¹ Ena vatekivu avo colo e keya na tata, aru vo no vata no na Kalou o keya na tata, avo jiya Kalou o keya na tata. ² Ena i vatekivu aru no vata no keya ikwe vata na Kalou. ³ Avo vaveya na kwa taucoko ga o keya, e tasi kiya na kwa me vai me tasi vaveya o keya. ⁴ Evo notu vuwa na colo, ia na kakarama ni tamata na colo. ⁵ Avo sinaviya na gilogilo na kakarama, ia na gilogilo avo tasi daniya. ⁶ E kiya na tamata a lai vatala mai vuwa na Kalou e yaca o Joni. ⁷ O keya ikwe e lamai me dautukutuku, me kwa na kakarama, meru vabaujiya na tamata taucoko e vuku. ⁸ Avo tasi jiya kakarama igi o keya, ia e lai tavi ga me kwa ga na kakarama. ⁹ Avo niya ga ikwe na kakarama djina, a lamai i vuravura me vakakaramataki nidru na tamata taucoko ga. ¹⁰ Avo nokoto i vuravura o keya, avo niya a vai ke o vuravura, ia aru tasi kilajiya na kwai vuravura. ¹¹ A lamai o keya vuwadru na kwai leya. ¹² Ia o rau taucoko ga eru vabaujiya, avo soliya rewa vuwadru meru yaco meru luve ni Kalou, vuwadru na vabaujiya e yaca. ¹³ Eru vo vasucumi, e tasi balejidru na qase, se na sucu vayago, se na vitaliya ni tamata, mai vuwa ga na Kalou. ¹⁴ Avo yaco me tamata o keya na tata, avo no vata qaneko datou no, ia a madu tolaviya na leya i ukuuku, ni kodaki na i ukuuku e le kiya ga ni vatuburi mai vuwa o Tamaya, avo vuqa ina loloma vata na djina. ¹⁵ A vo tukuniya o Joni a kacivakiniya, a kwa, ''O keya ikwe aqu kwa no, O keya e tekuciko maru e oka cake mai vuwako maru, nivo simata vuwako maru o keya.'' ¹⁶ Ia du vo rewajiya taucoko ga mai na kwa vo vuqa tu vuwa, na loloma e vaikuritaki. ¹⁷ Ia o Mosese a soliya ke na i vunau, o Jisu Karisito, avo yaco ke na loloma vata na djina. ¹⁸ E tasi kiya na tamata me tolaviya na Kalou i na kiya na gauna, la i luve takiya ga, a vatubuniya o keya, o keya e nokoto e yasa la Momo, avo tukuniya no. ¹⁹ Ia evo niya ikwe la i tukutuku o Joni, ni vo vatalajidru eru yavalu na bete vata eru yavalu na i luve ni livai o rau na kwai Jutiya mai Jeruisalemi me ru tarogiya, ''O cei re o iko? ²⁰ A qai kwa o keya, a tasi giritakiniya, avo kwa ga, Avo tasi niko au na Karisito.'' ²¹ Aru qai tarogiya, O cei tale? o Ilaija? A qai kwa o keya , ''E jikai''. O iko ga na parofita igi? A qai kwa o keya, E jikai. ²² Eru qai kwa vuwa, ''O cei re o iko? me madu kwa vuwadru na vatalajiko madou mai, na cava o kwa me balejiko?'' ²³ A qai kwa o keya, ''O au e domo e kiya e coco i yaloga na vikaikai, vadodonutaki niya la calevu o Jiova me kodaki e kwa o Aisea na parofita.'' ²⁴ Ia o rau na lai vatala, eru lai vatala mai vuwadru na Farisi. ²⁵ Aru vo tarogiya, aru kwa vuwa, ''O vo vivataisotaki i na vuku ni cava, nivo tasi niko na Karisito, se o Ilaija, se na parofita igi?'' ²⁶ A qai tata vuwadru o Joni, a qai kwa, ''Aqu vo vivavitaisotaki na wai, ia e nokoto kemutu vimama e kiya mutu tasi kilajiya. ²⁷ O keya ikwe e tekuciko au e uwasivi cake vuwako au, ia na wa ni leya i vava evo tasi yaga mequ serekiya.'' ²⁸ Avo vai na vikwa ikwe ma i Pecani i na baji ni Joritani, na vanuwa a vavitaisotaki ke o