¹ Era lewe levu era a valata mai a cakacakani kena a biu vata ai tukutuku ni veika sa vakataucoko taki oji. ² Me vaka saraga era a vakadewatakina mai vei keta ko ira era a mada mai nai vakajinajina kei nai talai ni vosa. ³ Me vaka sa yaga talega vei au ko Ceofilo baleta niu sa jikeva vakavinaka sara a meca taucoko mai mada me rawa niu vola yani ai iei vei iko. ⁴ Me rawa kina vei iko mo kila a jina ni meca ko sa vakatavulici kina. ⁵ Ena gauna i Eroti a tui Jiutia, a sa dua a bete ko Sakaraia a yacana mai na wasewase i Apaia a wajina a luvei Eroni ko Ilisapeci a yacana. ⁶ A rau sa dodonu ruarua mai nai vunau kei na onai valavala ka tawa cala. ⁷ A rau sa sega ni vakaluveni ni sa yava ko Ilisapeci ka rau sa qase ruarua. ¹⁸ A sa kaya vua a agilosi ko Sakaraia, au na kila vakai vei a meca i ei? Ni keirau sa qase ruarua vakaveiwajini. ¹⁹ A sa vosa a agilosi ka kaya vua; Koi au ko Keperieli kau sa dau tu ena mata ni Kalou. Au sa talai mai vei iko meu kauta mai ai tukutuku vinaka i ei. ²⁰ Raica ko na galu ka tawa vosa rawa me yacova a siga ena vala kina a meca ka i ei. Niko sa sega ni vakajinata a qou vosa ena vala ga ena kena gauna. ²⁴ Ni sa oji a veisiga iei sa bukete ko Ilisapeci, ka vunitakini koya ka vula lima. ²⁵ Ni sai koya iei a meca sa valata a Turaga vei au ni sa lomani au ka sa kauta tani a qou madua I matadra a tamata. ²⁶ E nai ka ono ni vula, sa talai mai ko Kapirieli mai vua a Kalou ki Kalili ki na koro ko Nasireci. ²⁷ Vua a goneyalewa ko Meri a yacana sa veivosaki vei Josefa na luve i Tevita me wajina. ²⁸ A sa lako mai vua ko koya, sa loloma ko iko sa dau lomani sa jiko vei iko a Turaga; ko sa kalougata vakalevu vei ira a lewa tani. ²⁹ Ia ko koya sa rideu ina ona vosa, a sa vakananuma e lomana se vakabeka ivei a veikidavaki iei. ³⁰ A sa vosa a agilosi ka kaya vei Meri, Mo kakua ni rere, ni ko sa kune loloma vua Kalou. ³¹ Raica ko na kunekune ka vakasucuma e dua a gonetagane mo vakayacani koya ko Jisu. ³² Ena levu ko koya ka vakatokai a Luve i koya sa Cecere Sara, na Turaga a Kalou na solia vua a tikotiko vakaturaga i Tevita. ³³ Ia ina lewa ko koya a mataqali i Jekope: Ina sega talega ni oji a ona matanitu. ³⁴ A kaya vua a agilosi ko Meri, Ina yaco vakaivei a meca iei niu se sega mada ga ni veiyacovi kei na dua a tagane? ³⁵ A sa vosa a agilosi ka kaya vua, "Ina lako mai vei iko a Yalo Tabu ka na vakarurugi iko a kaukauwa i koya sa cecere sara, o koya ina sucu mai vei iko ina vakatokai me ka tabu a Luve ni Kalou. ³⁶ Raica a wekamu ko Ilisapeci sa kunekunetaka talega e dua a gone tagane ni sa qase mai, o koya e vakalekai me yava. ³⁷ Ni sa sega bau a meca me dredre vua Kalou. ³⁸ A sa kaya ko Meri, Raica a vada ni Turaga, me vala ga me vaka a omu i tukutuku, a sa buiji koya a agilosi ka lako yani. ³⁹ A sa tucake ka lako yani vakatotolo ki colo kina dua a koro ni Jiutia. ⁴⁰ A sa curu kina vale i Sakaraia ka kidavakini Ilisapeci. ⁴¹ Ia ni sa rogoca ko Ilisapeci na vosa ni ona veikidavaki ko Meri, sa rika a gone i ketena, a sa vakasinaiti ko Ilisapeci ina Yalo Tabu. ⁴² A sa tabalaka cake a domona ko koya, ka kaya, "Ko sa kalougata vakalevu vei ira a yalewa tani, a sa kalougata a vua ni ketemu. ⁴³ A sa vakaivei a ka iei vei au ni sa lako mai vei au a jinana a qou Turaga. ⁴⁴ Ka raica ni sa rorogo ki daligaqu a domo ni omu veikidavaki, sa lade ina reki a gone i ketequ. ⁴⁵ Sa kalougata ko koya sa vakajinata a meca e