1
A kwaya vuadru ''Djina a qu kwa vuako, e vica o mutou a ru tucake e ru na tasi tovolia na mate sibere ni ru tolavia na matanitu ni Kalou qai nia la kaikai.''
2
Ono na siga vo devu, O Jisu a medru o Pita vata o Jemesa qenia o Joni i na uluniyataga cere, a qai varaitakinia e yago ve ru mata.
3
A lumisamisa mai na lea i sulu bucobuco, kodaki na i luvu bucobuco, e vou jikai na dau sava i sulu i vuravura e bucobuco me rewa ni kwadjina.
5
E saumia o Pita qai kwa ''Vavuvuli, e oka cake me du nokoto no ga ikei, du vavea e tolu na were vacevaceva, me kia vuako, kia vo Mosese qai kia muni vo Ilaijia.''
6
(Ni ru tasi kilajia na kwa meru kwaya, ni ru vou mataku no valevu.)
7
A kia na o a qai va gilogilo taki nidru. A qai kia na domo a qai rogo mai, ''Ikwe na lequ i luve mutumutu varorogo vua.''
8
A ru qai vivukiyaki, a ru qai vitolayaki, a ru tasi tolavia e kia, o Jisu takia ga.
9
A ru qai siro bale mai i na ulunivanua, a varojidru me ru kua ni kwa a ru tolavia me yacovia na gauna e tucake tale i na mate na Luve ni Tamata.
10
Ru qai colo taki nia na i tukutuku igi me no tu ga vuadru, a ru qai vitarogitaki nia na cava na i balebale ni ''tucake tale mai na mate''.
11
A ru qai tarogia, ''balejia na cava ru tarogia ke na vunivola ni o Ilajia e dodonu me ru tei mata?''
12
A qai kwa vuadru, ''O Ilaija e a lamai me visautakinia me oka tale. E qai cava ni a volai tu ke na Luve ni Tamata e
13
Dodonu me vararawataki valevu? A qu qai kwaya vuako o Ilaija a lamai, a ru qai vavea ga na kwa e ru okajia vua, me kodaki na kwa a vou volai tu vua.''
14
A ru qai lamai vuadru na tisaiveli, a ru tolavia na lewe vuqa e vou wavoki jidru, na vunivola ru qai viba qanedru.
15
Na gauna a ru tolavia o Jisu, a ru qai kurabui a ru qai wavu meru lai kidavaki nia.
16
A qai tarogia na lea tisaiveli, ''Na cava e vu lemutu viba vata qa nedru?''
17
E kia vuadru na lewe levu a qai kwa, '' Vavuvuli, A qu vou meia mai vuako o luvequ teigwane. E no vua na yalo e vavunia me tasi rewa ni kwakwa.
18
E yasa taucoko ga e vou tauvia, E kuretaki nia qai viritaki nia i ra, e vuso e gusu, vase quruquru baji, qai mai kaikai tu yaji. A qu qai tarogidru na lemu tisaiveli me ru meia dai mai vua, ia e ru jikai ni rewajia.''
19
E qai saumia vuadru, ''Kawa tamata tasi vabaujia, me kodaki so i vei na kea balavu ni lequ no qaneko mutou? Mea mai vako au.''
20
A ru meia mai na i luve vua. Ni tolavia na yalo o Jisu, e qai viritaki nia vakaikai. Na i luve e lutu i ra qai manumanunisoni.
21
O Jisu a qai tarogia la momo, ''A kodaki i vei na balavu ni gauna a kodaki ke ikwe?''
E kwa la momo, ''Gauna a si luve lailai ke.
22
E dau valevu na la sagaia me va matenia na yalo velavela ni dau viritaki nia i na bukawaqa qai nia i ruwai na ka sagaia me va mate nia. Kodaki o rewa ni vavea e kia na kwa, qai lomaniko maru mo vukeiko maru muni.''
23
O Jisu a kwa vuadru, ''Io kodaki e vo rewa vuako? Na kwa taucoko e rewarewa i vuadru ru vabaujia.''
