¹ A sa curu yani ko Jisu ka lako tani kina vale ni soro. A ra sa lako mai a ona tisaipeli mera kaya vei kea a veivale ena vale ni soro. A sa kaya vei ira ko Jisu, "Dou sa raica a meca taucoko i? ² Au sa kaya vakaijina vei kemudou, "Ena cau dua meca ena vo tu i ai na veivatu sa vecevacevani, ena talaraki sobu taucoko ga." ³ Ia ni sa jiko ko kea mai na ulunivanua ni veiolive, sa ratou lako vunivuni yani ko iratou a tisaipeli, ka kaya, "Ni tukuna kaya vei keitou, sa na yaco ni naica a veika ai? Ia ka cava nai vakatakilakila ni omudou lako mai, kei na i vakataojioji kei vuravura? ⁴ A sa vosa ko Jisu, ka kaya vei ira, "Qarauni kemudou vinaka de vakacalai kemudou e dua. ⁵ Ni ra na lewe levu era na lako mai ka kai au, ka kaya. 'Oi au na Karisito,' ia ka lewe levu era na vakacalai. ⁶ Ia dou na rogoca nai valu, kei nai rogorogo ni valu, mo dou kakua ni kidroa, ni sa kilikili me yaco a meca ia. Ia ka sa bera ga nai vakataotioti. ⁷ Na veibolebolei na veivanua eso, kei na veimatanitu eso, ena yaco talega na dausiga kei na tavuki ni vanua ena yasana e vuqa. ⁸ Ia na ka kecega oqo sa kenai vakatekivu ni ka rarawa. ⁹ Dou na qai soli yani me vakararawataki, ka dou na vakamatei. Ia dou na caji vei ira na lewe ni vanua kecega ena vuku ni yacaqu. ¹⁰ Ia ena lewe levu era na qai tarabe, a ra na veisoliyaki ka veicaji. ¹¹ Ena lewe levu talega mai ko ira profita daidai ena tubu cake mai, ia ka lewe levu era na vakacalai. ¹² Ia ni sa tubu vakalevu mai nai valavala ca, ena batabata mai a odra loloma na lewe vuqa. ¹³ Ia kena ga ena vosota me yacova nai vakataojioji, ena vakabulai ko kea. ¹⁴ Ia ena vunautaki mada e vuravura taucoko nai tukutuku vinaka oqo kei na matanitu, mei vakajinajina ki na veivanua taucoko, sa na qai yaco emuri nai vakataojioji. ¹⁵ "Ia dou sa raica sa tu ena vale tubu na ka vakasisilia sa dau veivakarusai, o koya sa vosa kina ko Taniela na profita" ( Me kila mada kena sa wilika), ¹⁶ "me qai lako ki na veiulu-ni-vanua ko ira era sa tiko e Jutia, ¹⁷ me kakua ni lako sobu a kena sa jiko e delanivale me kauti tani a ka mai na ona vale, ¹⁸ me kakua ni lesu tale a kena sa jiko ena were, me kauta na onai sulu. ¹⁹ Ka na ca vei ira era sa bukete, kei ira era sa vakasucuma na gone, ena gauna ya. ²⁰ Ia dou masu me kakua ni yaco ena vula i liliwa, se na siga ni vakacegu. ²¹ Ni na qai levu sara na rarawa, ka sega ni vakakina eliu mai na vakatekivu kei vuravura ka yacova na gauna oqo, ka na sega sara talega e muki. ²² Ia kevaka ena sega ni vakalekalekataki na gauna ya ena sega na tamata e bula rawa, ia ena vukudra na digitaki, ena vakalekalekataki na gauna ya. ²³ Kevaka ena qai kaya vei kemudou e dua, 'Raica sa jiko eke na Karisito, se sa jiko mai kea, kakua ni vakajinajina. ²⁴ Ni na tubu mai na Karisito daidai eso, kei na profita lapulapu eso, a ra na vakatakila na veivakatakilakila lelevu kei na veika e veivakurabuitaki, ia ke rawa, ke ra na vakacalai ira talega na digitaki. ²⁵ Raica, au sa qai kaya oti vei kemudou ni sa bera ni yaco. ²⁶ Kevaka era sa kaya vei kemudou, 'Raica, sa jiko ko kea mai lekutu, kakua ni lako kina, raica sa jiko mai loqi, kakua ni vakajinajina. ²⁷ Me vaka sa jibi na