¹ O ba sa kilatia vina du, na taciau na vatilem laka ya a tam tawa yaga. ² O ba kilatia na vikwa a ba sotaqaya rewa mai, qa na kwa vamaduwa a ba sotavia mai Filipai. A ba vakata ga no vua na vatilem Kalou me leikwai va vatikem na i tukutuku vina ni Kalou ni ba vimulomulo no. ³ Na vatilemam vamamasu tam nia me cala se dukaduka se lawakitaki. ⁴ Ia, me wetai a ba sa vadonui mai vua na Kalou me ba lai nuitaki i na kosiveli, a ba ma tata. A ba tata, lala me dokai ka na tamata , me dokai ka na Kalou. O koya ga i ilovia me da uto. ⁵ A ba tam vayagatakinia na tata mo ba lei rewati ka i ba kilatia no se a lia na i ulubale me ubia na kocokoco na Kalou e i vatilemam vadudu. ⁶ Me ba lei dokai ka mai vuara na tamata ,se o vatikem se mai vuara leqwa i sewa. A ba rewa ni kwaya doudou ni ba avositolo i Karisito. ⁷ So kwe a ba yalovina i vatimem vibutoyaki me wetai e i lia na mnani driadria e iva mariqetinia na luvea. ⁸ I na calevu kwe ba sa yalovina i va vatikem. Ba sa vavinavina ni ba wase va vatikem tam tia kosiveli ni Kalou boto i a na ledra cola muni. O ba sa lei gadretaki sara i va vatikemam. ⁹ Ba numia taciau qa na siga ba cakacaka me kua ni lei dani civo i ra lia va vatikemna kosiveli ni Kalou. ¹⁰ Ba tia i vadudu , vua na Kalou muni na kea savasava dodonu qa lala na cala i na vatiemam i vakarau va vatikem na vakabauti koya. ¹¹ Na calevu ga sokwe ba kilatia na vatilemam tara vatikem yalia wetai i tara na vava i va luvea. ¹² A ba kerevi vatikem , uqeti vatikem qa ba usuraki ni vatikem mo ba laka i na calevu e i qiroi ka na Kalou ko a coviko i na lea matanitu qa na lea lagilagi. ¹³ I na kwa kwe, sa tam cibuta ka vavinavina vua na Kalou. Ni o ba sa sovia na i tukutuku ni Kalou ba rogo ba vakaio ka ni tam tia tata ni tamata. Oti ba sovia me wetai du na tata ni Kalou. Ko na tata ga kwe, ko i yavavala no i vatimem vibutoyaki vatikem na vakabauti koya. ¹⁴ Vatikem o taciau qa mo ba tia i vakatakilakila ni Lotu ni Kalou ma i Jiutia i va Karisito Jisu. Ni o ba sotaqaya muni na vikwa tautauvata kwe mai vuara o ba koi vata, mai vuara na Jiu. ¹⁵ O kora na Jiu a re vamateru ruarua na Momo o Jisu qai kora na Varovita . Ko ra ga na Jiu a re karavi kemam dei. Re tam doka na Kalou I a re valavala kaikai vuara na tamata . ¹⁶ Re tam vatara me ba tata vuara na tamata teni me rewa ni re vacolai. Na kea i soqoni e re na koronia cake ga no ledra i valavala ca. Ia na borisi ni Kalou i na dalara me kedra i tinitini. ¹⁷ Vatikemam taciau qa ba lei kwali dei mai vatikem vakalekeleke, vakayago tam vakayalo, ba vinatia me ba dania vatimem mata. ¹⁸ A ba vinatia me ba laka yati-O au, o Vaula qu mata laka yati a vakalia qa vakarua-o Setani a tarovi vatikemam. ¹⁹ Se na yava re na vatilemam i nuinui, sei vuni gadre se i sala ni vilaveti i e mata na leda Momo o Jisu ina lea laka mai? Tam ni vatikem se i sewa leqwa . ²⁰ O ke-m saraga na vatilem vu ni lagilagi qa na gadre.