¹ Zâu Yê-su nzaox nănh nyăngz săpc nyâyc tauh stâyb sây pac, nănh songđ ninyh gâyh woax nomz tync, ninyh nănh stiz nyăngz stâyz phangz muif nomz stengv nzaox munh. ² Ayx quaix womz nyăngz gâyf woax tauh Giăng zuc yămz nzauh woax zanyf, nănh numđ munh lănv Njâuv Zâu ayx nyăngz cumh pâuz, nănh songđ paiđ nănh nyăngz stâyb sây buz ninyh naic nănh. ³ Nănh stiz naic coong, “stênx-stengb lex! mâyh max zâyf zuc paiđ taih woax tauh max? Mah six buz năngx zuc zu pitc tauh tymb meh? ⁴ Zâu Yê-su tauz nănh stiz, “nyâuh muf lănv bux Giăng, nyâuh tuz numđ, tuz phătc nâyx đomc jau lănv bux nănh bex!. ⁵ Lănv bux nănh coong, “mâyc buf nyăngz munh hayh mangc tuz phătc, staux quac nyăngz munh tuz hayh yăngh jau, săngh maoh pongz gumc woax đomc tuz zany gongx, bah nomh đungz mungv tuz numđ woac, munh tayc năngx tuz săngh phunb stengb taih, munh zâuđ tuz numđ cuđ jeenx. ⁶ Yaz oix phunz laiv lanh max nzêmh yaz, woax tauh naih oonz loc gôh. ⁷ Giăng nyăngz stâyb sây muf blătc woax zanyf, Zâu Yê-su lănv Giăng nyăngz jau bux phunz songx munh mungv, nănh coong nyâuh yâuf pez ninyh woa stâyz phangz blănf mangc lungđ? Ninyh mangc ah stynz lauđ tic queng zuc nzaox sâyb tongf mah? ⁸ Nyâuh năngx ninyh mangc lungđ tymb meh? Ninyh mangc ah lanh munh zuz nhlêuf gwuyz mah? Max, Zuz nhlêuf gwuyz woax tauh six yămz woa Hungh tync lêc. ⁹ Ha nyâuh zâyf cayx ninyh mangc lungđ tymb meh? Oix mangc tauh tâuc woac munh mah? Zâyf! Yaz lănv bux nyâuh, nănh six năngx lub têx ah tauh tâuc woac munh tymb. ¹⁰ Wâyc zuc naih woac ja lănv tauv woax tauh six Giăng, Tênb-Hungh coong, “Yaz oix paiđ yaz nyăngz tâuc jeenx munh ninyh đangc, bênc jau phunz mâyh. (Ma-la-zi 3:1-) ¹¹ Yaz coong seenz bux nyâuh, stengb stâyv taih yămz nây bamh canz nyăngz munh, max naih laiv lanh năngx lub têx Giăng stăngc munh ayx quaix womz nyăngz gâyf woa tauh. Six yămz Tênb-toongh Côkz ayx năngx jeenz quaix woax tauh, nănh tuz ayx năngx lub têx Giăng. ¹² Tăng Giăng stengb stâyv taih tauv nâyx zanyf, Tênb-toongh Côkz zuc munh tăng, zuc munh ayx peo, yâuc lov jau zab zoz. ¹³ Yeetx stong tâuc woac munh, cloon Đoouc-lif gâyf stâub ja coong tauv tênb-toongh côkz đangc, nzăngđ coong tauv Giăng nzônh gâyf nyăngz jau. ¹⁴ Năngđ coong nyâuh oix pâyz têx, Giăng six Ê-li-ya seenz zuc taih woax tauh. ¹⁵ Laiv lanh naih bah noomh six zuc nzaz bah noomh mungv năngx gongx. ¹⁶ Yaz cayx zoz lungđ taih pây nâyx yeenh stâyv munh? Nănh stiz six năngđ ah