¹ Zâu Yê-su phătc munh đungx nzongf, nănh songđ staox woa zoongz ninyh stâyv woa, nănh nyăngz stâyb sây buz yâuc taih dlonf woa. ² Zâu Yê-su songđ quef coonz nzaox nănh stiz coong, ³ Cănh pâyz tuz sămv Zâu Tênb-Hungh woax đomc naih gwanb-loc gôh, songđ wâyc Tênb-toongh Côkz six săngh stiz nyăngz. ⁴ Naih stauh woax đomc tuz gwanb-loc gôh, wâyc naih Zâu Tênb-Hungh stăngc zay stauh. ⁵ Nyâuđ dlênc woax đomc naih gwanb loc gôh, songđ wâyc Zâu Tênb-Hungh nyunc phunz nyăngz phănc, nănh stiz six tuz stipx nzuf . ⁶ Ngoc oix ayx hopđ Zâu Tênb-Hungh nyăngz nyâuđ woax đomc naih gwanb loc gôh, songđ wâyc Zâu Tênb-Hungh oix phunz nănh stiz tuz pong âyx. ⁷ Hâuđ lênh munh woa đomc naih gwanb-loc gôh, songđ wâyc tuz Zâu Tênb-Hungh oix hâuđ lênh nănh stiz. ⁸ Nyâuđ đăngb-zengh nyăngz munh naih gwanb-loc gôh, songđ wâyc nănh stiz six tuz phătc Zâu Tênb-Hungh. ⁹ Quynb iz phanx hopđ nyâuđ taih woax đomc naih gwoanb loc gôh, wâyc zuc nănh stiz tuz hipđ ayx Zâu Tênb-Hungh nyăngz toonz sab. ¹⁰ Âyz Zâu Tênb-Hungh nyăngz zux ix ayx, bix zuc munh ayx peo woax đomc naih gwanb loc, wâyc naih Tênb-Hungh cun nănh stiz. ¹¹ Nyâuh wâyc yaz zuc munh ayx peo, zuc munh hănđ, zuc munh phătc stanc, naih gwanb loc gôh. ¹² Nyâuh six zuc pungx stymz numđ nyađ, wâyc naih sâuđ nyâyc yămz woa Tênb-toongh phunz nyâuh, lôx noib tâuc woac munh lauf zuc hoiđ năngđ nâyx gôh. ¹³ Nyâuh six năngđ đau wâyc yămz nây bamh munh mungh tongx, six coong đau nyăngz mic toiv stam, ayx laix năngx hayh ayx tuz đaih yeh? Woax đomc đau six max săngh nongc, six zuc taox Quanyf phunz munh zaic cungv. ¹⁴ Nyâuh six năngđ gwăngz syux gungh đi munh, năngđ ah nomz stengv yămz woa zoongz zâyc đany max hayh pinyx tuz vâyv munh. ¹⁵ Max naih mănv pu tuz toongz sac bix năngx zoz tongc zom, toongz six nzâyz ninyh tăpx ănz woa toongz nzanc, syux gwăngz lomc ah sênz pyau munh. ¹⁶ Nyâuh six năngđ ah zây toongz syux Gungh đi munh, năngđ naz nănh stiz phătc nyâuh ayx tuz gongx, munh songđ tanv nyâuh nyăngz Tênb-toongh Pha. ¹⁷ Năngx gâyf nyâyh coong yaz taih quanyf Đouc-lyf gâyf cloon tâuc woac munh nyăngz woac, yaz max zâyf taih quanyf, six yaz taih wâyc phunz muif hungf seetb taih seenz. ¹⁸ Yaz coong seenz bux nyâuh, tinyh phanv Gungh đi năngx yămz têx, Đoouc-lyf gâyf nyăngz đăngc ah wengh ah matb đăngc max bây tuih, zu tauv muif hungđ tuz clakx clunh nzuf. ¹⁹ Năngđ ha toix tauh longđ njynh stăm Quaix woax tyuh gâyf, năngx nzaox munh