¹ Pablo, ñamao po Kristo Jesus pá kombetí endi apostol po merio ri Bolundá ri Rioso i ku Sostenes numano suto, ² a ma ilesia ri Rioso endi Korinto, kiene a resibí ñamao pa bobbé sando. Tambié suto tá ekribí a kién asé tá nombrá Jesukristo, seño ri ané i suto. ³ Ke ma nglasia i ma pa ri tatá suto i ma pa ri Ño Jesukristo kelá ku to enú. ⁴ Siemple I tán da nglasia a Rioso mí pá to enú, po merio ri kausa ri nglasia ke Kristo Jesus andá enú. ⁵ Elé a bobbé enú galipotano ri to ma fomma, endi to ma palabra i endi to ma konosimiendo, ⁶ asina kumo ma tetimonio ri Kristo a konfimá po merio ri enú. ⁷ Po tando enú polebá fatá ningun don endi epiritu, miendla enú eperá ma bisió ri Ño Jesukristo. ⁸ Elé tambié tán sotené a enú atá akaba, pá ke asina enú kaggá kupa endi ria ri Ño Jesukristo. ⁹ Rioso sendá fié, kiene a ñamá a enú pa chitiá ku moná ri Elé, Jesukristo Ño suto. ¹⁰ Aora I tán animá enú, numano, po merio ri Ño Jesukristo, poné ri akuedo, pá nú abe ribisió. Enú tén ke aprendé a miná ma kusa ri memo fomma i ku memo meta. ¹¹ Pokke a kelá mí klaro, numano mí, po merio ri Gende ri Kloé ke abe ribiosió lendro ri enú. ¹² Eto kelé resí: To enú tá chitiá: "I tá ku Pablo", o "I tá ku Apolo", o "I tá ku Sefas", o "I tá ku Kristo". ¹³ ¿Atá Kristo Ribirió?¿Gue Pablo Krusifikao po enú? ¿Enú gue bautisao po merio ri nombe ri Pablo? ¹⁴ I tán nglasia a Rioso pá nú bautisá ninggun ri enú, numá a Krispo ku Gayo. ¹⁵ Eto sendá pá ke narie polé chitiá ke ané gue bautisao endi nombe ri elé. ¹⁶ (Tambié I bautisá famia ri Estefano. Ma jaya ri eso, I kolá nú ri ma bautiso.) ¹⁷ Pokke Kristo nú mandá mí pá bautisá, sendá pá preriká ebangelio. Elé nú mandá mí pá preriká palabra ri sabiruria ri gende, pá ke ma kru ri Kristo nú basiá ri kutú. ¹⁸ Pokke mensaje ri Kru sendá neserá pa kiene lo ke pelé. Poro kiene Rioso a sabbá, endi kutú ri Rioso. ¹⁹ Elé kribí eto: "I TÁN RETRUÍ MA SABIRURIA RI MA SABIO; I TÁN RETRUÍ SABIRURIA RI MA INTELIGENDE". ²⁰ ¿Ronde atá ma sabio?¿Ronde atá ma etulé? ¿Ronde atá kiené tá rebatí endi mundo? ¿ Rioso nú kombetí ma sabiruria ri mundo endi neserá? ²¹ Ya ke ma mundo endi sabiruria nú konose Rioso, I tán da nglasia Rioso po merio ri lokura pá preriká kiene lo ke kreé. ²² Pokke ma judio tá pirí milagro i ma griego tán buká sabiruriá. ²³ Poro suto preriká a Kristo Krusifikao, un piedra ri tropieso pá ma judio i ma neserá pá ma griegos. ²⁴ Poro kiene lo ke Rioso ñamá, kumo ma jurio i ma griego, Kristo sendá ma kutú i ma sabiruriá ri Riso. ²⁵ Pokke ma sabiruria ri Rioso sendá ma sabiá ke ma sabiruriá ri ma gende, I ma rebilirá ri Rioso tén ma kutú ke ma gende. ²⁶ Miná ñamao, numano. Chocha ri enú sendá sabio nú. Chocha ri enú tén kutú na nú. Chocha ri enú sendá ri nasimiendo noble nú. ²⁷ Poro Rioso a kujé ma neserá ri mundo pá abegonsá ma sabio. Rioso a kujé lo ke sendá rebil endi mundo pa abegonsá lo ke tén kutú. ²⁸ Rioso a kujé lo ke sendá ri bajo baló endi mundo. A kujé ma kusa ke balé na nú, pá anulá ma kusa ke sendá ri balo. ²⁹ Elé asé é ma kusa pá ke narie yená ri Elé. ³⁰ Po merio ri lo ke Rioso asé, aora enú sendá ri Kristo Jesus, kién a miní pá kombetí endi sabiruriá ri Rioso. Elé a miní pá sendá jutisia suto, santirá ku resitensia. ³¹ Kumo resultao, kumo tá ekrito endi Ekritura: "KIENE LO KE YENÁ, YENÁ ENDI RIOSO".