peob munh sây ninyh blanf woa caiz sangc, nâyx peob êu woax peob. ¹⁷ Buz pyom blungh blex nyâuh yâuc max tyuh loongc?, buz ayx plopx munh tayc nzungz nyâuh yâuc max haoh? ¹⁸ Giăng taih nănh njif max nhlync laiv hungđ, nyâuh yâuc coong six nănh blaz manđ. ¹⁹ Tauv yaz bamh munh nyăngz toonz taih nhlync yâuc hopb, nyâuh zâyf yônx Coong mangc geh! Lâyc tauh ya munh mauh nhlync hopb, năngx cloon naih stoif nyăngz munh, yâuc cloon sâub sôiv nyăngz munh ayx toic! Six seetb taih nyăngz dlayc ayx zanyx manyf stunx cloon Tongb manyh six hođ nzongf. ²⁰ Zâu Yê-su Quef coonz yônx woax đomc stengv nyăngz munh, wâyc zuc nănh yămz woa ayx jix-caox njingc nyăngz dlayc đungx nzongf, nănh stiz yâuc max canx coi nyâuđ quanyf stoif. ²¹ Nănh yônx Coong, “Cô-la-sin, stengv cloon Bêtv-sai-đa stengv lex! Nyâuh cayx pongh zuc zâuđ nanc gôh, nâyx đomc jix-caox njingf nyăngz dlayc, năngđ zâyf yămz Tai-lapv, cloon Sai-đôn stâyz phangz ayx têx, woa iz nomz stâyz phangz munh, nănh stiz songđ zuz đôc buyx nyotb, yâuc maob saif plaof ănz pyây ayx zanyx manyf stunx Coong nănh stiz coi nyâuđ Quanyf stoif lauh nzof gôh. ²² Yaz coong seenz bux nyâuh, tauv stămđ stoif woax noib, Tai-lapv, cloon Sai-đôn stâyz phangz zuc tingc stoif năngx sâub têx nyâuh. ²³ Ca-bê-na-um muôngc lex! Mâyh nyâyh mâyh tuz zanyb toongz gungh naz? Six max tuz đêh! Mâyh six zuc quanyf nzac yămz pâu, yaz yămz mâyh woa ayx woax đomc jix-caox njingc nyăngz dlayc, năngđ yămz woa Sô-đôm stengv ayx têx, naih dlih woax nomz stengv six yămz tauv nâyx zanyf. ²⁴ Yaz coong seenz bux nyâuh, tauv stămđ stoif woax noib, Sô-đôm stengv six zuc tingc stoif năngx sâub têx nyâuh. ²⁵ Woax zanyf Zâu Yê-su coong, “Pha lex! Gungh nib nyăngz Zâu lex! Yaz tanv Pha! Wâyc zuc nâyx đomc dlayc, Pha pinyx max phunz tongb manyh nyăngz munh pâyz, cloon hođ đăngc nyăngz munh pâyz. six phunz max hođ đăngc nyăngz munh pâyz. ²⁶ Pha lex! Nây six cănh ayx tuz hođ Pha nyăngz nyâuđ. ²⁷ Yaz nyăngz Pha, zoz muif hungđ jaoz phunz yaz, seetb blătc Pha, max naih mănv pâyz tuz toonz, seetb blătc toonz, njynh toonz max phunz pâyz woax đomc, max naih mănv hayh pâyz tuz Pha. ²⁸ Nyâuh laiv tauh năngđ numđ Zâuđ năngđ nyax tax hungđ nic, bix taih yaz nây, yaz phunz nyâuh tuz hitb conv. ²⁹ Zoz yaz nyăngz tungh ngauz quayx ănz, hođ yaz nyăngz gao ayx, wâyc zuc yaz nyăngz nyâuđ six dlênc, nyâuh nzăngđ tuz pengh oonz. ³⁰ Yaz nyăngz njăngx ngauz nzâyz six hâyđ, đamz yâuc sâub.