9 ¹ Zâu Yê-su nzac đangđ ninyh clăngv muf woax nganc wăngx synh, songđ ninyh tauv Nănh nyăngz stâyz phangz. ² Naih ah đomc munh zoz siu zengz ah lanh gumc quac munh taih lov Zâu Yê-su, Nănh phătc woax đomc munh zeen tuz gongx, Nănh songđ coong ănz woax lanh gumc quac munh, “Sây lex! Phanv pungx stymz bex, mâyh nyăngz stoif tuz quanyf nzuf nzof gôh. ³ Naih ah đomc nzaox gâyf Stênx stengb yămz nyâuđ nyâyh coong, “Ê, tauh ya munh coong pamf Tênb-Hungh nac. ⁴ Zâu Yê-su pâyz tuz nănh stiz yămz nyâuđ nyâyh ayx naz, Nănh songđ coong, “săngh laix nyâuh bix nyâyh tuz huđ nâyx yeh? ⁵ Nâyx iz zâux woac laiv zâux coong năngx hâyc têx? Cayx coong mâyh nyăngz stoif tuz quanyf nzuf gôh, max six coong, “nyoongz quef muf gôh mah six? ⁶ Six yaz oix phunz nyâuh pâyz tuz Yaz bamh munh nyăngz toonz, yămz nây gungh đi naih lanyf hayh quanyf tuz munh nyăngz stoif. Zâu Yê-su songđ coong bux gumc quac munh, “Nyoongz quef nzâyz mâyh nyăngz siu muf pyau gôh. ⁷ Woax tauh munh songđ nyoongz quef muf pyau. ⁸ Songx munh phătc năngđ nâyx, nănh stiz cumh nzav nzongf songđ tanv Zâu Tênb-Hungh. Songđ wâyc Nănh phunz nâyx đomc lokc jangx munh. Yê-su êu Ma-thi taih ayx stâyb sây (Makv 2:13-17; Lu-ca 5:27-32) ⁹ Zâu Yê-su ninyh gâyh woax tix tync, phătc naih ah lanh munh bux hipđ ayx Ma-thi. Stâyv woa sâub sôiv tync, Nănh êu coong, “Taih lêpc yaz gôh, Ma-thi, lênh dlih nyoongz quef lêpc Yê-su ninyh. ¹⁰ Zâu Yê-su yămz Ma-thi nyăngz pyau nhlync năngv woax dlih, naih stăngc Lô-ma hungh sâub sôiv nyăngz munh đungx, yâuc naih cloon manyh yangh stanc nyăngz munh, cloon stâyb-sây buz songc hynh nhlync năngv. ¹¹ Naih ah đomc Pha-li-si munh phătc songđ naic stâyb-sây buz, săngh laix nyâuh nyăngz stâyb pha bix cloon manyh yangh stanc, cloon sâub sôiv nyăngz munh songc nhlync năngv? ¹² Zâu Yê-su numđ coong naz, Nănh songđ tauz, “Munh zoongx munh max sămv zuc lov mađ stangc, cungb săngh gumc munh nzăngđ sămv zuc mađ stayb. ¹³ Nyâuh six zuc ninyh hođ năngx pâyz, nâyx zâux woac nyăngz âyz gâyf, Yaz oix nongc munh naih nyâuđ stăngz munh, max zâyf oix nongc stanyb-lanyh, Yaz max zâyf taih lov munh gongx munh, six yaz taih lov stoif-munh. Munh naic tauv njic max nhlync lungđ laiv hungđ nyăngz gâyf (Makv 2:18-22; Lu-ca 5:33-39) ¹⁴ Woax zanyf, stăngc munh ayx quaix womz nyăngz gâyf woax tauh (Giăng nyăngz stâyb sâyb taih naic Zâu Yê-su, săngh laix buz cloon Pha-li-si munh njynh leox bix zuc njic nhlync, ha săngh laix mâyh nyăngz stâyb sây yâuc max zâuđ njic nhlync? ¹⁵ Zâu Yê-su tauz, săngb langh năngx yămz coonx hynh woax dlih, zeb munh năngx zuc numđ stauh max? Six tauv bengc noib săngb langh zuc ênz ninyh woax dlih, zeb munh nzăngđ zuc njic max nhlync laiv hungđ. ¹⁶ Yâuc max naih mănv nongc săngb buyx va lôx gwuyz, wâyc zuc săngb buyx hayh đănx phunz lôx gwuyz byaif năngx lub têx. ¹⁷ Yâuc max naih laiv lanh zoz săngb tungh cuđ tyu ănz lôx đupx tic, ănz bây tyu siv zungx đupx tic canyz tyu songđ seetb nzuf, săngb tyu six ănz săngb đupx tic, ayx năngđ naz nzăngđ hayh leđ tuz iz hungđ. Yê-su zany gumc phunz tauh munh nzif, yâuc êu tauh Munh sab jeenz săngh phunb stengb taih (Makv 5:21-42; Lu-ca 8:40-56) ¹⁸ Zâu Yê-su coong nâyx đomc woac woax dlih, naih ah lanh cun huyđ toongh