¹ Quaix nzuf tingc congz noib, cah đangz woax noib six layf paix yeetx nyăngz noib. Gungh cayx gwăngz Ma-đơ-len, nyăngz Ma-li-ya, năngx cloon pitc tauh Ma-li-ya, ninyh woa tayđ stâu.” ² Lênh dlih naih nib tongf tuz đănz nzongf, wâyc zuc naih ah tauh Zâu nyăngz Stynz-munh nzac taih stuif woax nomz pongz stâu jengh njauz pyây toiv seetb taih. Songđ stâyv woa cah zâyc” ³ Stynz-munh nyăngz hanyh jangx gwăngz năngđ bungh bitc tâuf, Gwuyz Quav phangb pec năngđ tongđ. ⁴ Zu stâu nyăngz pengz cumh nzav tuz stynb synx nzuf. Cayx năngđ munh tayc nâyx” ⁵ Stynz-munh bux woax đomc Munh nzif coong, “max nongc cumh nzav đêh, yaz pâyz tuz nyâuh taih nây lov zuc tingz ănz săpc đăngc zax woax tauh Yê-su. ⁶ Taih tex mangc Nănh nâyx tăpx nănh nyăngz tync geh! nănh max yămz nây nzof gôh, nănh âyz nănh coong nyăngz woac săngh phunb stengb taih nzof gôh.” ⁷ Nyâuh bix coonx muf lănv bux nănh nyăngz stâyb sây buz coong, “nănh săngh phunb stengb taih nzof gôh naz bef! Nănh ninyh Ga-li-lê đangc nyâuh đomc nzof gôh, nyâuh ninyh tauv woa nzăngđ tuz phătc nănh bef! Săngx yaz bux nyâuh nâyx đomc woac muf lănv nănh stiz bef!” ⁸ Woax đomc munh nzif muf gâyh woa stâu, yâuc numđ stauh, yâuc numđ nyađ, coonx tyuv muf lănv bux nănh nyăngz stâyb sây buz.” ⁹ Max laic nyâyh lênh dlih Zâu Yê-su taih pongh đeh nănh stiz coong, “pengh oonz lêc sta? Woax đomc munh nzif songđ ninyh jom nănh nyăngz staux songđ paix nănh.” ¹⁰ Zâu Yê-su bux nănh stiz coong, “max nongc cumh nzav đêh, nyâuh muf bux yaz nyăngz yâuf pez, êu nănh stiz ninyh ga-li-lê stengv, ninyh tauv woa nzăngđ tuz phătc yaz naz bef!” ¹¹ Woax đomc munh nzif jămc jau ninyh woax zanyf, woax đomc zu stâu pengz nzac stengv muf lănv nănh stiz phătc nyăngz muif hungđ seetb taih nyăngz dlayc bux stayb munh.” ¹² Stayb munh pyây cloon munh côx songđ nzomf sangv gwoangh nzof, nzăngđ zoz nyanh đungx nzongf đăpx phunz woax đomc pengz.” ¹³ Yâuc zăpx nănh stiz coong, “nyâuh bix lănv bux pec stingx coong, “bah nzămc buz phâyx mâyc njoomh blătc, Zâu Yê-su nyăngz stâyb sây buz bix taih nimf zoz nănh nyăngz stynb stayđ nzâyz ninyh nzof gôh.” ¹⁴ Nâyx đomc dlayc năngđ coong lănv plongz Quanz pâu bah noomh, nzof buz mănc stăngc nyâuh zay, max nongc cumh nzav phanv pungx stymz bef!” ¹⁵ Pengz stipx woax đomc nyanh songđ seetb ninyh âyz stayb pyây, cloon munh côx zăpx nyăngz woac ayx, nâyx đomc jau, Yiu-tai munh njynh leox đamf tauv nâyx yeenh stâyv.” ¹⁶ Woa săpc byeetx lanh stâyb sây buz ninyh tauv Ga-li-lê stengv, Zâu Yê-su êu nănh stiz ninyh woax nomz tync.” ¹⁷ Nănh stiz ninyh phătc Zâu Yê-su songđ quâyc nzac paix nănh, six năngx naih ah phanx lauf năngx max zengx tingc nyâuđ zeen.” ¹⁸ Zâu Yê-su ninyh tauv năngx stătx têx nănh stiz songđ bux coong, “Yămz Gungh yămz nib nyăngz quyênh lanyf, Tênb-Hungh jaoz phunz yaz nzuf gôh.” ¹⁹ Nyâuh zuc seetb ninyh nzaox muif stingx đâuf munh ayx yaz nyăngz stâyb sây, six zuc Tingz Pha, tingz toonz, tingz Singx-lingh nyăngz bux stăngc ayx quaix womz nyăngz gâyf phunz nănh stiz.” ²⁰ Yâuf nzaox êu nănh stiz ayx âyz nzuf yaz bux nyăngz muif hungđ dlayc, săngx bef! Yaz stâyv quâyx cloon nyâuh yămz tuz tauv bamh canz stêtb mâyv zomc woax noib.”