kaya vua a Turaga ni na vakayacori." ⁴⁶ A sa kaya ko Meri, "Na yaloqu esa vakavinavinakatakina a Turaga, ⁴⁷ ia a yaloqu sa rekitakina a Kalou a qou i vakabula. ⁴⁸ Kemunu sa raica a omuni vada ni sa dravudravua. Ka raica ina gauna iei ina kaya ai tabatamata kecega niu sa kalougata. ⁴⁹ O koya sa kaukauwa sa valata a meca levu vei au ka vakatokai a yacana ko yalosavasava. ⁵⁰ Na nona yalololoma e yacova yani ai tabatamata kecega vei ira era rerevakini koya. ⁵¹ Sa kaukauwa a cakacaka ni ligana: A sa dui vakaseisei ira a viavialevu ina vuku ni nanuma ni lomadra. ⁵² A sa viritakini ira sobu kei ira a raluve mai na odrai jikojiko, ka sa vakalevulevui ira sa lalai. ⁵³ A sa vakamaumautakini ira a viakana ina veika vinaka, ia vei ira a vutuniyau sa vakauji ira laivi tani. ⁵⁴ A sa vukei ira a ona tamata a Isireli ka sa nanuma me vakaraitakina vua a ona loloma. ⁵⁵ Me vaka ea kaya vei a weta qase, vei Eparama kei ira a ona kawa ka tawa mudu. ⁵⁶ A sa jiko ko Meri vei Ilisapeci ka vula tolu, sa qai lesu tale ki ona vale. ⁵⁷ A sa yaco a gauna me sa vakasucu kina ko Ilisapeci ka vakasucuma e dua a luvena tagane. ⁵⁸ Ara sa rogoca ko ira era jiko volekaji koya kei ira a wekana ni Turaga e sa lomani koya vakalevu, a ra sa reki vata kei koya. ⁵⁹ E nai kawalu ni siga era sa kauta mai a gone me mai cilivi. ⁶⁰ Era a vakayaci koya ko Sakaraia ka me rau veiyacani kei tamana. Ia sa kaya ko jinana, me kakua. Ina yacana ko Joni. ⁶¹ Ara sa kaya vua, "E sega bau a wekamu e vakayacani ina yaca oqori. ⁶² Ara sa vakatabataba vei tamana se yaca cava e vinakata ko koya me vakayacai kina a gone. ⁶³ A sa kerea ko tamana me kau mai vua e dua a papa ni volavola me vola kina, "Na yacana ko Joni." Ara sa kurabui kece ina ka iei. ⁶⁴ vakasauri sa tadola a gusuna ka tasere a yamena ka vosa mai ka vakavinavinakatakina a Kalou. ⁶⁵ Ara sa rere ko ira kecega sa jiko vakavolivoliji ira, ka sa rogovaki yani kina colo ni vanua vaka Jiutia. ⁶⁶ Vei ira taucoko era sa rogoca era sa tugona kei lomadra, a sa kaya, Ena vakabeka i vei ai valavala ni gone iei? Ni sa tiko vata kei koya na liga ni Turaga. ⁶⁷ A sa vakasinaji Sakaraia na tamana a Yalo Tabu ka parofisai ka kaya, ⁶⁸ "Me vakavinavinakataki a Turaga a Kalou i Isireli, O koya sa rawata me vakabulai ira a ona tamata. ⁶⁹ Sa vakatubura vei keta a veivakabulai sa vaka a kaukamea ina loma ni vale i Tevita a ona tama. ⁷⁰ Me vaka ka vosatakina ina gusudra a ona profita ina gauna makawa sara. ⁷¹ Na veivakabulai mai na ligadra a keta meca mai na ligadra kece era caji keta. ⁷² E valata ko koya a meca iei me vakaraitakina kina a ona loloma vei ira a tamada. Me nanuma talega a ona veiyalayalji tabu. ⁷³ A bubului sa bubului kina ko koya vei Eparama a tamada. ⁷⁴ Me vakabulai keta mai na ligadra a keta meca. ⁷⁵ Ena yalosavasava kei na i valavala dodonu e matana, ina veisiga taucoko ni weta bula. ⁷⁶ Ia ko iko a gone, ko vakatokai a profita i koya sa cecere sara. ⁷⁷ Me solia ai tukutuku vei ira a ona tamata mera bula kina. Ni sa vosoji a odra i valavala ca. ⁷⁸ Ena vuku ni ona loloma levu a Kalou sa cadra mai kina vei keta a matanisiga mai cake. ⁷⁹ Me vakararamatakini ira era sa jiko ina butobuto kei na yaloyalo ni mate. Ina valata ko koya a meca ka iei me liutakina a yavamu kina wakolo ni vakacegu ⁸⁰ A sa tubu cake a gone ka kaukauwa ina Yalo Tabu; ka sa tiko e loma ni veikau me yacova siga me vakarairaitaki kina vei ira a Isireli.