¹ Mâyh lauf zuc ja jeenx phunz Ê-phê-sô, Huyđ toongh nyăngz Stynz-munh, ja jeenx lănv bux nănh stiz năngđ nây nâyx, "nây six byaoh puf nzauf nhlic nomz sting tau, yăngh woa nhlic zây sămz toongz mungh tonngx woax tauh bux nyăngz woac. ² Yaz pâyz mâyh ayx nyăngz cumh pâuz seenz zâuđ nzongf, mâyh yâuc naih stymz tanyđ tuz, yâuc max munggv okx njangh nyăngz munh, mâyh cănh stâyv quaix nănh stiz ayx nyăngz cumh pâuz, nănh stiz six ayx za nyăngz cumh pâuz munh. ³ “Yaz pâyz mâyh naih stymz tanyđ tuz đungx hungđ dlauc wâyb wâyc yaz nyăngz manyh yangh lauf max sec. ⁴ Six naih ah hungđ max hođ yaz nyăngz stymz, yaz oix coong bux mâyh, six nâyx zanyf wâyc mâyh max stăngz yaz năngđ lôx coonz. ⁵ Nyâyh mangc jađ, đangc dlih mâyh stăngz yaz, six nâyx zanyf mâyh gâyh yaz tăng laiv côz, mâyh oix zuc coi nyâuđ phunb đangz lauf ayx cumh pâuz năngđ lôx coonz, six coong mâyh năngđ max coi nyâuđ têx, yaz six ninyh zoz mâyh woax zây toongz seetb gâyh mâyh woax nomz tync. ⁶ Six mâyh naih ah hungđ jic tuz tanv, wâyc zuc mâyh hănđ Ni-cô-la, woax đomc munh ayx nyăngz cumh pâuz yaz lauf hănđ. ⁷ Laiv lanh naih bah noomh oix zuc nzaz bah noomh mungv Singx-lingh nzaox bux muif đoif Huyđ-toongh, laiv lanh tuz hingh, yaz six sađ phunz nănh naih gâyf tuz nhlinc Tênb-toongh Côkz, Tênb-Hungh woa Ba-ra-đi lauđ wynb nyăngz yungf mengc pyâu. ⁸ Mâyh zuc ja jeenx phunz Sê-mêkc-nơ, Huyđ-toongh nyăngz munh bux nănh coong nâyx, “yaz six ayx quef coonz cloon stêtb mâyv woax tauh, tayc blătc yâuc năngx săngh phunb stengb taih woax tauh bux coong, ⁹ “Yaz pâyz tuz mâyh dlauc huđ, six mâyh seenz năngx puv quâyx Quaix! yaz yâuc pâyz tuz naih pitc tauh munh coong woac peo mâyh, stiz yâuc cănh zanyb nănh stiz ayx Yiu-thai munh, six max zâyf, stiz songc Sax-tanx nyăngz gwoanc. ¹⁰ Năngx gâyf cumh nzav, mâyh cayx pongz zuc dlauc wâyb, yaz six phunz mâyh pâyz tuz Sax-tanx, six zoz nyâuh ah po munh ănz nzauh stâyv nyâuh, yâuc wâyb nyâuh săpc noib cah njaf, nyâuh six zuc nongc naih stymz tanyđ tauv tayc, yaz songđ sađ nomz săngh mengc nyăngz banyh Tênb-mouc phunz nyâuh. ¹¹ Laiv lanh naih bah nomh six zuc nzaz bah noomh mungv Singx-lingh bux Huyđ toongh nyăngz woac, laiv lanh tuz hingh, six max zuc tayc tah nyâyc hâyđ. ¹² Mâyh zuc ja jeenx phunz Betc-găm Huyđ toongh nyăngz Stynz-munh coong, “nâyx đomc woac six naih nzuc đao iz mynb njayc njemh woax tauh bux coong, ¹³ Yaz pâyz tuz mâyh yămz lâyc nomz tync six Sax-tanx, tync, Six mâyh yâuc zeen wăn yaz nyăngz manyh yangh, max quanyf yaz, mâyh max quanyf seenz stymz, An-ti-ba , ayx zanyx manyf bix zuc tayx tayc, woax nomz tync six Sax-tanx, yămz woax cuyb tync. ¹⁴ Six naih sax hungđ yaz oix yônx mâyh, yămz mâyh lâyc naih