¹ Nyâuh ayx Tênb-Hungh Stăngz nzongf nyăngz Namh-nyâuf, six zuc ayx âyz nănh nyăngz gao. ² Nyâuh ayx muif hungđ dlayc six zuc Stăngz Munh năngđ Njâuv Zâu Stăngz pănh nâyx, sez nănh nyăngz Mengc nongc ayx năngđ đangz nyăngz siv nâyx Canyx bongc phunz Zâu Tênb-Hungh. ³ Nyâuh yâuf-pez ayx Tênb-Hungh đăngb zengh nyăngz Munh. max hopđ zuc ayx Pongh lauh, max đăngb zengh nyăngz dlayc. mah six mauh tax hungđ. ⁴ Nyâuh yâuf-pez năngx gâyf coong bah stamx bah stix nyăngz woac. yâuc coong bah lotb woac, six zuc coong hâuđ Zâu Tênb-Hungh nyăngz woac. ⁵ Nyâuh yâuf-pez six zuc pâyz tingc nâyx tyuh jau. Max naih laiv lanh zeen Zâu nyăngz Munh bix năngx ninyh ayx pongz lauh, ayx huđ dlayc mauh tax hungđ. Ayx nâyx hungđ dlayc nyăngz Munh six Canyx bongc za dlănh. Mauh tax hungđ nyăngz Munh six max naih phănc songc yămz Njâuv Zâu nyăngz Côkz. ⁶ Năngx gâyf bây laiv tauh zoz za nyăngz woac jaf nyâuh yâuf-pez. Six wâyc zuc nâyx hungđ dlayc Tênb-Hungh hănđ nzongf max mungv nănh nyăngz woac woax đomc Munh. ⁷ Wâyc năngđ ha nzăngđ max tuz cloon nâyx hungđ Munh ayx toic. ⁸ Cah đangc noib nyâuh yâuf-pez yămz nzămc nyăngz tync cah njaf, Six nâyx zanyf nyâuh yâuf-pez tuz yămz Njâuv Zâu Gwăngz-eng nyăngz cah njaf. Songđ zuc yămz năngđ Gwăngz-engz nyăngz Namh-nyâuf. ⁹ Wâyc zuc Gwăngz-eng six nzâyz gongx nzongf nyăngz jau, Cloon quai vâyb, Cloon seenz nyăngz Gâyf taih. ¹⁰ Nyâuh six zuc nyâyh mangc jađ toix laiv hungđ quaix Vâyb hopđ Zâu nyăngz nyâuđ. ¹¹ Năngx gâyf cloon nănh stiz pinyx ayx max săngh nongc nyăngz dlayc, six zuc phunz nâyx hungđ dlayc goib yangh seetb taih. ¹² Wâyc zuc cungb lănv tauv nănh stiz pinyx ayx nyăngz dlayc. Songđ caux nănh stiz numđ nyayz nzof gôh. ¹³ Six gwăngz-eng songđ hayh syux phunz pănh mangc tuz phătc muif hungđ yox. ¹⁴ Wâyc zuc Gwăngz-eng syux laiv hungđ songđ Gwăngz, Wâyc zuc naih ah zâux woac lănv Coong, “Mâyc njoomh nyăngz Munh lex! đyub taih zef gôh! “Tayc blătc nyăngz Munh lex! “Săngh taih zef gôh! “Njâuv Zâu songđ syux Gwăngz nyâuh. ¹⁵ Nyâuh yâuf-pez yămz nây stâyv sangc six zuc stêu stymz buôngh. Năngx gâyf yămz năngđ max naih tongb-manyh nyăngz Munh. six zuc yămz năngđ naih tongb-manyh nyăngz Munh. ¹⁶ Six zuc nongc săngx huđ congv tuz hopđ. Wâyc zuc nâyx yeenh stăyv huđ nzongf. ¹⁷ Năngx Gâyf yămz năngđ Munh oongx Munh. six zuc pâyz Zâu nyăngz zux ix. ¹⁸ Năngx gâyf hopđ tyu bynz, wâyc zuc tyu six phunz Munh ayx huđ dlayc. nyâuh yâuf-pez six zuc phunz Singx-lingh yămz pong nyâuh yâuf-pez nyăngz nyâuđ. ¹⁹ Six zuc nongc Nzungz đăngb poux tanv Zâu. Cloon Singx-lingh phunz pênx nyăngz nzungz. lanh cloon lanh six zuc nongc nyâuđ ayx Nzungz tanv Zâu. ²⁰ Yâuc zuc muif dlih wâyc muif hungđ dlayc, Tingz pănh Njâuv Zâu Yê-su nyăngz bux. hâuđ pănh nyăngz Nzangc Pha Zâu Tênb-Hungh. ²¹ Six zuc lanh buc lanh. Wâyc zuc nyâuh yâuf-pez tinyh đoih Cumh nzav Njâuv Zâu. ²² Ayx au nyăngz Munh lex! six zuc bokc dlic nyâuh nyăngz langh. Năngđ nyâuh canyx bongc Zâu nâyx. ²³ Wâyc zuc langh ayx au nyăngz pyây, năngđ Njâuv Zâu ayx Huyđ-toongh nyăngz pyây. Huyđ-toongh ayx Njâuv Zâu nyăngz nyăngz stynb. Nănh yâuc ayx Huyđ-toongh nyăngz Njâuv Zâu. ²⁴ Huyđ-toongh canyx bongc Njâuv Zâu năngđ laix. au yâuc zuc yămz muif hungđ dlayc canyx bongc nănh nyăngz langh năngđ woa nâyx. ²⁵ Ayx langh nyăngz Munh lex! six zuc Stăngz pănh nyăngz au. Năngđ Njâuv Zâu Stăngz Huyđ-toongh. Yâuc sez Mengc wâyc Huyđ-toongh. ²⁶ Wâyc zuc nănh nongc womz nongc Gâyf đaox Huyđ-toongh dlăngc wayh. ²⁷ Nănh nyunc tayc phunz Huyđ-toongh săngh Nănh nyăngz au. Pênx Gwăngz-eng nyăngz Huyđ-toongh. Max naih wâyx, max huđ hanyh, yâuc quai max naih tync nzêmh nyăngz Huyđ-toongh. ²⁸ Lauf tinyh năngđ, Langh six zuc Stăngz au năngđ stăngz pănh nyăngz stynb. Laiv lanh Stăngz au songđ Stăngz nănh nyăngz stynb. ²⁹ Max naih laiv lanh cănh hănđ nănh nyăngz stynb. Songđ seenz zuc lif gongx. Năngđ Njâuv Zâu jămđ Huyđ-toongh nâyx. ³⁰ Wâyc zuc pănh six ayx Njâuv Zâu nyăngz stynb stayđ. ³¹ Canyx-Stâub ja coong, “Munh baox gâyh nănh nyăngz Nzif Pha ninyh cloon nănh nyănh au iz lanh căpx săngh ah nomz stynb. ³² Nâyx đomc woac cah njaf naih ah zâux nongc seen quaix nyăngz Gâyf. Nâyx zanyf plongx yangh seetb taih âyz yaz manyh pec nâyx đomc woac six coong zuc Njâuv Zâu cloon Huyđ-toongh. ³³ Nyâuh yâuf-pez muif lanh six zuc Stăngz nyâuh nyăngz au năngđ Stăngz pănh nyăngz Stynb. Nzof au yâuc zuc bokc dlic nănh nyăngz langh.