livaliva mai na tu i cake, ka sa rairai yani ki ra, ena vaka talega kina na ona lako mai na Luve ni Tamata. ²⁸ Ni ra na soqoni vata na ikeli ki na yasana kece sa koto kina yago. ²⁹ Ia ni sa oji mada na gauna rarawa ya, ena qai vakabutobutotaki vakasauri na mata ni siga, ena sega talega ni cila na rarama ni vula, ka lutu mai lomalagi na veikalokalo, ka na veitosoyaki na veika kaukauwa ni lomalagi ³⁰ Ena qai rarai mai na vakatakilakila ni Luve ni Tamata mai lomalagi ena qai tagi na mataqali vakaaduaga e vuravura, era na qai raica na Luve ni Tamata, ni sa lako mai ena vei o mai lomalagi, ena kaukauwa kei nai ukuuku levu. ³¹ Ia ena yavai ira ona agilosi ko koya kei na davui sa rogolevu ka ra na vakasoqoni ira vata na ona Jigitaki mai na mata ni cagi e va, mai na vu ni lomalagi e dua ka yacova na vuni lomalagi ka dua. ³² Mo dou kila mada na vosa vakatautauvata ena lolo. Ni sa qai la vouvou na tabana, a sa tubu na drauna, dou sa kila kina, sa voleka na vula i katakata. ³³ Sa vaka talega kina koi kemudou, ni dou raica na ka kecega oqo dou kila sa voleka ko kea, io mai na mata ni katuba. ³⁴ Au sa kaya vakajina vei kemudou, ena sega ni takali mada nai tabatamata oqo, ena yaco i mada a meca taucoko i ai. ³⁵ Ena yali ko lomalagi kei vuravura, ia a qou vosa ena sega ni yali. ³⁶ Ia na siga kai ya kei na tiki ni siga kai ya sa sega ni dua e kila, ko ira mada ga agilosi mai lomalagi era cau kila, a Luvena mada ga, ko tamaqu duadua ga. ³⁷ Ia me vaka na siga i Noa, ena vaka talega kina a ona lako mai na Luve ni Tamata. ³⁸ Ni sa bera na waluvu, era kana na tamata ka gunu, ka vakawati, ka veimusumusuki mera vakawati, ka yacova na siga sa vodo kina ki waqa ko Noa. ³⁹ A ra sa sega mada ni kila e liu, a sa qai yaco dina na waluvu, ka kauti ira kece yani, ena vaka talega kina, na ona lesu mai na Luve ni Tamata ⁴⁰ Ena qai lewe rua na tagane, e rua na jiko ena were, ena kau tani e dua, ka biu tu edua. ⁴¹ Ena lewe rua ena qaqai sila, ena kau tani e dua ka biu e dua. ⁴² O koya mo dou qai vakatawa, ni dou sa sega ni kila na jiki ni siga sa lako mai kina na omudou Turaga. ⁴³ Ia dou kila ga oqo, kevaka ga e kila nai taukei ni vale na tiki ni bogi e lako mai kina na daubutako, sa vakatawa ga, ka sega ni biuta na ona vale mera basurakina. ⁴⁴ O koya mo dou qai vakarautu, koi kemudou talega, ni sa lako mai na Luve ni Tamata ena Jiki ni siga, dou sa sega ni nanuma kina. ⁴⁵ Ia ko cei na tamata yalododonu ka vuku, sa lesia na ona Turaga me lewai ira na ona lewe ni vale, me solia vei ira na kedra ena gauna dodonu? ⁴⁶ Sa kalougata na tamata koya, ni na lako mai a ona Turaga ka raici kea ni sa valata vakakina. ⁴⁷ Au sa kaya vakaijina vei kemudou, ena lesi kea me lewa ona ka taucoko. ⁴⁸ Ia kevaka ena kaya e lomana na tamata ca koya, sa vakaberaberataka a ona lako mai a qou Turaga. ⁴⁹ A sa vakatekivu kina me yaviti ira na ona tokani, me daukana talega ka daugunu vata kei ira na daumateni. ⁵⁰ Ena lako mai na Turaga ni tamata koya ena siga e sega ni numa kina, kei na tiki ni siga e kila kina. ⁵¹ Ena qai varomusuka rua, ka vota vei kea mei votavota vata kei ira na dauveivakaisini, ena dautagi kina ka vakasequruquru baji