¹ Ia ni sa raici ira a lewe vuqa ko Jisu, sa cabe cake kina ulunivanua: ia ni se jiko sobu, a sa lako mai vua a ona tisaipeli. ² A sa vosa ko kea ka vakatavulici ira, ka kaya," ³ Sa kalougata ko ira sa yalomalumalumu, ni na odra a matanitu vakalomalagi. ⁴ Sa kalougata ko ira sa dautagi; ni ra na vakacegui. ⁵ Sa kalougata ko ira sa yalomalua, ni ra na taukena a vanua. ⁶ Sa kalougata ko ira sa via kania ka via gunuma ai valavala dodonu, ni ra na vakamamautakini. ⁷ Sa kalougata ko ira na dauloloma ni ra na lomani. ⁸ Sa kalougata ko ira sa yalosavasava ni ra na raica a Kalou. ⁹ Sa kalougata ko ira a dautataro ni ra na vakatokai mena luve ni Kalou. ¹⁰ Sa kalougata ko ira sa vakacacani ena vuku ni valavala dodonu ni sa odra a matanitu vakalomalagi. ¹¹ Dou sa kalougata ni dou sa vakasewasewani, ka vakacacani ena vuku ni Yacaqu ka vosa vakacacatakini vakailasu, ena ka kecega e ca ena vukuqu: ¹² Dou reki ka marau vakalevu ni sa lev u sara a kena i sau vei kemudou mai lomalagi: ni sa vaka i ei a odra vakacacani ira a parofita era a bula eliu vei kemudou. ¹³ Oi kemudou a masima kei vuravura, ia kevaka sa seavu a kena tuituina, ena qai vakatuituinatakini tale ena cava? Sa qai ta yaga rawa ena dua a meca, me biu ga ki tautuba ka me butuki sobu ko ira a tamata. ¹⁴ O kemudou a rarama kei vuravura, na koro sa tara toka ena ulunivanua sa tawa tabonakini rawa. ¹⁵ Sa tawa tutuvakini a cina, ka me qai toka ena i vakarau sila ena kenai tutu ga, sa qai cinavi, ira kecega sa jiko e vale. ¹⁶ Me qai caudra talega vakakina a omudou rarama kina matadra a tamata, me ra kunea a omudou i valavala vinaka, ka vakarokorokotakina a Tamamudou sa jiko mai Lomalagi. ¹⁷ Dou kakua ni vakasamatakina niu sa lako mai meu vakaojia ai vunau, se na odra i vakavuvuli a parofita: Au sa tawa lako mai meu vakaojia, meu vakayacora ga. ¹⁸ Niu sa kaya vakaijina vei kemudou, ena takali mada ko Lomalagi kei vuravura, ia ena tawa takali rawa qai vunau se dua a matanivola lailai, se dua a jikina lailai sara, ena yaco mada kecega. ¹⁹ Koya i ei ena vakatokai kina me lailai sara ena matanitu vakalomalagi, ko koya yadua ena talaidredre vakalomalagi, ko koya yadua ena talaidredre kina dua a i vunau i ei sa lailai sara, ka vakatavuvuli vakakina vei ira a tamata, ia ko koya ena vakabauta ka vakatavuvulitakina ena vakatokai me levu ena matanitu vakalomalagi. ²⁰ Niu sa kaya vei kemudou, kevaka sa sega ni uasivi cake a omudou i valavala dodonu ena odra a vunivola kei ira a Farisi, dou sa tawa curu ki na matanitu vakalomalagi. ²¹ Dou rogoca ni sa tukuni vei ira a mada, mo kakua ni laba: ia ko koya ena laba, ena cudruvi kea a mataveilewai. ²² ia koi au, kau sa kaya vei kemudou, o koya yadua sa cudru walega vua a wekana, ena cudruvi koya a mataveilewai, ia ko koya ena vosavakacacatakina a wekana, ni sa beitakina me ca, ena cudruvi koya a mataveilewai levu; Ia ko koya ena rurulialiatakini koya, ena cudruvi ena bukawaqa mai eli. ²³ O Koya, kevaka ko sa kauta a omui madrali kina i cabocabo ni soro, a sa nanuma mai kina na ka sa beitakina a wekana; ²⁴ Biuta tu a omui madrali kina i cabocabo ni soro, ka mo drau laki veivinakaji mada i mada kei na wekamu. Mo qai