19 ¹ Zâu Yê-su nzaox nâyx đomc woac nzuf, Nănh songđ gâyh Ga-li-lê, stâyz phangz ninyh Yu-đê stâyz phangz, Jođ đen coiđ nganc. ² Naih munh hongđ nzongf lêpc Nănh ninyh, Nănh songđ yămz woa zany tuz nănh stiz nyăngz gumc gongx nzuf. ³ Naih batz lanh Pha-li-si munh taih stâyv Zâu Yê-su nănh stiz naic Coong, “Max cun Pha langh hănđ six naih toix laiv hungđ dlayc, nănh naih gâyf quengx nănh nyăngz au max?” ⁴ Zâu Yê-su tauz, ha nyâuh max zengx tuz toc Canyx-stâub, toongz zub Tênb-Hungh zâyx munh baox munh sab mah? ⁵ Nănh coong wâyc nâyx đomc (liv do), Zâu Tênb-Hungh songđ coong, “Munh baox gâyh nănh nyăngz nzif Pha ninyh cloon nănh nyăngz au căpx taih iz lanh six max zâyf săngh ah lanh mah?" ⁶ Wâyc năngđ nâyx, nănh stiz iz lanh six săngh ah lanh, max zâyf iz lanh, laiv hungđ Tênb-Hungh căpx phunz nyăngz stayb-toix, bamh munh max tuz zeb tuz goib. ⁷ Nănh stiz năngx naic, ha săngh laix Mô-sê yâuc nzaox coong, “Langh năngđ quengx nănh nyăngz au six zuc ja ah zây ah tinyh gâyh stâub phunz nănh, nzof mănc luiđ nănh tyuv! ⁸ Zâu Yê-su tauz, six wâyc nyâuh nyâuđ nhlengc yongb, Mô-sê nzăngđ phunz nyâuh tuz gâyh nyâuh nyăngz au, six tăng quef coonz max naih năngđ nâyx đêh. ⁹ Laiv lanh quengx nănh nyăngz au, yâuc max zâyf nănh nyăngz au stymz lub, bix pitc lanh ninyh zoz woax tauh munh nzif zuc quengx six lauf săngh pongz lauh nyăngz munh. ¹⁰ Stâyb-sây buz bux Nănh coong, “Năngđ coong nongc au nongc langh bix zâuđ năngđ nâyx, stâyv quâyx max zoz six năngx gongx têx. ¹¹ Zâu Yê-su bux coong, “Yaz nzaox nâyx đomc woac, max zâyf muif lanh stipx tuz đêh, cungb tuz Zâu sađ Pôz phunz woax đomc munh nzăngđ stipx tuz lêc đêh. ¹² Songđ wâyc naih ah phanx munh tăng stengb stâyv taih yâuc max hayh zoongz pyau, ah phanx zuc munh ymz max hayh zoongz pyau, ah phanx wâyc oix ayx Tênb-toongh Côkz nyăngz cumh pâuz max zoongz pyau, laiv lanh âyz tuz nâyx đomc woac bix ayx gôh. Yê-su poou woac phunz munh sây (Makv 10:13-16; Lu-ca 18:15-17) ¹³ Naih ah đomc munh oix ênz sây taih phunz Zâu Yê-su tăpx puf ănz coouv Zâu, six stâyb-sây buz yônx woax đomc munh. ¹⁴ Zâu Yê-su coong, “Phanv phunz munh sây taih lov yaz, max cuyb tăng nănh stiz, songđ wâyc laiv lanh nongc Tênb-Hungh cun nănh six năngđ nâyx đomc munh sây nâyx gôh. ¹⁵ Nănh tăpx puf ănz woax đomc munh sây coouv Zâu nzuf songđ ninyh gâyh woax nomz tync. Puv quâyx munh gunx naic nyăngz woac (Makv 10:17-31; Lu-ca 18-30) ¹⁶ Naih ah lanh munh taih naic Zâu Yê-su coong, “Stênx-stengb lex! Yaz six zuc ayx toix laiv hungđ gongx nyăngz