¹ Asina ke a resirí ke i bobbé ma nú po kausa ri doló. ² Si a kausá doló, ¿Kien polé alegrá mí, si nú sendá kiene jirí mí? ³ I ekribí kumo i aselo, pa kuandi miní andi enú, nu rejá latima po kiene lo ke ten ke akongojá. I ta konfiá ke enú ten memo goso ke i tené. ⁴ Pokke i ekribí enú ku aflisió, i ku aggutia endi kolaso, i ku chochá ri lagrima. I kelaba kausa enú doló. Po kontrario, i kelé ke enú kunosé gongoroko i tené pa to enú. ⁵ Si aggien a kausa doló, éle asé kusa a mi numá nú, si nú ke endi aggun merira, pa nu chitiá ku remasió kutu, tambié a to enú. ⁶ Ma penitensia po mayoria ri enú sendá juto. ⁷ Asina ke aora, endi luga ri penirensia, enú ten ke peddoná éle i kosonlá. Asé e kusa ri fomma pa éle nú abrumá ku tritesa. ^{8 9} Asina ke i ta inbitá pa ke aí publiko enú motrá gongoroko po éle. É sendá lason po lo ke i ekribí, pa i polé probá a to enú i polé sabé si enú ta oberesé endi to momendo. ¹⁰ Sí peddoná aggún, I peddoná é pesona tambié. Lo ke i peddoná, i a peddoná kuakié kusa, eto sendá po gongoroko a enú po merio ri presensia ri Kristo. Eto sendá pa ke rianche nú engañá suto. ¹¹ Pokke suto su sendá inorante ri ma plan ri Éle. ¹² Un puetta abrí pa mí po merio ri Ño kuandi i miní a ma suirá ri Troas pa prerika ebagenlio ri Kristo. ¹³ Asina, i tené trankilirá ri mende nú, pokke i kondlá numano mí Tito nú. Asina ke i rejá ma risipulo pa i bobbé aí Masedonia. ¹⁴ Poro po nglasia ri Rioso, kiene endi Kristo tan yebá suto pa futuro. Po merio ri suto éle aá regá aroma nduse ri sabiruria Éle po to pate. ¹⁵ Pokke suto sendá pa Rioso aroma nduse ri Kristo, kumo lo ke a sabbá, kumo kiene lo ke peresé. ¹⁶ Pa ma jende lo ke perese, aroma senda kumo aroma ri muete. Pa kiene lo ke salbá, sendá kumo aroma ri mbila. ¿Kien merese a ke kusa? ¹⁷ Pokke suto nú sendá kumo ma jende lo ke se bendé palabra ri Rioso. Endi lugá éle, ku puresa, suto se kombesá ri Kristo, asina kumo suto sendá chakero ri Rioso, ri lande Éle.