12
1
Quaix đangz max lauh, toix tingc congz noib, Zâu Yê-su clăngv quaix ah tyuh njăngx blauh ninyh, stâyb-sây buz nyâuđ sab songđ mătx blauh nyun nutx nhlync.
2
Naih đomc Pha-li-si munh phătc songđ coong ănz Nănh, mangc geh Mâyh nyăngz stâyb-sâyb buz ayx longđ tingc congz noib nyăngz gâyf.
3
Zâu Yê-su tauz, nyâuh max zengx tuz hođ quaix nâyx đomc jau mah? Đa-vitv hungh, cloon lêpc nănh woax đomc munh nyâuđ sab woax dlih, nănh stiz ayx laix?
4
Đa-vitv hungh nzac congx Tênb-Hungh nyăngz pyau ninyh, zoz congx phunz Zâu Tênb-Hungh woax đomc nzu đăngb nhlync, yâuc phunz cloon lêpc nănh woax đomc munh nhlync, woax đomc nzu six cungb stayb-munh nzăngđ naih gâyf nhlync.
5
Nyâuh max zengx tuz hođ quaix Đoouc-lif gâyf stâub mah? Stayb-munh yămz congx Tênb-Hungh nyăngz pyau njaf ayx longđ tingc congz noib woax đomc max zâyf stoif mah?
6
Yaz coong bux nyâuh, six nâyx zanyf yămz nây naih ah tauh ayx năngx lub têx tingc congz noib.
7
Nyâuh năngđ pâyz tuz nâyx zâux woac nyăngz âyz gâyf têx, nyâuh six max zoz max naih stoif nyăngz munh nzâyz ninyh tingc stoif. Yaz six cungb oix nongc munh naih nyâuđ hâuđ lênh munh, max zâyf oix nongc stanyb-lanyh congx.
8
Wâyc zuc yaz bamh munh nyăngz toonz six ayx tingc congz noib nyăngz Zâu.” Yê-su zany gongx tauh puf quac munh (Makv 3;1-6; Lu-ca 6-11)
9
Zâu Yê-su gâyh woax cuyb tync, songđ nzac ah siênz huyđ toongh pyau ninyh.
10
Yămz woa naih ah lanh munh ah saz puf quac, naih munh oix cooux Zâu Yê-su, nănh stiz songđ lov jau naic Nănh coong, “Nongc tingc congz noib zany gumc longđ gâyf max?”
11
Nănh songđ tauz coong, “nyâuh naih laiv lanh toix tingc congz noib, bix naih ah tauh pa-jiz tuih cotb, nyâuh max zâyf lov jau ninyh zoz nănh seetb taih mah?
12
Ah lanh munh six năngx saix têx ah tauh pa-jiz yungh, nongc tingc congz noib ayx gongx dlayc six tuz lec.
13
Zâu Yê-su songđ bux puf quac munh coong, “Stungb mâyh nyăngz puf seetb taih jađ! Nănh stungb seetb taih woax saz puf quac lênh dlih gongx, năngđ woax gunf saz nâyx.
14
Pha-li-si munh songđ seetb ninyh sangv gwoangh! Pănh six ayx laix hayh tayx tuz Nănh. Tênb-Hungh sên taih nyăngz pâuz
15
Six Zâu Yê-su pâyz tuz nănh stiz ta zux ix, Nănh songđ tyuv blătc woax nomz tync, pyeenv quaix pitc đoif ninyh, năngx naih munh đungx lêpc Nănh ninyh, Nănh songđ zany tuz muif lanh munh nyăngz gumc gongx nzuf.
16
Yâuc zăpx bux nănh stiz coong, “Max tuz lănv bux mănv coong, Yaz six laiv tauh.
17
Nănh ayx nyăngz dlayc seetb taih songđ toix nzuf Ê-sai coong nyăngz woac.
18
Nây six yaz sên taih nyăngz pâuz, yaz seenz numđ stăngz Nănh nzongf, Yaz sađ singx-lingh phunz Nănh, Nănh songđ ninyh lănv pengh stymz nyăngz jau phunz đâuf munh mungv.
