¹ Zâu Yê-su nzac đangđ ninyh clăngv muf woax nganc wăngx synh ninyh tauv nănh nyăngz stâyz phangz. ² Naih ah đomc munh zoz siu zengz ah tauh gumc quac munh taih lov Zâu Yê-su, nănh phătc woax đomc munh zeen tuz gongx, nănh songđ coong ănz woax tauh gumc quac munh, “sây lex! Phanv pungx stymz bex, mâyh nyăngz stoif tuz quanyf nzuf nzof gôh. ³ Naih ah đomc nzaox gâyf Stênz stengb yămz nyâuđ nyâyh coong, “ê, tauh ya munh coong pamf Tênb-Hungh nac. ⁴ Zâu Yê-su pâyz tuz nănh stiz yămz nyâuđ nyâyh ayx naz, nănh songđ coong, “ săngh laix nyâuh bix nyâyh tuz huđ nâyx yeh? ⁵ Nâyx iz zâux woac laix zâux coong năngx hâyc têx? Cayx coong mâyh nyăngz stoif tuz quanyf nzuf gôh, max six coong, “nyoongz Quef muf gôh mah six loz? ⁶ Six yaz oix phunz nyâuh pâyz tuz yaz bamh munh nyăngz toonz, yămz nây gungh đi naih lanyf Quanyf munh nyăngz stoif. Zâu Yê-su songđ bux gumc quac munh, “nyoongz Quef nzâyz mâyh nyăngz siu muf pyau gôh. ⁷ Woax tauh munh songđ nyoongz quef muf pyau. ⁸ Songx Munh phătc năngđ nâyx, nănh stiz cumh nzav nzongf songđ tanv Zâu Tênb-Hungh. Songđ wâyc nănh phunz nâyx đomc lokc jangx munh. ⁹ Zâu Yê-su ninyh gâyh woax tix tync, phătc naih ah lanh munh bux hipđ ayx Ma-thi-ơ. Stâyv woa sâub sôiv tync, nănh êu coong, “taih lêpc yaz gôh, Ma-thi-ơ lênh dlih nyoongz quef lêpc Yê-su ninyh. ¹⁰ Zâu Yê-su yămz Ma-thi-ơ nyăngz pyau nhlync năngv woax dlih, naih stăngc Lô-ma Hungh sâub sôiv nyăngz munh đungx, yâuc cloon manyh tauh huđ nyăngz munh, cloon stâyb sây buz songc hynh nhlync năngv. ¹¹ Naih ah đomc Pha-li-si munh phătc songđ naic stâyb sây buz, săngh laix nyâuh nyăngz stâyb pha bix cloon sâub sôiv munh, yâuc cloon manyh tauh huđ nyăngz munh songc nhlync năngv? ¹² Zâu Yê-su numđ coong naz, nănh songđ tauz, “munh zoongx munh max sămv zuc lov mađ stangc, cungb săngh gumc munh nzăngc sămv zuc mađ stangc. ¹³ Nyâuh oix zuc ninyh hođ năngx pâyz, nâyx zâux woac nyăngz âyz gâyf, yaz oix nongc munh naih nyâuđ stăngz munh, max zâyf oix nongc stanyb lanyh, yaz max zâyf taih lov munh gongx munh, six yaz taih lov stoif munh. ¹⁴ Woax zanyf, stăngc munh ayx quaix womz nyăngz gâyf woax tauh Dăng nyăngz stâyb sâyb taih naic Zâu Yê-su, săngh laix buz cloon Pha-li-si munh njynh leox bix zuc njif nhlync, săngh laix mâyh nyăngz stâyb sây yâuc max zâuđ njif nhlync? ¹⁵ Zâu Ye-su tauz, săngb langh năngx yămz coonx hynh woax dlih, zeb munh năngx numđ stauh max? Six tauv bengc noib săngb langh zuc ênz ninyh woax dlih, zeb munh nzăngc zuc njif max nhlync tax hungđ. ¹⁶ Yâuc max naih mănv nongc săngb buyx va lôx gwuyz, wâyc zuc nănh hayh đănx phunz lôx gwuyz byaif năngx lub têx. ¹⁷ Yâuc max naih laiv lanh zoz săngb tungh côh tyu ănz lôx đupx tic, ănz six tyu siv zungx đupx tic canyz tyu seetb nzuf, săngb tyu six ănz săngb đupx tic, ayx năngđ naz nzăngc hayh leđ tuz iz hungđ. ¹⁸ Zâu Yê-su coong nâyx đomc woac ` woax dlih, naih ah tauh cun huyđ toongh nyăngz munh taih quâyc nzac nănh