Joni. ²⁹ I veiqwata vo tolaviya o Jisu o Joni ni vo lamai vuwa, a qai kwa, ''Tolaviya, na Lami ni Kalou o keya vo kau dai na ledru i varau bura na kwai vuravura! ³⁰ O keya ikwe na kwa qu kwa, e na tekuciko au e kiya na tamata, evo uwasivi sara vuwako au, nivo simata vuwako maru.'' ³¹ Ia aqu a tasi kilajiya, ia meru kilajiya o rau na Isireli, o keya ikwe lequ vuni lamai mequ vivavitaisotaki i na wai. ³² A qai kwa o Joni, ''Aqu a tolaviya na YaloTabu ni vo labale mai lomalagi me kodaki na ruve, avo lamai nokoto vuwa. ³³ Ia aqu a tasi kilajiya i mata, ia o keya a vatalajiko au mai mequ vivavitaisotaki i na wai, avo kwa vuwako au, o keya o na tolaviya ni vo labale ke na Yalo Tabu, avo mai noko vuwa, avo niya ikwe evo vivavitaisotaki ke i na Yalo Tabu.' ³⁴ Ia aqu a tolaviya, aqu kwa ni o keya ikwe na Luve ni Kalou.'' ³⁵ I veiqwata avo tucake tale o Joni, a ru lewe ruwa la jisaveli, ³⁶ aru tolaviya o Jisu nivo layaji, a qai kwa, ''Tolaviya na Lami ni Kalou!'' ³⁷ Aru varogo na leya tata o rau na jisaiveli, aru vo tekuciya o Jisu. ³⁸ A qai vuki o Ojisu, a tolavidru niru vo tekuciya a qai kwa vuwadru, ''Na cava muru vatolaviya?'' Eru qai kwa vuwa, Rapai (na keya i balebale Vavuvuli), ''Vo nokoto mai vai? ³⁹ A qai kwa vuwadru o keya, lamai mo tolaviya na vanuwa e nokoto ke nokoto ke o keya, aru vo no vata no na siga igi, avo voleka nai ka jini auwa. ⁴⁰ E kiya vuwadru avo varorogo vuwa o Joni avo tekuciya, o Adriu la tacini o Saimoni Pita. ⁴¹ A vo daniya i mata la tutuwa o Saimoni, avo kwa vuwa, ''Madu vo tolaviya na Mesaia'' (e keya i balebale na Karisito). ⁴² Avo meiya vo jisu, ia avo vatolaviya o Jisu, a qai kwa, ''O iko o Saimoni la i luve o Joni. o na votokai o Kifa'' (na keya i balebale o pita). ⁴³ I veiqwata avo mata layaji i Kalili o Jisu, avo daniya o Filipi, avo kwa vuwa, ''Tekuciko au.'' ⁴⁴ Na kwai Peciseita o Fillipi, na ledru rara o Adriu vata o Pita. ⁴⁵ Avo tolaviya o Nacanieli o Filipi, a qai kwa vuwa, ''Madu vo tolaviya o keya a volavola ke o Mosese i na i vunau, vata o rau na parofita, o Jisu na kwai Nasareci, lai luve o Josefa.'' ⁴⁶ A qai kwa vuwa o Nacanieli, ''E rewa ni tubu e kiya na kwa oka i Nasareci? A qai kwa vuwa o Filipi lamai mo tolaviya.'' ⁴⁷ Avo tolaviya o Nacanieli o Jisu nivo la no mai vuwa, avo kwa, ''Tolaviya e kiya na i luve i Isireli djina e jikai vuwa na vivakwaisini!'' ⁴⁸ A qai kwa vuwa o Nacanieli, ''A mutu kilajiko au mai vai?'' Avo tata vuwadru o Jisu, a kwa vuwadru, ''Ni sibere ni coviko o Filipi, ni o nokoto e ruku na vuni lolo, aqu vo tolaviko.'' ⁴⁹ A qai tata o Nacanieli, me kwa, ''Vavuvuli, o iko na Luve ni Kalou! o muru na ledru Tui na Isireli!'' ⁵⁰ A qai tata o Jisu me kwa vuwadru, ''Niqu vo kwa vuwako, Aqu tolaviko i ruku ni vuni lolo, o bau vabaujiya?ni o na tolaviya ni vikwa e uwasivijiya ikwe.'' ⁵¹ A qai kwa vuwa o keya, ''E djina, e djina, ni qu kwa vuwako mutou, Ina gauna mai bere mutu na tolaviya na lomalagi ni na tawase, vata o rau na agilosi ni Kalou niru vo lacake eru labale vuwa na Luve ni Tamata.''