19
Nănh max tinyh nzengz, max hamv buib, yâuc max naih mănv numđ Nănh nyăngz stingb yămz woa stengv cah njaf.
20
Lauđ tic queng păpc Nănh yâuc max zutb seetc, toongz stynx laiđ Nănh yâuf max pyom tayc, Nănh ayx năngđ nâyx phunz pengh stymz nyăngz jau tuz hingh.
21
Muif stingx đâuf munh tăpx njih mungc tync ănz Mâyh nyăngz bux songđ tuz gongx. Yê-su cloon manđ nyăngz hungh (Makv 3:20-30; Lu-ca 11:14-23)
22
Woax zanyf munh ênz ah lanh munh zuc manđ ayx mâyc buđ, yâuc max hayh coong woac, Zâu Yê-su zany gongx phunz nănh hayh coong woac, yâuc hayh mangc tuz phătc jau.
23
Songx munh phătc njingc songđ coong, “Lâyc tauh max zâyf Đa-vitv hungh nyăngz sây stunz mah?
24
Pha-li-si munh numđ lănv nâyx đomc dlayc, nănh stiz coong, “Lâyc tauh munh hayh luiđ manđ, six wâyc Nănh nongc Bê-ên-sê-bun manđ Hungh nyăngz lanyf luiđ manđ lec.
25
Zâu Yê-su pâyz tuz nănh stiz nyâyh ayx laix, Nănh songđ coong, “laiv nomz Côkz phunz ayx đungx peob, woax nomz Côkz six max tuz clunh, laiv nomz stengv, mah six laiv siênz pyau munh, phunz lunc ayx sax đomc, tinyh bopc six zuc stutc nzuf.
26
Năngđ coong Sax-tanx năngđ cănh luiđ Sax-tanx têx, six cănh zeb nănh nyăngz Côkz lunc nzuf, nănh nyăngz Côkz ayx laix hayh yămz tuz wăn?
27
Năngđ coong Yaz nongc Bê-ên-sê-bun manđ nyăngz lanyf luiđ manđ, nec têx, nyâuh nyăngz stâyb sây nongc laiv tauh nyăngz lanyf luiđ manđ? Năngđ naz nyâuh nyăngz stâyb sây songđ ayx phunz nyâuh stunx coong nyâuh ayx longđ nzuf gôh.
28
Six yaz năngđ coouv Tênb-Hungh nyăngz Singx-lingh luiđ manđ têx, Tênb-Hungh six taih ayx Zâu cun nyâuh nzof gôh.
29
Naih laiv lanh munh ninyh paiv munh nyăngz pyau, bix max stayb woax tauh munh njoongh đangc, ayx laix hayh zoz nănh nyăngz jax toongx?
30
Laiv lanh max lêpc yaz six tămx Yaz, laiv tauh max cloon yaz sâub dlonf, nănh six loou lunc.
31
Yaz coong seenz bux nyâuh, munh coong pamf yeetx stong stoif, cloon coong peo nyăngz yeetx stong woac, Tênb-Hungh năngx quanyf stoif phunz, six laiv lanh coong pamf Singx-lingh six max tuz quanyf stoif.
32
Laiv tauh coong peo yaz bamh munh nyăngz toonz, six nănh năngx tuz quanyf stoif, six laiv lanh coong peo Singx-lingh, nănh hănđ yămz yangh stâyv, mah six yămz woa yămz pâu, nănh six max tuz quanyf stoif gôh. Phătc pyâu songđ saz njăngx (Lu-ca 6:43-45)
33
Năngđ coong njăngx gongx six săngh pyâu gongx, njăngx huđ six săngh pyâu huđ. mangc pyâu songđ saz tuz njăngx.
34
Nyâuh lâyc đomc nangz đokc nyăngz phănc lex? Okx njangh nyăngz nyâuđ ayx laix hayh coong tuz woac gongx? Nyâuh nyăngz nyâuđ njaf ănz pong huđ dlayc, nzeetx songđ coong seetb woax hungđ gôh.
35
Munh gongx sâub muif hungđ gongx ănz nyâuđ, coong seetb taih yâuc gongx, munh huđ nyăngz nyâuđ ănz pong huđ nyăngz dlayc. Songđ coong seetb woax hungđ huđ taih.
