¹ A ke libro anterio lo ke i kribí, Teófilo, taba kondá tó lo ke Jesús a komensá asé i a insiñá, ² ata ke ría ke jüe resibio pó liba. Eto jüe rí pué ke Éle a mandá rekao pó merio ri Epiritu Sando a ma apóstoles ke Éle a kujé. ³ Ripue ri akongojamiento, Éle aparesé bibo kú tó ané kú un chochá ri prueba. Pó kualingó ría Éle aparesé a tó ané, i jablá ri reino ri Rioso. ⁴ Kuandí Éle taba jundo kú ané, Éle a mandá pa nú salí ri Jerusalén, sinú ke eperá pó promesa ri Tatá, aséka ri lo ke, Éle a chitía: " Enú a kuchá ri Mí, ⁵ ke Juan endi taba jundo bautisá kú apú, poro tó enú tén ke sé bautisao endi Epiritu Sando enndi poko ría." ⁶ Kuandi ané taba reunio endi asamblea ané a prundá: "¿Ño, ete sendá tiembo lo ke bo tan restaurá reino a Israel?" ⁷ Éle a chitiá: " Nú sendá nesesario sabé tiembo ni ma etasió lo ke Tatá a rejá pa asé autorirá ri Éle. ⁸ Poro enú tán resibí kutú, kuandi Epiritu Sando miní andi tó enú, i tó enú tén ke sé perito mí endi Jerusalén kú tó Judea kú samariai tó tiela." ⁹ Kuandi Ño Jesús a chitiá e kusa, miendla tó ané taba miná pa nsulú, Éle jüe lebandao po liba i ma nube a kundilo ri ojo ri ané. ¹⁰ Miendla ané taba miná pa nsulú kuandi Éle a bae ri repende, bilingó ri ombe taba pasá jundo ané kú bitilo blanko. ¹¹ Ané a chitiá: " Enú, ombe ri Galilea, ¿pokké enú tá palao akí minando endi nsulú? Ete sendá Jesús lo ke bae pa nsulú tén ke bobbé asina memo kumo enú a minalo bae ande nsulú." ¹² Antose ané a bobbé pa Jerusalén reje monde ri Olibos, ke tá sekka ri Jerusalén, jonná ri ría lonkoló. ¹³ Kuandi ané a yegá, ané a subí endi posá aliba, andi ané taba kelá. Ané sendá Pedro, Juan Jakobo, Andrés, Felipe, Tomás, Bartolomé, Mateo, Jakobo moná ri Alfeo, Simón ele Selote kú Judas moná ri Jakobo. ¹⁴ Tó ané taba jundo kumo lingó, miendla ané a siguí endi orasió. i má changaina jundo ané, María mae ri Jesús kú m´s numano ri ané. ¹⁵ Endi a ke ría Pedro a palá endi merio ri numano ele, sekka ri lingónana bilingó jende i a chitiá. ¹⁶ Numano, tén ke se nesesario kumplimiendo ri Ekritura, lo ke Epiritu Sando jablá po boka ri David ri Judas , kiene jüe lo ke a güiá a Jesús pa ané agalalo. ¹⁷ Éle jüe lingó ri suto i a kujé patte ri benefisio ri e ministerio." ¹⁸ (Aora e ombe a komblá un ticla kú ganansia ke éle resibi ri madá ri éle, repué éle a kaé ri kabea i kueppo ri éle a lompé i tó má entraña a regá pó suelo. ¹⁹ Tó ané lo ke tá bibí endi Jerusalén a kuchá ri eto, asina ke ané a ñamá a ke kampo endi lengua ri éle "Aséldama," é jüe, "kampo ri pola.) ²⁰ "Pokke tá ekrito endi libro ri Salmos: ' KE TIELA SÍ KELÁ SOLO NÚMA, I NÚ REJÁ KE NIGGÚ JENDE KELÁ A BIBÍ AÍ.' ' KE UTO JENDE KUJÉ PUETO RI ÉLE. ²¹ É nesesario, ke lingó ombe ke akompañá jundo kú suto to tiembo kuandi Ño Jesús taba kú suto, ²² kumensando reje bautimo ri Juan ata ría ke Éle jüe yebao ri suto pó liba, tén ke sé perito ku suto ri resuresió." ²³ Ané a poné ri lande ri bilingó ombe, José, ke sé ñamao Barsabás, kiene jüe ñamao justo kú Matías. ²⁴ Ané a orá i a jablá: "Bo, Ño, kunosé tó má kolasó ri tó má jende, asina ke motra suto kúa ri ané bilingó bo a kujé ²⁵ pa kujé puetto ri ministerio kú apostolado ri kúa Judas a rejá pa bae pa paraje memo ri éle." ²⁶ Ané a ichá suete sobre ané memo; i suete a kae endi Matías i éle jüe pueto kú onlingó apostoles.