ah đomc munh ninyh lêpc Ba-la-am nzaox nyăngz gâyf, lôx noib Ba-la-am, nzaox Ba-lakv, ênz i-sa-la-ên munh ninyh pamf stoif,* yâuc hox nănh stiz nhlync congx miuc hanyh nyăngz muif hungđ, yâuc hox ayx pongz lauh. ¹⁵ Yămz mâyh lâyc lauf naih ah đomc munh ninyh lêpc Na-cô-la, nzaox nyăngz gâyf. ¹⁶ Mâyh seenz coonx coi nyâuđ nhlimc stoif, năngđ max têx, yaz max ngaih lauh yaz six ninyh nongc yămz yaz nzeetx nja seetb taih woax zungz nzuc đao njayc cloon woax đomc munh panx zax. ¹⁷ Laiv lanh naih bah noomh oix zuc mungv năngx gongx Singx-lingh bux Huyđ-toongh, “laiv lanh tuz hingh yaz six zoz pinyx vâyv woax nomz ( Ma-na, ) phunz nănh, yaz six jaoz phunz muif lanh ah nomz njauz pec, naih ah nomz săngb bux ja ănz woa njauz, blătc nzuf tuz stipx njauz woax đomc munh, pitc đomc max pâyz tuz woax nomz săngb bux. ¹⁸ Mâyh zuc ja jeenx zuyz phunz Ti-a-ti-lơ, Huyđ-toongh nyăngz Stynz-munh coong nâyx, “Tênb-Hungh nyăngz toonz, mâyc năngđ tâuf byetc, staux năngđ munh pu tongh stib woax tauh bux coong, ¹⁹ “Yaz pâyz mâyh cumh pâuz, yâuc pâyz mâyh stăngz yaz, yâuc bokc dlic munh naih seenz stymz tanyđ, pâyz tuz mâyh ayx cumh pâuz năngx yeetx têx cah đangc dlih. ²⁰ Six naih ah hungđ yaz yônx mâyh, wâyc zuc mâyh dluyh pyenz tauh munh nzif Yê-sa-bên, cănh zanyb nănh ayx tauh stênx stengb, nzaox za gâyf jaf yaz cumh pâuz munh, ayx pongz lauh nhlinc congx miuc hanyh nyăngz muif hungđ pamf stoif. ²¹ Yaz phunz nănh naih săngx huđ coi nyâuđ quanyf stoif, six nănh max nhleenc. ²² Mangc baf! six coong cloon nănh ayx pongz lauh woax đomc munh năngđ max coi nyâuđ quanyf stoif, yaz six quanyf nănh cloon stiz ănz woa zâuv cah zâyc phunz nănh stiz zuc tanyđ munz. ²³ Yaz six tayx nzuf Yê-sa-bên, nyăngz sây, phunz muif nomz Huyđ toongh songđ pâyz yaz hayh zah tuz seetb bamh munh nyăngz stymz nyâuđ nyâyh oix ayx laiv hungđ, yaz songđ âyz muif lanh munh ayx nyăngz cumh pâuz clao phunz nănh stiz. ²⁴ Six năngx yăngc woax đomc yămz Ti-ya-ti-rơ, max lêpc woax đomc pinyx nzaox Sax-tanx nyăngz gâyf woax đomc munh, yaz lănv bux nyâuh, yaz songđ max pâu laiv hungđ niđ phunz cloon mâyh woax đomc munh đamz toongz. ²⁵ Nyâuh six zuc lif năngx gongx nyâuh naih nyăngz tax hungđ, zu tauv yaz năngx taih. ²⁶ laiv lanh tuz hingh yâuc âyz ayx, tauv stêtb mâyv woax noib, yaz songđ phunz woax tauh naih lanyf cun muif stingx nyeenh mănh, năngđ Pha phunz yaz naih lanyf cun pec stingx nâyx. ²⁷ Woax lanh munh six nongc ah stynz njab pya bopc nănh stiz năngđ munh bopc nib engz yungc nzuf. ²⁸ Yaz six zoz bah đoomz njâu nyăngz stingz tau jaoz phunz nănh. năngđ pha jaoz phunz yaz. ²⁹ Laiv lanh naih bah nomh six zuc mungv năngx gongx Singx-lingh bux huyđ-toongh nyăngz woac.