1
Nivo masu o keya e kiya e tavo, a qai jiniya, a kwa vuwa e kiya la jisaiveli, me madu masu, me kodaki ni vavulicidru muni ke la jisaiveli o Joni.
2
A kwa vuwadru o keya, mutu vo masu, mutu kwa, Tamai keimami mai lomalagi, Me varokorokotaki na yaca muni. Me yaco na nomuni lewa. Me caka na lomamuni mai vuravura me vaka sa caka mai lomalagi.
3
Mo soliya mai vuwako madou na visiga yakiya na cawa e yaga vuwako madou.
4
Ia mo kuwa ni ocajiko madou me balejiya na lemadu i valavala ca; nivo varaubura vuwako madou. mo vacola niko madou mai na bura.
5
A kwa vuwadru o keya, o cei vuwako mutou e kodaki e kiya o wekaya, a la vuwa i vai bogi levu, a kwa vuwa wekaqu,
6
Aqu kerekere mo soliya mai vuwako au e tolu na i buli madrai, e vo kiya o wekaqu e la mai vacegu vuwako au ni vo latu, e jikai na kwa mequ soliya vuwa?
7
E qai tata o keya mai were, a kwa kuwa ni va wale niko au; e vo sogo tu na mata ni were, madu vo dara qeinidru o luvequ i na i mocemoce. Aqu vo tasi tu rewa mequ soliya vuwako.
8
Aqu vo kwa vuwako mutou, kodaki e duwa na tu me soliya vuwa, ni niya o wekaya; ni vo marejiya no o keya, me tu me soliya na kwa e rau jiya.
9
Aqu kwa muni vuwako mutou, mutu kerekere, e qai soli vuwako mutou; mutu vadaniya, mutu na daniya; mutu tukituki e dola vuwako mutou.
10
Ni vo rewajiya o keya yakiya e kerekere; a vo daniya o keya e vadaniya; e dola vuwa o keya e tukituki.
11
E kiya vuwako mutou la momo e kiya na i luve kodaki e lamai me kere madrai vuwako na lemu i luve, o na soliya vuwa na vatu? kodaki e kere ika, o na soliya vuwa na gwata me sosomi ni ika?
12
kodaki e kereviya na yaloka, o na soliya vuwa e kiya na batibasaga? Kodaki o kilajiya, o mutou na tamata bura, mutu soliya na kwa e oka vuwadru o luvemutou;
13
e kwadjina valevu e soliya na Yalo Tabu o keya o tamadatou valomalagi vuwadru na kerekere vuwa?
14
Avo varoviya dai no e kiya na nitu o keya, a vo galu. A vo ladai na nitu, a vo tata na galu; a karacidru o rau na vuqa tu.
15
Aru kwa e yavalu, e varovidru na nitu o keya la kaikai o Pielisipupi, na ledru turaga na nitu.
16
E yavalu aru va tovoliya, aru tarogiya e kiya na i vatakilakila mai lomalagi.
17
O keya e vo kilajiya na ledru numiya, a kwa vuwadru, na matanitu yakiya e vileji vai niya, e va rusaniya na were e vileji vainiya, e na reba.
18
Kodaki e vileji vainiya o setani, ena dei rewa vacava na leya matanitu? Ni mutu kwa aqu qaqidru na nitu i na leya kaikai o Pelisipupi.
19
Kodaki qu vorovidru na nitu i na leya kaikai o Pelisipupi, aru qai rovidru o cei i na lemu kaikai? o rau na lewai ko mutou ke o rau iqoi.
20
Kodaki qu vo varovidru na nitu ve jiji ni lima na Kalou, e qai yaco djina vuwako mutou na matanitu ni Kalou.
21
E kiya na kaikai e vaiyaragi tu e vatawa niya no na were, e no oka tu na leya i yaya,
22
e kiya tale e oka cake sara mai vuwa na kaikai e la vakaikai e rewajiya sara, a qulumiya la i yaragi ni valu taucoko ga e vanuinui ke, a vo votaiya na i toki mai vuwa.
23
O keya e tasi tokoniko au, e to kanikiya; o keya e tasi soqonijiya vata vuwako au, e kala tautauniya.
25
Avo cava, a daniya ni tavitaviraki e vaiukuukutaki.
26
A qai la o keya, e meidru vata eru vitu tale na yalo e oka cake sara mai vuwadru na bura; aru unuviya aru nokoto ke. Avo bura valevu i bere na tamata igi, a bura va lailai i mata.
27
Nivo tata no kodaki i kwe, e kiya na lewa vuwadru na vuqa tu a vorogo cake e domo, a kwa vuwa, "Evo kalougata na kete o sucu mai ke, qeiniya na cucu o cucu mai ke."
28
A kwa o keya, e kalougata valevu o rau eru varogo na tata ni Kalou a vabaujiya.
29
Aru soqo vata na tamata aru vidrigiji, a vo tekivu o keya me kwa, nai taba tamata bura i kwe. Eru dau tarogiya na i vatakilakila e jikai na i vatakilakila me soli ke, na vatakilakila ga o Jona na parofita.
