¹ E bogi tolu a qai vai e kiya na vamau mai Kena i Kalili, a nokoto ke la nene o Jisu: ² a sureji o Jisu, qei nidru na leya tisaiveli, i na soqo ni vamau. ³ Ni vo devu na waini, a kwa vo Jisu la nene, e vo jikai vuwadru na waini. ⁴ A kwa vuwa o Jisu, lewa, na cava vuwako qei niko au? e tasi yaco mai na lequ gauna. ⁵ A kwa vuwadru na tamata la nene, na kwa taucoko ga e kwa vuwako mutou mutu va veya. ⁶ A vo nokoto mai ke e ono na saqa vatu na wai, eru dau va savasavataki nidru ke na kwai Jutia, eru yaruwa se yatolu nai varau. ⁷ A kwa vuwadru o Jisu, va vuqaniya na saqa na wai. A ru va vuqaniya me vuwa bale. ⁸ A kwa vuwadru o keya, mutu qai takiviya, kau vuwa o keya e lewaiya na magiji. A ru kau. ⁹ Ni vo tovoliya na wai a vo vuki me waini o keya e lewaiya na magiji, e tasi kilajiya e la mai vai:[o rau na tamata eru talociya na wai eru kilajiya?:] o keya e lewaiya na magiji a vo coviya la teigwane na lewa, ¹⁰ a kwa vuwa, na tamata yakiya a dau vurujiya i mata na waini oka: eru dau somiya valevu na tamata, a qai bere na waini oka va lailai ga; ia o iko, o vo maninitaki niya na waini oka me yaco viya na jiki ni siga igi. ¹¹ Nai vatekivu i kwe ni cakacaka mana a vaveya o Jisu mai Kena i Kalili, a vatakeya ke la i ukuuku; aru vabaujiya ke o rau na leya tisaiveli. ¹² A vo devu aru vo la bale i Kepanaumi, o keya qaneya la nene, qei nidru la tacini, qei nidru la tisaiveli; aru tasi bogi vica ke. ¹³ A vo voleka na ledru kana vata ni lako siviya na Jutia; a la cake i Jerusalemi o Jisu; ¹⁴ a danidru i na were ni lotu ni ru volitaki niya na bulumakau, na sivi, qei niya na ruve, qei nidru na visau i lavo ni ru mai no. ¹⁵ Ni vo vaveya devu na kuwita wa qaliqali, a rovdru taucoko ga mai were ni lotu, na sivi, qaneya na bulumakau; a sovajiya yaji na ledru i lavo o rau na visau lavo, a vukiciya na ledru teveli; ¹⁶ a kwa vuwadru na volitaki ruve, kau dai na kwa i qoi; kuwa ni vaveya la were o Tamaqu me were ni vivoli. ¹⁷ A ru numiya na leya tisaiveli niru volai, e kaniko au na loloma katakata i na lemu were. ¹⁸ Aru qai tata na na kwai Jutia, a kwa vuwa, na cava na keya i vatakilakila o vatakeya vuwako madou, ni o vo vaveya na vi kwa i kwe? ¹⁹ A tata o Jisu kwa vuwadru, mutu talaraki niya na were i kwe, qu na qai vaveya tale e bogi tolu. ²⁰ Aru kwa na kwai Jutia, Na were ni lotu i kwe e vasagavulu ka ono na yabaki a vai no ke: o na vaveya devu i na tolu na bogi? ²¹ Na were e tatataki niya o keya, e yago. ²² E qai tucake tale mai na mate o keya, a ru numiya o rau na leya tisaiveli, ni vo kwa vuwadru na kwa i kwe; aru vo vadjina jiya na i vola tabu, qei niya na kwa e kwa o Jisu. ²³ Ni vo nokoto o keya mai Jerusalemi, ni vo vai na kana vata ni lako siviya, eru levu eru vadjina jiya e yaca, niru vo daniya na vi kwa mana e vaveya o keya. ²⁴ A tasi vararavi vuwadru o Jisu, ni vo kila jidru taucoko ga, ²⁵ e tasi yaga vuwa me kiya e vata kedru na tamata: e vo kila jiya o keya na kwa e no i na yalo ni tamata.