24
A qai kula i yata i momo na i luve qai kwa, ''Qu vabaujia! vukeiko au me qu tara cake na lequ vabaujia!''
25
Ni tolavia o Jisu ni ru vo toso vawatoto yaji na lewe levu a qai varo jidru na yalo velavela a qai kwa, '' O iko na yalo ni galu qai nia na duduvara, A qu vou varojiko, ladai mai vua, kua tale ni unu via tale va kia.''
26
A qai qoqolou na yalo velavela a qai kuretaki nia vakaikai na i luve teigwane me kodaki na manumanu ni soni. Na i luve teigwane ikwe e kodaki sara ga e kia e vo mate, ru levu e ru kwa, ''E vo mate.''
27
Ia o Jisu e qai solia e lima me lavejia cake, a qai tucake mai na teigwane ikwe.
28
Na gauna a vou lamai ke o Jisu i yaloga na were na la tisaiveli a qai tarogia lo, "E na vuku ni cava mutu tasi varoia rewa ke?"
29
A qai kwaya vuadru, ''O rau ikwe du tasi varovidru ga e rewajia ga na masu.''
30
A ru qai ladai mai kegi a ru la sara i Kaleli. O kia e tasi okajia me kia e kilajia na vanua e ru nokoto no ke, ni vo vavuvuli cidru no lea tisaiveli.
31
A qai kwa vuadru , ''Na Luve ni Tamata e na soli e ru lima na tamata, ru na qai vamate nia. Ia ni na biu me mate, oji e tolu na siga o kia e na tucake tale.
32
A ru qai tasi kilajia na i balebale ni tukutuku igi, e ru qai mataku na tarogia.
33
A ru qai lamai i Kapenaumi. Na gauna e unu ke i yaloga ni were a qai tarogidru, ''Na cava mutu vitalanoataki nia no?''
34
A ru vo galu ga ni ru vou vibataki nidru i calevu balejia o cei e levu cake vuadru.
35
E tadra bale, e a covidru taucoko na lewe jinikarua a qai kwa vuadru, ''kodaki e kia e okajia me tei mata, o kia e dodonu me i devudevu i na vuadru taucoko qai nia me dauniveiqaravi muni.''
36
E qulumia e kia na i luve lailai qai va no nia kedru maliwa. A qai roqojia cake a qai kwa vuadru,
37
''O kia e okajia na i luve ikwe, qu na okajia, o kia e okajiko au; tasi oka jiko au ga, me okajia tale ga o kea e vatala jiko au mai.''
38
E kwa o Joni vua, ''Vavuvuli, ma du tolavia e kia a unuvia tu na nitu a qai kia a qai kwaya mu yaca madu qai tarovia, balejia o kia e na tasi tekuciko datou.''
39
E qai kwa o Jisu, ''Kua ni tarovia, ni tasi kia e vavea na cakacaka mana qu yaca, me qai kwakwa bura takiniko au.
40
Ni vo ledu to o Jiova o cei tale me kedu meca.
41
O kia e solia vuako na bilo wai mo somu kai balebale o iko na la tokani o Jisu Karisito, djina qu kwaya vuako, e na tasi va lavele vua na kea i sau.
42
Ia o kia e va cala nia e kia na kwa lailai e na vabaujiko au, e oka cake me vesu ga ve domo e kia na vatu qai viritaki i wasawasa.
43
Kodaki e vacalaniko mu lima, musukia dai.
44
Ena oka cake vuako mo unu i na colo tawa mudu mai na rua tu mu lima o na qai la i eli, i na bukawaqa.
45
Kodaki e va cala niko mu la, musu kia dai.
46
E oka cake i mo jiunu ve na la kia mai mo na jiunu i na la rua o na qai davataki i na bukawaqa.
48
na vanua igi e notu ke na manumanu e jikai ni mate, io na mudre e tasi boko rewa.
49
E ru na va masimataki o rau yakia i na mudre. Na kwa oka na masima, kodaki e vou ladai mai na masima na ka kamikamica, e na va kamikamicataki tale re vacava?
50
Me no tu ga mutu yaloga na masima, me mutu vilomani vai niko mutou ga.''