30
E kodaki ni jiya vatakilakila o Jona vuwadru na kwai Ninive, e kodaki muni ke na luve ni tamata vuwadru na i taba tamata i kwe.
31
E tucake na ranadji ni ceva e vadjinadjina takiniya na cala ni taba tamata i kwe i na vilewai, e vo lamai o keya i na yasa vayawa sara e vuravura me varogo na vuku o Solomoni, e daniya, e kiya i kei e oka cake sara mai vo Solomoni.
32
Eru na tucake na kwai Ninive, eru va djinadjina taki niya na ledru cala na i taba tamata i kwe, i na vi lewai, eru vo vivutuni lai vunau o Jona, daniya, e kiya i kei e oka cake sara mai vuwa o Jona.
33
E tasi kiya e tutu niya na sina, e qai va no niya i na vanuwa e cilo, se ruku na i varau ni sila, na keya i tokotoko ga, meru daniya na keya kakarama o rau na unu mai.
34
Na sina ni yago na mata; e kodaki e oka mu mata e kakarama mu yalo taucoko, kodaki e bura, e gilogilo taucoko ke mu yalo taucoko.
35
O keya mo vadaniya ke gilogilo mai na kakarama e notu mu yaloga.
36
O keya i kwe, kodaki e vo kakarama mu yaloga taucoko, e jikai e jiki me gilogilo, e qai kakarama taucoko sara, e kodaki nivo sina viko na sina a vo mudre oka sara.
37
Nivo tata no o keya, a surejiya e kiya na Farisi meru kana vata i na vasigalevu, a unu o keya, a tadra me kana.
38
Ia nivo daniya na Farisi, e karaciya nivo vasigalevu o keya e tasi vuluvulu re i mata.
39
A qai kwa vuwa na turaga, o mutou na Farisi, mutu dauvasavasava takiniya na bilo vata na dare i taudaku, mutu yaloga e vuqa kena dau driva qeiniya na i valavala ca.
40
Mutu yalowai o mutou, e tasi vaveya e jiki i yaloga o keya e vaveya ga i taudaku?
41
Mutu soliya na kwa ni loloma e kodaki mutu rewajiya, daniya, e savasava vuwako mutou na kwa taucoko ga.
42
E bura vuwako mutou na Farisi, ni mutu vo soliya na i ka jini ni botebote koro, qeiniya na mau taucoko ga e kodaki ikwe, na lewa dodonu qeiniya na loloma ni Kalou. Mutu vo daniya ga i kwe e kilikili qei niko mutou me mutu vaveya, me kuwa ni dai na kwa igi.
43
E bura vuwako mutou na Farisi, mutu okajiya na i nono ni qase ina viwere ni lotu, na vikidavaki i na virara ni vivoli.
44
E bura vuwako mutou, mutu kodaki na i bulubulu e tasi laidani, aru vo la wavoki o rau na tamata e yataga aru tasi kilajiya.
45
A qai tata vuwa e kiya na vunivunau, a kwa, vavuvuli, o tata kodaki ikwe o bililaki niko madou tale ga.
46
A qai kwa o keya, e bura vuwako mutou muni, na vunivunau, ni mutu vo vawalenidru na tamata ina i dagidagi e dredrei sara me lai dagiji, mutu jikai ni dereiya na i dagidagi igi e kiya mutu jiji ni lima.
47
E bura vuwako mutou ni mutu vaveya na lemutu were i na kedru i bulubulu na parovita, aru vamatenidru o rau na lemutu qase.
48
A djina nivo kwa bale jiko mutou, ni mutu vo okajiya na ledru i varau na lemutu qase, niru vamate nidru, a mutu vaveya na were ni kedru i bulubulu.
49
O keya ikwe a kwa ke na vukuni Kalou, qu na vatalajiya e yavalu na parofita qeinidru na i apositolo, e yavalu vuwadru eru na vamateniya aru vabuurabura takiniya.
50
Meru la i tarogi ke na i taba tamata i kwe, na kedru dra na parofita taucoko ga ava dave mai kai vatekivu o vuravura,
51
mai e dra o Epeli, yacoviya sara e dra o Sakaraia, o keya a vamate na kedru vimama na i cabocabo ni madrali qeiniya na were ni soro, Aqu vo kwa vaidjina vuwako mutou, eru na tarogi ke na i taba tamata ikwe.
52
E bura voko mutou, na vu ni vunau' ni mutu vo kaudai na dola ni vuku, mutu vo tasi unu ke o mutou, mutu vo tarovidru muni o rau eru unu no ke.
53
Ni vo kwa no o keya vuwadru na kwa i kwe, e vo tekivu me cikeviya va levu na kere tata vuwadru na vu- ni- vola qei nidru na Farisi e levu na kwa e kwa;
54
a ru vo giri jiya aru vadaniya me kiya na kwa eru varogo mai ve gusu, meru va burabura taki niya ke.