36
Yaz coong bux nyâuh, tauv stămđ stoif woax noib, mănv coong nyăngz woac, nănh songđ cănh zuc đamz toongz.
37
Tauv stămđ stoif woax noib, tuz quanyf stoif, max six max tuz quanyf stoif, six yămz nyâuh coong nyăngz woac. Munh jođ jix caox njingc mangc (Makv 8:11-12; Lu-ca 11:29-32)
38
Blătc woa naih ah đomc Pha-li-si munh, cloon nzaox gâyf Stênx stengb taih coong ănz Nănh, “stênx stengb lex! Buz oix mangc Mâyh ayx ah hungđ jix caox njingc nyăngz dlayc.
39
Zâu Yê-su tauz, nâyx yeenh stâyv nyâuđ huđ nyăngz munh lex! Blătc nzuf tâuc woac munh Yô-na, nyăngz jix caox njingc, pitc hungđ nyâuh max tuz phătc.
40
Yô-na yămz byauf lub nyâuđ njaf tuz pôz noib pôz munf, Yaz bamh munh nyăngz toonz lauf năngđ ha, zuc yămz nib đi tuz pôz noib pôz munf.
41
Tauv stămđ stoif woax noib, Ni-na-ve munh songđ nyoongz quef cooux nâyx yeenh stâyv munh, wâyc zuc Yô-na ninyh Lănv Cuđ jeenx woax dlih, nănh stiz songđ lauf coi nyâuđ quanyf stoif nzof, six nâyx zanyf yămz nây naih ah tauh ayx năngx lub têx Yô-na.
42
Tauv stămđ stoif woax noib, yămz namh phanx woax tauh munh Nzif hungh songđ nyoongz quef cooux nâyx yeenh stâyv munh, wâyc zuc woax tauh hungh nzif tăng namh phanx gungh coonz taih mungv Sa-lô-môn hungh nyăngz tongb manyh woac. Six Yaz coong bux nyâuh, nâyx zanyf yămz nây naih ah tauh ayx năngx lub têx Sa-lô-môn hungh tymb! Stanyv manđ seetb ninyh năngx lauf lov lôx tync (Lu-ca 11:24-26)
43
Manđ tăng munh stynb seetb taih woax dlih, nănh yâuh ninyh woa stâyz phangz blănf lov tync, yâuc lov max tuz tync sec.
44
Manđ coong, "(a) yaz cănh muf lov lôx pyau yămz lêc. Nănh muf tex phătc nănh nyăngz lôx pyau nzâux dlăngc wayh woa.
45
Nănh songđ ninyh lov nhlic tauh manđ năngx huđ têx nănh lauf cloon nănh yămz woax siênz pyau, woax tauh munh songđ năngx zâuđ têx cah đangc noib, nâyx yeenh stâyv munh nyâuđ huđ lauf năngđ ha. Yê-su nyăngz nzif cloon nănh nyăngz yâuf (Makv 3:31-35; Lu-ca 8:19-21)
46
Zâu Yê-su cloon songx munh lănv woac woax dlih, Nănh nyăngz nzif cloon nănh nyăngz yâuf taih stâuđ woa pyau cungh ngwoaic oix pongh Nănh lănv woac.
47
Naih munh bux Nănh coong, “Mâyh nyăngz nzif cloon Mâyh nyăngz yâuf taih stâuđ woa pyau cungh ngwoaic oix pongh cloon Mâyh lănv woac.
48
Zâu Yê-su tauz, “Laiv tauh ayx yaz nyăngz nzif, cloon yaz nyăngz yâuf pez?
49
Nănh nuz woax đomc stâyb sây buz coong, “nâyx đomc six yaz nyăngz nzif cloon yaz nyăngz yâuf pez.
50
Laiv lanh âyz Tênb-toongh pha nyăngz âyx ayx, woax đomc nzăngđ zâyf yaz nyăngz yâuf pez, cloon yaz nyăngz nzif. Hav nhlimb nyăngz woac pây (Makv 4:1-9; Lu-ca 8:4-8)