¹ Paula,ai Apositolo i Karisito Jisu me tautauvata aivaro ni Alou a odai Vabula ei na Turaga o Karisito Jisu a odai nuinui, ² vei Timoci,a luvequ dinae na vabauta;loloma,yalo loloma,ei na vacegu mai vea Alou a Tamada ei Karisito Jisu a oda Turaga. ³ Me tatauvata ga a oqu masuti io vele e na gauna au ma sa lao ina i Masitonia,mo na tu ga i Efeso qa varoti edra eso a tamata me ua ni vavulicia ai tuutuue dua tani. ⁴ Me dra ua ni vadinatia ai talanoa ei nai vola ni awa tawamudu,o oya na vavuna a veileti qa maqa ni vei vatatai cae e lao mai ve ea Alou,o oya sa yaco e na vabauta. ⁵ Ai nai ni vunau ai me yaco ina a loloma mai na vuni yaloda, mai na lewa e loma re ei na vabauta ei na loma dina. ⁶ Eso a tamata e dra cala tia a adina qa dra vuitani ina talanoa e maqa betena. ⁷ E dra gutia me dra qase ni vuli ni lawa qa dra maqa mada ga ni ila,qa dra maqa ni vadinadina tai nia rawa a a e dra aya. ⁸ Ia eda ila ni are a lawa e dua e vamuria vare me tautauvata sara ga a lawa. ⁹ Eda ila ina ai, ni lawa e maqa ni buli me baleta a tamata i valavala dodonu ia me baleti edra ga a dau basi lawa ei edra a dau va duiduile, o odra edra maqa ni bula vaalou ei edra ai valavala ca, qo odra e maqa ve erda alou qa dra vasisila, ve edra labatia tamadra qa tinadra, ve edra dau laba. ¹⁰ Ve edra dau dara, ve edra dau veimoceri vatagane,ve edra dau butao tamata me dra bobula,ve edra dau seseni,ve edra dau bubului seseni, ei na ataucoo e maqa ni lao vata ei nai va vuvuli dina. ¹¹ Ai varo ai e lao vata ei na kosipeli talai mai na vei vaalougatataini Alou o oya au sa lesi ina meu vunautainia. ¹² Au vavinavinaataini Karisito Jisu a oda turaga o oya sa vakaukauwatai ni au, ni sa nanumi au niu sa lomadina, qa lesi au meu vei qaravi. ¹³ I mada, au dau vosa vacaca, qau dau vacaca, qau dau vei vacacani, ia au sa ciqomia a yalo loloma, baleta au ma velee tu ina lialia ei na tawa vabauta. ¹⁴ Ia sa vua bale a yalo loloma ni Turaga ei na vabautae tu vei Karisito jisu. ¹⁵ Ai tuutuu ai e dina qa yaga ve edra ciqomia nio Karisito Jisu ma lao mai vuravura me vabulai edra ai valavalaca, ia o au e uasivi cae ve edra ina a ¹⁶ ca. Ia ena vuu ni a ai sa soli ina vei au a loloma, sa mai varaitainia o Karisito Jisu i lomaqu a a e uasivi cae, ana na ona vosota taucoo mei varaitai ve edra dinati ea me baleta a bula tawa mudu. ¹⁷ Ia ve ea Tui ni tabagauna, e maqani mate rawa, e maqa ni igavi rawa, a Alou duadua ga, me roovi qa lagilagi i na vigauna taucoo qa maqa ni mudu. Emeni. ¹⁸ Au sa biutia ai varo ai i na omudou mata,Timoci, a luvequ, me tautauvata a parofisai i mada me baleti io, ia ena vuudra ona rawa ina ni valu ena i valu re. ¹⁹ Mo qumiia a vabauta ei na lewa e loma re, o oya edra sa biligia tani eso a tamata qa asa ina a odra vabauta. ²⁰ Ma ve ana o Meneo ei Elikisada, o odru mau sa soli edru vei Setani me rawa ni dru vavulici ina me dru ua nidau vosa vacacatainia Alou.