dlayc nzăngđ tuz stâyv quâyx nyăngz mengc loz? ¹⁷ Zâu Yê-su tauz, săngh laix tah bix taih naic tauv ayx gongx nyăngz jau? Cungb naih ah tauh Tênb-Hungh gongx cungv, mâyh năngđ oix tuz stâyv quâyx nyăngz mengc six zuc âyz seenz gâyf ayx. ¹⁸ Woax tauh munh naic, “Stênx stengb lex! Toix laiv tyuh lanyf loz? Zâu Yê-su bux coong, “Max cuyb tayx munh, max tuz ayx stac, max tuz stymz yêuz ayx pongz lauh, yâuc max tuz ayx za zanyx manyf hoiđ munh. ¹⁹ Seenz zuc jâuz mâyh nyăngz nzif pha, yâuc zuc stăngz munh năngđ stăngz pănh nyăngz stynb nâyx. ²⁰ Woax tauh munh gunx tauz coong, “Nâyx đomc lanyf yaz bêc âyz nzuf nzof gôh, six năngx sămv toix laiv hungđ tymb max? ²¹ Zâu Yê-su bux nănh coong, “Six coong tah năngđ oix tuz clakx clunh têx, six zuc muf maic nzuf mâyh nyăngz jax toongx, bix nzâyz woax đomc nyanh ninyh patz phunz munh zâuđ munh, ayx năngđ ha mâyh nzăngđ tuz naih huv saix zaub ănz woa Tênb-toongh Côkz, ayx nzuf nâyx đomc dlayc bix taih lêpc yaz gôh! ²² Woax tauh munh gunx numđ nzuf nâyx đomc woac, nănh seenz numđ stauh nzongf, songđ taux woa tyuv gâyh, wâyc zuc nănh nyăngz jax toongx huv nzongf. ²³ Zâu Yê-su năngx naic Nănh nyăngz stâyb-sây buz coong, “Yaz coong seenz bux nyâuh, puv quâyx munh nzac Tênb-toongh Côkz seenz Zâuđ nzongf. ²⁴ Yaz năngx bux phunz nyâuh pâyz tymb! Maf loh seenb quaix stymb bluic six năngx hâyđ têx, puv quâyx munh nzac Tênb-Hungh nyăngz Côkz. ²⁵ stâyb-sâyb buz numđ nâyx đomc woac, nănh stiz seenz numđ njingc nzongf! Songđ naic, ha six mănv nzăngđ tuz Njâuv?” ²⁶ Zâu Yê-su mangc quaix nănh stiz ninyh yâuc coong, “Bamh munh max cănh hayh Njâuv stynb, six muif hungđ dlayc Tênb-Hungh hayh ayx tuz nzuf. ²⁷ Phê-rơ naic coong, “Stâyb-pha lex! Buz quanyf nzuf muif hungđ taih lêpc Mâyh, ha buz six tuz nhleenz tâuv? ²⁸ Zâu Yê-su bux nănh stiz coong, “Yaz lănv seenz bux nyâuh, Tauv coi wănc săngb gungh săngb nib woax zanyf, Yaz bamh munh nyăngz Toonz, stâyv woa gwăngz-eng nyăngz tync woax zanyf, nyâuh lêpc yaz nyăngz munh nzăngđ tuz stâyv woa săpc nyâyc nomz đah mâyf, stămđ săpc nyâyc stingx Y-sa-la-ên munh. ²⁹ Laiv lanh wâyc yaz bix zuc quanyf nănh nyăngz pyau sây nzif pha, au sây yâuf pez, njăngx njingh tâyc, nănh quanyf ah phănc, six tuz ah pez phănc, yâuc năngx tuz cloon stâyv quâyx nyăngz mengc. ³⁰ Six naih munh đungx oix stâyv staox tync njăngb six zuc lotb tuih nzac tync hav, six zâyf năngx naih munh đungx nhlimc ayx jeenz yămz tync hav six tuz pâuh staox stâyv tync năngx njăngb quaix. Tungh cuđ lauđ wynb nyăngz woac pây