¹ Me qu jinia o mutou o wekaqu, mutu marau e na vuku ni turaga, mequ volaiya vuwakomutou na kwa qu vou volaiya yaji I mata, e tasi kwa rewarewa vuwako yau, ia na kwa mutu oka ke. ² Mutu qarauniko mutou oka vuwadru na tui, mutu qarauniko mutou vuwadru na vai bura, qarauniko mutou vuwadru na cili. ³ O datou na masu vayalo vuwa na Kalou edu cili edu marautaki niya o Jisu Karisito, du tasi vararavi i na yago. ⁴ I a o yau e djina vou lequ na vi kwa va yago mequ vararavi ke, ke kodaki e kiya e numiya ni notu vuwa e vu kiya na kwa va yago me vararavi ke, aqu no i yata vuwa. ⁵ Aqu cilivi e nai ka walu ni siga, aqu sucu mequ kwai Isireli, mai na yavusa o Penijamini, o yau na Ipiriu mai vuwadru na Ipiriu, ena kwa ni vunau aqu Farisi. ⁶ E kwa ni yalo katakata, aqu va vuravura taki niya nai soqosoqo lewe ni lotu, e na vivadonui e yaco mai na vunau, aqu tasi cala. ⁷ Ia na vikwa aqu dau taletaki niya, e kodaki me vou lavele vakiya vuwako yau me lequ ke na Karisito ⁸ Io e djina qu vou biujia na kwa taucoko, ni vou taucoko na vikilai qai niya o Jisu Karisito na lequ turaga o kiya qu vou vosojiya ke, me lavele vuwako yau na kwa taucoko, ia qu vakasama me kwa wale na kwa taucoko me lequ ga o Karisito. ⁹ Me maru ladai vata, me kuwa ni no vuwako yau vi vadonui e yaco i nai vunau, o kiya ga e rewa i na vabaujia o Karisito, na vi vadonui e mai vuwa na Kalou e na vuku ni vabaujia. ¹⁰ Me qu kilajiya qai niya na kaikai ni leya tucake tale mai na mate, me maru vitokani vata e kwa rarawa me kodaki leya mate. ¹¹ Kequ bara na yacoviya na tucake tale mai na mate. ¹² Qu tasi kodaki niqu rewajiya taucoko, se qu vou yacoviya yaji, ia qu tekuciya no ga mequ qulummiya sara nai naki e qulumiko yau ke o Karisito Jisu. ¹³ O mutou na viwekani, a qu tasi valevulevui iko yau niqu vo qulumiya oji, ia e vou kiya ga na kwa vo sivi, qu vou sasaga no ga mequ toso no ga i mata. ¹⁴ Qu vou wavu ciya mai na cere mequ taucia na cere e coviko yau mai ke na Kalou e vuku o Jisu Karisito. ¹⁵ O kiya medu qai lomavata i na kwa i kwe o datou na makuga i na lotu, ia kodaki e kiya na kwa mutu tasi lomavata ke, e na varaitakiniya na kalou na kwa igi. ¹⁶ Ia na kwa du vou yacoviya me du tekucia nai varau igi. ¹⁷ mutou na viwekani mutu tekuciko yau, mutu vadaniya o rau e ru i valavala kodaki ke niqu vou jiya i varau vuwako mutou. ¹⁸ Ni ru vou lewe levu aqu dau kwaya va levu vuwako mutou, a qu kwa tale ga ni qu tagi no, ni vu jiya meca ni kauvelatai. ¹⁹ Ia na ledru i cavacava na vusa, na ledru Kalou e ru kete, e ru dau valevulevui dru i na vikwa e vivamaduwataki, e ru da va numiya na kwa ni vuravura i kwe. ²⁰ E ru vou lewe ni rara ma lomalagi, o datou, me du lai waciya na ledu i vacola o Jisu Karisito. ²¹ O kiya e na va mataliataki niya du yago malumalumu me vatautauvatataki e yago, e vaiukuukutaki me kodaki na kaikai e va malumalumutaki niya ke na kwa taucoko.