longđ cloon têx, yămz woa Tênb-toongh Côkz nănh six ayx năngx jeenz Quaix, six toix tauh mungv gâyf nzuf yâuc âyz ayx, năngx nzaox munh ayx âyz têx, yămz woa Tênb-toongh Côkz, woax tauh tuz ayx lub. ²⁰ Yaz coong seenz bux nyâuh, “nyâuh lêpc Tênb-Hungh six năngx gongx têx, lêpc Pha-li-si munh cloon nzaox gâyf stênx-stengb, năngđ max têx, nyâuh six max hayh tuz nzac Tênb-toongh Côkz. ²¹ Lôx noib nzaox munh nâyx đomc woac nyâuh yâuc tuz numđ Quaix, năngx gâyf tayx munh, laiv tauh tayx munh six zuc tingc stoif. ²² Yaz năngx bux nyâuh, toix tauh siv nhleenx nănh nyăngz yâuf pez songđ lauf zuc stămđ stoif, toix tauh mađ nănh nyăngz yâuf pez hipđ ayx cungb cađ munh oongx max săngh nongc, six zuc ênz woax tauh ninyh stămđ stoif, toix tauh mađ nănh nyăngz yâuf pez hipđ ayx munh vutx, six jic tuz tuih nzac tâuf coiđ. ²³ Năngđ naz, six coong nyâuh nzâyz tax hungđ ninyh congx phunz Zâu Tênb-Hungh săngx tauv nyâuh naih cloon yâuf pez max tinyh hođ. ²⁴ Six zuc zoz nyâuh nzâyz ninyh tax hungđ ănz congx toongh cah synh đangc. Ninyh cloon nyâuh nyăngz yâuf pez coong năngx hođ nzof mănc zoz nyâuh nyăngz tax hungđ congx phunz Zâu Tênb-Hungh. ²⁵ Năngđ coong naih munh coux nyâuh, ênz nyâuh ninyh stămđ stoif, ninyh max zengx tauv tync, nyâuh oix zuc cloon nănh stiz coong năngx hođ đangc, sangx ninyh tauv woa nănh hayh zoz nyâuh jaoz phunz stămđ stoif quanz, quanz songđ jaoz nyâuh phunz pengz, nyâuh songđ zuc clăngđ ănz nzauh. ²⁶ Yaz coong seenz bux nyâuh, nyâuh six zuc clăngđ tauv nyâuh clao nzuf max sămv ah nomz tongh stynh zaix nyâuh nzăngđ tuz seetb nzauh. ²⁷ Nyâuh tuz numđ quaix lôx noib nzaox munh nâyx đomc woac, năngx gâyf ayx pongz lauh nyăngz jau. ²⁸ Yaz Coong seenz bux nyâuh, laiv lanh phătc munh nzif yâuc nyâyh oix tac nănh têx, six stymz nyâuđ longđ nzuf gôh. ²⁹ Năngđ coong nyâuh nyăngz byaoh phanx mâyc jaf nyâuh longđ stoif, six zuc ngwâyz quengx, bây stynb stayđ huđ hanyh six năngx gongx têx, njynh stynb tuih nzac tâuf coiđ. ³⁰ Năngđ toix nyâuh nyăngz byaoh puf ayx phunz nyâuh pamf stoif, six zuc cumv ayx Quengx, stoc ah saz puf six năngx gongx têx, njynh stynb tuih nzac tâuf coiđ. ³¹ Naih ah Zâux woac Coong, “laiv lanh quengx au six zuc ja ah zây tinyh gâyh stâub phunz nănh. ³² Nâyx zanyf yaz năngx coong bux nyâuh, laiv lanh Quengx au, yâuc max zâyf wâyc au stymz lub oix pitc lanh munh pha, nănh six ayx phunz woax tauh munh nzif săngh pongz lauh nyăngz