¹ Naih ah hâyđ Zâu Yê-su yămz Ga-li-lê glangh synh nzaox munh, munh hongđ nzongf! Nănh songđ nzac ah saz đangđ ninyh stâyv woa, songx munh yămz woa wăngx synh. ² Nănh nongc woac pây nzaox nănh stiz đungx hungđ, nănh coong, ³ “mungv bef, naih ah lanh munh seetb ninyh hav nhlimb, ⁴ Hav woax zanyf, naih ah po nhlimb tuih zuc jau đămc, noc taih nhlync nzuf. ⁵ Naih ah po tuih zuc njaoz staiz poz, nib phac nhlimb bêux nyah căn. ⁶ Six bah noib seetb taih phaib, songđ njengh caođ nzuf, wâyc zuc nzac đungh max đôz. ⁷ Naih ah po tuih zuc nzim plungz, nzim lub taih nzimx, max hayh săngh pyâu. ⁸ Naih ah po nhlimb tuih zuc nib gongx, bêux taih săngh tuz nyauh, naih ah phanx tuz stamx săpc, naih ah po tuz guc săpc, naih ah phanx tuz ah pez.” ⁹ Nănh năngx coong, “laiv lanh naih bah nomh six zuc nzaz bah noomh mungv năngx gongx!” ¹⁰ Zâu Yê-su cănh ah lanh yămz woax zanyf, yămz woa cah synh woax đomc munh, cloon woa săpc nyâyc lanh stâyv sây buz taih êu nănh pob manyf woax tyuh woac pây phunz nănh stiz mungv. ¹¹ Zâu Yê-su tauz, Tênb-Hungh nyăngz Côkz woax đomc pinyx nyăngz dlayc, nyâuh tuz pâyz nzuf nzof, six cungh ngwoaic munh, yaz zuc nongc woac pây nzaox nănh stiz. ¹² Ayx ha phunz nănh stiz hănđ mangc yâuc max phătc, hănđ mungv yâuc max saz, six coong nănh stiz năngđ pâyz têx, nănh stiz songđ hayh coi nyâuđ tuz quanyf stoif. ¹³ Zâu Yê-su naic stâyb sây buz, ha nyâuh lauf max zengx saz woax đomc woac pây mah? Năngđ naz nyâuh ayx laix hayh saz tuz pitc hungđ woac pây? ¹⁴ Hav nhlimb nyăngz munh six hav Tênb-Hungh nyăngz cuđ jeenx. ¹⁵ Ah phanx munh six pây năngđ nhlimb tuih zục jau đămc nâyx, munh numđ cuđ jeenx, six zuc Sax-tanx lênh dlih taih zoz yămz nyâuđ woax đomc cuđ jeenx seetb taih. ¹⁶ Naih ah phanx munh six pây nhlimb tuih zuc njaoz poz nâyx, nănh stiz numđ cuđ jeenx, lênh dlih numđ nyađ stypx.” ¹⁷ Nănh stiz nyăngz nyâuđ nzac đungh max đôz zeen max lauh, wâyc cuđ jeenx, pongh zuc zâuđ nanc, zuc munh ayx peo, nănh stiz taux woa quengx, ¹⁸ Naih ah phanx munh six pây năngđ nhlimb tuih nzac nzim plungz, nănh stiz mungv cuđ cuđ jeenx. ¹⁹ Six wâyc stâyv sangc nyăngz jau quenb nyâuđ, mauh puv quâyx stynh nyanh, cloon muif hungđ dlayc tăng Tênb-Hungh nyăngz woac, songđ bây max săngh pyâu.” ²⁰ Nah ah phanx munh six pây năngđ nhlimb tuih toix nib gongx, nănh stiz numđ Tênb-Hungh nyăngz woac numđ nyađ stipx, săngh tuz jauh, naih ah phanx tuz stamx săpc, ah phanx tuz guc săpc, ah po tuz ah pez.” ²¹ Zâu Yê-su năngx bux nănh stiz coong, “naih mănv pu tuz toongz sac bix zoz tongđ zoom, mah six nzâyz ninyh zaub ănz woa zâuv đi max? Toongz max zâyf tăpx ănz woa nzanc mah?” ²² Max naih lungđ hayh pinyx tuz vâyv max bây pongx yangh. ²³ Toix laiv lanh naih bah noomh, six zuc nzaz bah noomh mungv năngx gongx.” ²⁴ Nănh năngx nzaox coong, “nyâuh six zuc nongc stymz nyâuđ mungv năngx gongx, nyâuh nongc toix laiv hungđ gaob phunz munh, Zâu Tênb-Hungh lauf nongc woax hungđ gaob clao phunz nyâuh, songđ pâu năngx đungx têx. ²⁵ Songđ wâyc toix laiv lanh naih, six tuz pâu năngx đungx têx, toix aiv lanh max naih, nănh hănđ naih tix hungđ, lauf zuc zoz nzâyz ninyh nzuf.” ²⁶ Nănh năngx coong, “Zâu Tênb-Hungh nyăngz côkz, six pây năngđ ah lanh munh seetb ninyh hav nhlimb ănz nănh woa njăngx njaf nâyx. ²⁷ Nănh phâyx mah six quef, bah noib zax, mah six bah nzămc, nhlimb cănh nzoi nyah bêux nyah seetb taih, nănh lôx max pâyz. ²⁸ Nib cănh ayx phunz nhlimb bêux taih, tah yeetx six săngh miuh, tah nyâyc six poongx, seetb blauh pyac mâyđ. ²⁹ Tauv blauh wăngh, nănh nzăngđ nzâyz bah tôz ninyh quănf, songđ wâyc tauv săngx huđ sâub zunb nzof.” ³⁰ Nănh năngx coong, “pănh cayx nongc nhleenz tâuv pây tuz zuc Tênb-Hungh nyăngz côkz nâyv? ³¹ Zâu Tênb-Hungh nyăngz côkz six năngđ ah nomz njayz jaix nhlimb, songx nzac nib ninyh woax zanyf, nănh năngx jeenz quaix muif hungđ njayz nhlimb. ³² Six tauv nănh bêux taih, năngx lub quaix muif hungđ njayz. Zav quah lub, Tauv zâuv yămz gungh nyăngz noc năngx taih ayx njaof ănz mem glomx.” ³³ Zâu Yê-su năngx nongc woac nzaox đungx hungđ phunz songx munh mungv, dluyh âyz songx munh mungv saz tuz đungx, mah six stoc.” ³⁴ Max naih laiv hungđ, Zâu Yê-su max nongc woac pây nzaox songx munh, cungb nănh stiz cănh yămz, nănh nzăngđ phanv nâyx đomc woac pây phunz stâyb sây buz mungv.” ³⁵ Tauv woax noib gungh cayx nzămc, Zâu Yê-su bux stâyb sây buz coong, “pănh clăngv quaix woax nganc wăngx synh ninyh gôh.” ³⁶ Cloon songx munh tinyh gâyh, stâyb sây buz ênz nănh ninyh, nănh stâyv woa đangđ njaf, năngx naih pitc saz đangđ lêpc cloon ninyh. ³⁷ Max laic nyâyh naih tâu nzaox lub, sâyb womz bomf vatb nzac đangđ njaf ninyh đangđ cayx sêmh gôh.” ³⁸ Six Zâu Yê-su yămz woa đangđ tây, pâub tungh nzomx phâyx mâyc njoomh. Six stâyb sây buz êu nănh nyoongz quef yâuc coong, “stâyb pha lex, pănh cayx zuc tuih womz tayc gôh, mâyh max numđ staoh waz?” ³⁹ Zâu Yê-su nyoongz quef seetb lanyf, zăpx êu nzaox cloon coiđ womz tingc, “nănh coong tingc gôh, toongx sangf coiđ womz tingc nzuf, muif hungđ stinyb njâuh dekc-dlekc. ⁴⁰ Zâu Yê-su coong ănz stâyb sây buz, săngh laix nyâuh bix cumh nzav? Nyâuh lauf max zengx naih njyh zeen mah?” ⁴¹ Stâyb sây buz cumh nzav nzongf, songđ lanh naic lanh coong, “lâyc tauh munh six mănv bix njynh nzaox, njynh womz mungv nănh nyăngz woac nâyv?”