¹ Oi yau o Vaulo, na i apositolo i Jisu Karisito e na lewa ni Kalou, ena vuku ni cola yalataki e no tu vo Karisito Jisu, ² Vuwa o Jimoci, na lequ i levu ni toko, me yaco na loloma na vacegu mai vua o tamadu vata o Karisito Jisu na ledu turaga. ³ Qu vaokaoka vuwa na Kalou, o kiya qu qwaraviya ena yalo djina, me kodaki na kwa eru dau vaveya na qase i mata, ni tasi mudu na lequ masu ena vibogi vata qai niya na visiga. ⁴ Ni qu gadreviya valevu mequ tolaviko, ni qu numiya mu wai ni mata, me qu vasinaiji ke ena marau. ⁵ Ni qu vanumiya, ena vabaujiya djina sara ena tu vuawako, a notu i mata vo Loi na lemu tatai vata na lemu nene o Unaisi a qu vou jiniya ena no talega vuawako. ⁶ O kiya ikwe qu vanumiko ke mo vauqejiya nai solisoli ni Kalou e yaco vuwako ina vitabaki ni lima. ⁷ Ni vo tasi soliya mai vako datou na Kalou na yalo e dei ga vata na yalo loloma qai niya na yalomakuga ⁸ O kiya mo qai kuwa ni maduwa taki niya na keya i tukutuku ni ledu turaga se o yau, na ,leya tamata qu vesu tu iya mo vosojiya na vivararawa taki ena vuku ni tukutuku oka, me kodaki na kaikai ni ledu Kalou. ⁹ O kiya e vacola ni ko datou e coviko datou talega me du yalo savasava e tasi niya na i naki vata na loloma eya soli i mata e vuku o Karisito Jisu a qai tekivu i bere o vuravura. ¹⁰ Iya avo qai vatakiya mai ni vo voleka mai na ledu i vacola o Jisu Karisito, o kiya e va oji niya na mate, e vata kia na cola vata na tasi mate rewa i nai tukutuku oka. ¹¹ Qu a lesi ke mequ vunau, mequ apositolo talega vata na ledru i vavuvuli na vimatanitu. ¹² O kiya talega qu vo vosojiya ke na vi kwa i kwe ia niqu tasi maduwa ke niqu vo kilajiya djina sara ni vo rewajiya o kiya me maroroijiya na kwa a soli vuwa me yacoviya na siga igi. ¹³ Mo qulumiya oka nai varau ni tata djina, o na varogo vako yau na dau vabaujiya o Karisito Jisu. ¹⁴ Na kwa oka e ya soli vuwako mo qulumiya oka ni vo vuke iko na Yalo Tabu e no tu vakodatou. ¹⁵ Ena kwa i kwe qu kilajiya aru biujiko au taucoko ke na kwa i Esia, e kodaki ke o Faijelo vata o Erimojini. ¹⁶ Me yaloloma re na turaga vuwadru na mataqwali o Oniseforo, ni vo vacegu ni ko yau valevu e tasi maduwa taki niko yau niqu vesu tu. ¹⁷ Ia niya no koto mai Roma, a vadaniko yau va kaikai a vo daniko yau. ¹⁸ Me soli re vuwa na turaga ina siga igi, iya na levu ni kwa e ya qwara viko au ke mai Efeso o vo kilajiya oka no.