleba kunosé eperansa a kuá Éle a yamá i má rikesa ri ngloriosa erensiia endi terruño sado ri Rioso. ¹⁹ I endi orasió mí i a pirí ke enú poleba kunosé má chochá ri kutú endi suto kiene a kreé, ri akueddo a makaneo ri chochá ri kutú. ²⁰ É sendá memo kutú ke Rioso a makanea endi Kristo, kuandí Éle a lebandá ri má muetto i a sentá kú Éle a mano rerecha endi parage selestial. ²¹ Éle a sentá a Kristo sobre tó gobierno i autorirá, kutú i dominio, i tó nombe ke sendá nombrao. Kristo a goberná é tiembo núma nú, sinú tambié endi tiembo ke a miní. ²² Rioso a poné tó kusa bajo má pié ri Kristo, i ndá a ilesia kumo kabea sobre tó má e kusa. ²³ Ilesia sendá kueppo Sí, chochá ri kutú ri Éle a yená tó endi tó.