nyăngz cah đangc ninyh jođ nănh coong, “yaz nyăngz sab nzăngc ah yađ tayc, jođ stênz stengb ninyh nongc puf laoz nănh, phunz nănh săngh phunb stengb taih. ¹⁹ Zâu Yê-su nyoongz quef, cloon nănh nyăngz stâyb sây buz lêpc cun huyđ toongh woax tauh munh muf. ²⁰ Woax zanyf, naih ah lanh munh nzif stynb lotb tuz săpc nyâyc nyăngv, nănh yăngh quaix cah đangz taih, clatc Zâu Yê-su nyăngz gwuyz saz. ²¹ Woax tauh munh nzif yămz nyâuđ nyâyh coong, “yaz năngđ clatc zuc nănh nyăngz gwuyz, yaz nyăngz gumc six tuz gongx. ²² Zâu Yê-su winb lauf mangc phătc woax tauh munh nzif songđ Coong bux nănh, sây sab lex! Phanv pungx stymz, mâyh nyăngz seenz stymz six zany tuz mâyh nyăngz gumc gongx. woax tauh munh nzif nyăngz gumc lênh dlih gongx seetc nzuf. ²³ Zâu Yê-su nzac cun Huyđ toongh woax tauh munh nyăngz pyau ninyh, mangc phătc munh đungx yămz woa pyom blungh blex nghlingz-nghlingz têx. ²⁴ Nănh songđ bux songx munh coong, “muf gôh! Nâyx tauh sây sab max tayc đêh, nănh cungb mâyc njoomh lêc, songx munh tinyh đoih jeetx nănh. ²⁵ Luiđ woax đomc songx munh seetb ninyh nzuf, Zâu Yê-su songđ nzac ninyh, nzauf woax tauh sab puf, woax tauh sab songđ lênh dlih nyoongz Quef. ²⁶ Nâyx đomc dlayc lănv pong woax nomz stâyz phangz. ²⁷ Zâu Yê-su seetb ninyh gâyh woax nomz tync, jămc jau ninyh, naih iz lanh munh lêpc nănh cah đangz ninyh yâuc hamv coong, “Đa-vitv Hungh nyăngz sây stunz lex! Jođ hâuđ lênh buz đôih! ²⁸ Nănh nzac pyau ninyh, woa iz lanh mâyc buf munh lauf lêpc nzac ninyh lov nănh, nănh naic coong, “tah lex! Nyâuh zeen coong yaz hayh zany tuz nyâuh gongx max? Nănh stiz tauz, Zâu lex! Buz zeen lec. ²⁹ Zâu Yê-su songđ lupc nănh stiz nyăngz mâyc yâuc coong, “nyâuh tuz gongx âyz nyâuh zeen nyăngz jau. ³⁰ Nănh stiz nyăngz mâyc lênh dlih mangc tuz phătc, Zâu Yê-su zăpx bux nănh stiz coong, “max tuz lănv bux mănv bex! ³¹ Six woa iz lanh mâyc buf munh seetb ninyh lănv nâyx đomc dlayc pong woax nomz stâyz phangz. ³² Woax đomc iz lanh munh nzăngc seetb ninyh blătc, naih ah đomc munh ênz ah lanh munh zuc manđ ayx ăm max hayh coong woac taih phunz Zâu Ye-su. ³³ Zâu Yê-su luiđ manđ seetb ninyh blătc, woax tauh munh lênh dlih hayh coong woac, songx munh phătc njingf songđ, lanh coong ănz lanh, “ yămz nây I-sa-la-ên nyăngz stâyz phangz max zengx phătc quaix nâyx đomc jix caox njingf nyăngz dlayc. ³⁴ Six Pha-li-si munh coong, “manđ Hungh phunz lanyf nănh hayh luiđ manđ lêc. ³⁵ Zâu Yê-su jămc njăngv jămc stâyz phangz ninyh, yămz Huyđ toongh nzaox munh, yâuc lănv tênb Côkz nyăngz jeenx, yâuc zany tuz muif hungđ gumc gongx. ³⁶ Zâu Yê-su phătc munh đungx zuc zâuđ nanc max naih tynh mungc, nănh seenz numđ hâuđ lênh nzongf, nănh stiz cayx năngđ Pa-kiz yungh max naih Zâu cun nâyx. ³⁷ Zâu Yê-su bux stâyb sây buz coong, “zunb jengz đungx, six congz munh stoc. ³⁸ Năngđ naz, zuc jođ jengz zongx nyăngz Zâu paiđ congz munh năngx đungx nzac nănh nyăngz njăngx tâyc ninyh sâub nănh nyăngz jengz zunb.