munh, nzof woax lanh munh nzif năngx zoz đangz pha lauf săngh pongz lauh nyăngz munh. ³³ Nyâuh lauf tuz numđ quaix lôx noib nzaox munh nâyx đomc woac, max tuz pungx đutb nyâuh nyunc nyăngz woac, nyâuh yămz Zâu nyăngz cah đangc nyunc toix laiv hungđ woac six zuc ayx âyz. ³⁴ Six nâyx zanyf yaz năngx bux nyâuh, nongx gâyf tôn laiv hungđ, năngx gâyf nuz gungh tôn, wâyc zuc gungh six Tênb-Hungh nyăngz tync. ³⁵ Yâuc năngx gâyf nuz nib tôn, wâyc nib six nănh nyăngz staux tungh tapc tync. Yâuc năngx gâyf nuz Yê-lu-sa-lem stengv tôn, wâyc zuc Yê-lu-sa-lem stengv six Hungh stix nyăngz tync. ³⁶ Lauf năngx gâyf nuz nyâuh nyăngz pyây tôn, wâyc nyâuh max hayh ayx tuz nyâuh nyăngz pyây đongz jaz max six pec. ³⁷ Six nyâuh phanv coong zac, zâyf six max zâyc tuz nzof gôh, năngx staix coong đungx têx pâu six tăng manđ taih. ³⁸ Nyâuh đomc numđ quaix lôx noib nzaox munh nâyx zâux woac, Mâyc clao mâyc, nyah clao nyah. ³⁹ Six nâyx zanyf yaz bux nyâuh, munh ayx longđ peo nyâuh năngx gâyf clao yônz, six coong naih munh panx nyâuh nyăngz byaoh phanx mynb, oix zuc winb njynh staix phanx phunz nănh stiz panx. ⁴⁰ Năngđ coong naih munh oix coux nyâuh zoz nyâuh nyăngz gwuyz têx, six zuc phunz njynh gwuyz đao nănh stiz. ⁴¹ Năngđ coong munh yac nyâuh nyax tax hungđ ninyh ah gâyf jau, nyâuh six zuc stăngc nănh stiz nzâyz ninyh iz gâyf. ⁴² Munh jođ nyâuh nyăngz tax hungđ yâuc zuc phunz, munh ca tax hungđ nongc six zuc phunz nănh stiz nongc. ⁴³ Nyâuh yâuc tuz numđ lôx noib munh nzaox nyăngz woac, six zuc stăngz nyâuh nyăngz yâuf pez, bix hănđ nyâuh nyăngz yônz zaz. ⁴⁴ Six nâyx zanyf yaz bux nyâuh, six zuc stăngz hănđ nyâuh ayx peo nyâuh woax đomc, yâuc zuc clo Zâu phunz nănh stiz. ⁴⁵ Nyâuh ayx năngđ naz songđ săngh Zâu Tênb-toong pha nyăngz sây. Max cun munh gongx munh huđ, Zâu Tênb-Hungh yâuc phunz bah noib syux gwăngz tinyh năngđ, nănh ayx bungc nzac taih phunz tinyh năngđ, nzâux phunz ayx gongx ayx huđ nyăngz munh tuz tinyh năngđ. ⁴⁶ Năngđ coong nyâuh cungb stăngz ayx gongx ănz nyâuh woax đomc, Zâu Tênb-Hungh ayx laix hayh phunz sâuđ nyâyc nyâuh? njynh sâub sôiv woax đomc munh yâuc ayx năngđ naz. ⁴⁷ Năngđ coong nyâuh cungb lănv woac ănz stăngz nyâuh woax đomc nyâuh ayx laix hayh năngx gongx têx songx munh? max zengx pâyz Zâu Tênb-Hungh woax đomc munh max zâyf lauf hayh ayx nâyx mah? ⁴⁸ Năngđ naz nyâuh six zuc ayx clakx clunh, năngđ nyâuh nyăngz Tênb-toongh pha ayx tuz clakx clunh nâyx.