nyăngz munh taih quâyc nzac Nănh nyăngz cah đangc ninyh jođ Yê-su coong, “Yaz nyăngz sab nzăngđ ah yađ tayc, jođ stênx stengb ninyh nongc puf laoz nănh, phunz nănh săngh phunb stengb taih. ¹⁹ Zâu Yê-su songđ nyoongz quef cloon Nănh nyăngz stâyb-sây buz lêpc cun huyđ toongh woax lanh munh muf. ²⁰ Woax zanyf, naih ah lanh munh nzif (stynb lotb) (nănh nyăngz stynb seetb samđ) tuz săpc nyâyc nyăngv, nănh yăngh quaix cah đangz taih, clatc Zâu Yê-su nyăngz gwuyz saz. ²¹ Woax lanh munh nzif yămz nyâuđ nyâyh coong, “Yaz năngđ clatc zuc Nănh nyăngz gwuyz, yaz nyăngz gumc six tuz gongx. ²² Zâu Yê-su wynb lauf mangc phătc woax lanh munh nzif songđ coong bux nănh, sây sab lex! Phanv pungx stymz, mâyh nyăngz seenz stymz six zany tuz mâyh nyăngz gumc gongx. woax lanh munh nzif nyăngz gumc songđ lênh dlih gongx seetc nzuf. ²³ Zâu Yê-su nzac cun Huyđ toongh woax lanh munh nyăngz pyau ninyh, mangc phătc munh đungx yămz woa pyom blungh blex nghlingz-nghlingz têx. ²⁴ Nănh songđ coong bux songx munh, “Muf gôh! Nâyx tauh sây sab max tayc đêh, nănh cungb mâyc njoomh lêc, songx munh songđ tinyh đoih jeetx Nănh. ²⁵ Nănh luiđ woax đomc songx munh seetb ninyh nzuf, Zâu Yê-su songđ nzac pyau ninyh, nzauf woax tauh sab nyăngz puf, woax tauh sab songđ lênh dlih nyoongz quef. ²⁶ Nâyx đomc dlayc songđ lănv nzêux woax nomz stâyz phangz. Yê-su zany tuz gongx iz lanh mâyc buđ munh ²⁷ Zâu Yê-su seetb ninyh gâyh woax nomz tync, jămc jau ninyh, naih iz lanh munh lêpc nănh cah đangz ninyh yâuc hamv coong, “Đa-vitv hungh nyăngz sây stunz lex! Jođ hâuđ lênh buz đôih! ²⁸ Nănh nzac pyau ninyh, woa iz lanh mâyc buđ munh lauf lêpc nzac ninyh lov Nănh, Nănh naic coong, “Tah lex! Nyâuh zeen coong yaz hayh zany tuz nyâuh gongx max? Nănh stiz tauz, Zâu lex! buz zeen lêc. ²⁹ Zâu Yê-su songđ lupc nănh stiz nyăngz mâyc yâuc coong, “Nyâuh tuz gongx âyz nyâuh zeen nyăngz jau. ³⁰ Nănh stiz nyăngz mâyc lênh dlih hayh mangc tuz phătc, Zâu Yê-su zăpx nănh stiz coong, “max tuz lănv bux mănv! ³¹ Six woa iz lanh mâyc buđ munh seetb ninyh lănv nâyx đomc dlayc nzêux woax nomz stâyz phangz. Yê-su zany tuz tauh munh oongx hayh coong woac ³² Woax đomc iz lanh munh nzăngđ seetb ninyh blătc, naih ah đomc munh ênz ah lanh munh zuc manđ ayx ăm max hayh coong woac taih phunz Zâu Yê-su. ³³ Zâu Yê-su luiđ manđ seetb ninyh blătc, woax lanh munh songđ lênh dlih hayh coong woac, songx munh phătc njingc songđ lanh coong ănz lanh, “Yămz nây Y-sa-la-ên stâyz phangz max zengx phătc quaix nâyx đomc jix caox njingc nyăngz dlayc. ³⁴ Six Pha-li-si munh coong, “manđ hungh phunz lanyf Nănh hayh luiđ manđ lêc. Yê-su hâuđ lênh pec stingx ³⁵ Zâu Yê-su jămc njăngv jămc stâyz phangz ninyh, yămz Huyđ toongh nzaox munh, yâuc lănv Tênb Côkz nyăngz cuđ jeenx, yâuc zany tuz muif hungđ gumc gongx. ³⁶ Zâu Yê-su phătc munh đungx zuc zâuđ nanc max naih tynh mungc, Nănh seenz numđ hâuđ lênh nzongf, nănh stiz six năngđ Pa-jiz yungh max naih Zâu cun nâyx. ³⁷ Zâu Yê-su bux stâyb-sây buz coong, “Zunb jengz đungx, six congz munh stoc. ³⁸ Năngđ naz, zuc jođ jengz zongx nyăngz Zâu êu congz munh năngx đungx nzac nănh nyăngz njăngx tâyc ninyh sâub nănh nyăngz jengz zunb. Yê-su êu cumh pâuz munh ninyh (Makv 3:13-19; Lu-ca 6:12-16)