lako mai ka vakacabora a omui madrali. ²⁵ Kusarawa mo drau veivinakati kaya sa beitakini iko, ni drau sa laki wakolo, de soli iko ko koya ka beitakini iko vua a turaga ni lewa, ka soli iko ina turaga ni lewa vua a ovisa, ko na qai biu kina valeniveivesu. ²⁶ Au sa kaya vakaijina vei iko, ko na ta sereki mai kina, ko na sauma kece mada a i lavo. ²⁷ Dou sa rogoca sa kainaki vei ira i mada, mo kakua ni dau yalewa. ²⁸ Ia koi au, kau sa kaya vei kemudou a okoya yadua ena raica a yalewa me dodomo kina, sa dauyalewa oji kaya e lomana. ²⁹ Ia kevaka sa vakacalai iko a matamu i matau, vecuka tani ka biuta tani vei iko: Ni sa vinaka vei iko, me yali laivi e dua a jikimu ka me kakua ni biu ki eli a yagomu taucoko. ³⁰ Ia kevaka sa vakacalai iko a ligamu i matau, muduka laivi, ka biuta tani vei iko, ni sa vinaka vei iko me yali laivi e dua a jikimu ka me kakua ni niu ki eli a yagomu. ³¹ Sa kainaki talega, ko koya sa biuta yani a wajina, me solia vua a i vola ni veibiu. ³² Ia koi au kau sa kaya vei kemudou, ko koya sa biuta a wajina, ka sa tawa dautagane, sa vakavuna a ona dautagane, ia ko koya a rau sa veiwajini kaya sa biu sa dauyalewa. ³³ Dou a rogoca talega, ni sa kainaka vei ira e mada, mo kakua ni bubului vakailasulasu, ia mo vakayacora vua a Turaga a ka ko sa bubului kina. ³⁴ Ia koi au, kau sa kaya vei kemudou, dou kakua sara ni bubului, kakua ki lomalagi, ni sai tikotiko vakaturaga ni Kalou. ³⁵ Kakua ki vuravura ni sai tutu ni yavana, kakua ki Jerusalemi ni sa ona koro a tui levu. ³⁶ Mo kakua ni bubului ki ulumu, ni ko sa ta vukica rawa e dua a drauniulumu me vulavula se loaloa. ³⁷ Ia me io na io, ka sega na sega ina omudou vosa. Ia na ka sa levu cake sa tubu ena ca. ³⁸ Dou sa rogoca ni sa kainaki me kenai sau ni mata a mata, ia me kenai sau ni bati a bati. ³⁹ Ia koi au, kau sa kaya vei kemudou, dou kakua ni veisausamitakina a ca; ia kevaka e dua sa sabica a balumu i matau, golea talega vua a kenai karua. ⁴⁰ Ia kevaka e dua sa via kauji iko kina mataveilewai, ka me kauta tani a omui curucuru, laiva ga me kauta tani talega a omu i tutuvi. ⁴¹ Ia kevaka e dua sa vakasauraratakini iko mo drau lako vata ena dua a maile, lako vata kaya ena kenai karua. ⁴² Solia vua sa mai kerekere vei iko, kakua ni ko vuki tani vua sa via kerea mada e dua a omu ka. ⁴³ Dou rogoca sa kainaki, mo lomana a wekamu, ka cata a omu meca: ⁴⁴ Ia koi au sa kaya vei kemudou, dou lomani ira a omudou meca, vosa vinaka vei ira sa rukakini kemudou, caka vinaka vei ira sa cati kemudou, ka masulakini ira sa vakalialiani kemudou, ka vakacacani kemudou. ⁴⁵ Mo dou luvena a Tamamudou sa tiko mai lomalagi: Ni sa vakacabea ko koya a ona matanisiga vei ira a tamata pia, kei ira a tamata vinaka. a sa vakatauca mai a lagi vei ira a tamata yalododonu kei ira a tamata tawa yalododonu. ⁴⁶ ia kevaka dou sa lomani ira sa lomani kemudou a cava ena kemudou i sau? Era tawa li ni valata vakai ko ira sa dau kumuna ai vakacavacava? ⁴⁷ Ia kevaka dou kidavakini ira a wekamudou, ka cava dou sa uasivi cake kina? E tawa li ni valata vakaoqo ko ira a lewe ni matanitu tani? ⁴⁸ O koya mo dou qai vinaka sara, me vaka sa vinaka sara a Tamamudou sa tiko mai Lomalagi.