¹ Wâyc năngđ ha, Yaz Phao-lô ayx nzauh Munh phunz njâuv Zâu Yê-su. wâyc nyâuh yâuf-pez max zâyf Yiu-thai Munh tuz Gwăngz-eng. ² Yaz nyâyh taih, naih dlih nyâuh yâuf-pez lauf numđ lănv coong Zâu Tênb-Hungh sađ pôz phunz yaz ayx nâyx hungđ cumh pâuh wâyc stăngc max zâyf Yiu-thai Munh nyăngz yâuf-pez. ³ Đangc dlih Nănh goib yangh Nănh max zengx plongx yangh nyăngz dlayc phunz yaz pâyz tuz nâyx đomc dlayc ah tix. ⁴ Six coong nyâuh yâuf-pez năngđ toc Stâub đangc, nyâuh songđ pâyz tuz pyac nyâuđ tauv Njâuv Zâu lauh-yangh nyăngz dlayc. ⁵ Đangc dlih Tênb-Hungh max zengx phunz Munh pâyz tuz nâyx đomc Nănh pinyx vâyv nyăngz dlayc, Six nâyx zanyf nănh nongc Singx-lingh goib yangh max zengx plongx yangh nyăngz dlayc phunz đăngb zengh nyăngz Munh cloon tâuc woac munh pâyz. ⁶ Nâyx đomc max zengx plongx yangh nyăngz dlayc six năngđ nâyx. Tênb-Hungh phunz Cuđ jeenx đâuf cloon Yiu-thai Munh naih phănc songc jax toongx, nănh stiz songc ah nomz stynb. Tinyh tanb nongc Njâuv Zâu Yê-su nyunc woac phunz nyăngz phănc. ⁷ Yaz tuz ayx nâyx đomc cub jeenx nyăngz cumh pâuz six wâyc Tênb-Hungh Sađ sâuđ nyâyc phunz yaz naih gâyf ayx. ⁸ Pây cloon Zâu nyăngz pec stingx yaz năngx stăm quaix muif lanh, Six Tênb-Hungh sađ Pôz phunz yaz hayh nzônh Cuđ jeenx lănv Njâuv Zâu Yê-su nyăngz Pôz tăng laiv gongx. Bux bây manf stingx đâuf Munh pâyz. ⁹ Nănh yâuc jaoz cumh pâuz phunz yaz lănv Cuđ jeenx bux bây muif tauh Munh pâyz nănh lauh yangh nyăngz dlayc. tuz pinyx tăng nănh zâyx Gungh zâyx nib taih nyăngz muif hungđ dlayc. ¹⁰ Six nâyx zanyf Tênb-Hungh oix nongc Huyđ-toongh phunz yămz đamx Gungh naih quyênh naih lanyf woax đomc pâyz tuz Nănh muif hungđ nyăngz Tongb-manyh. ¹¹ Nănh năngđ nâyx ayx six ayx âyz Nănh nyăngz zux ix, Nongc pănh nyăngz Njâuv Zâu Yê-su săngh Nănh nyăngz cumh pâuz. ¹² Pănh zeen Njâuv Zâu Yê-su tuz cloon Nănh songc Mengc săngh, songđ hayh pungx stymz ninyh tuz tauv stătx Tênb-Hungh nyăngz cah đangc, max zâuđ cumh nzav laiv hungđ. ¹³ Năngđ naz yaz jođ nyâuh yâuf-pez năngx gâyf nămx nyâuđ, Yaz zuc tanyđ zâuđ dlauc wâyb wâyc stăngc nyâuh yâuf-pez tuz Gwăngz-eng. ¹⁴ Yaz songđ quâyc nzac Pha nyăngz cah đangc Coouv-Zâu. ¹⁵ Max cun yămz Tênb-Toongh mah six yămz bamh canz max cun laiv hungđ Munh lauh tuz oonz bux. ¹⁶ Yaz jođ nzangc Pha sađ Nănh naih jab Gwăngz-eng nyăngz singx-lingh stăngc phunz nyâuh yâuf-pez yongb taih. ¹⁷ Yaz clo Zâu jođ Njâuv Zâu. Wâyc zuc nyâuh yâuf-pez naih seenz stymz zeen coouv nănh. clo Zâu jođ phunz nyâuh Stăngz Nănh năngđ Stăngz Munh nâyx yămz nyâuh yâuf-pez cah njaf năngđ nzac đungh đôz nâyx, ¹⁸ Năngđ naz, Yaz songđ jođ phunz yâuf-pez cloon yeetx stong nyăngz Munh nzăngđ hayh Manyh pec Njâuv Zâu nyăngz Stăngz tăng laiv quăng tăng laiv njăngb tăng laiv đôz. ¹⁹ Yaz jođ Nzangc Pha phunz nyâuh yâuf-pez pâyz tuz Manyh pec Njâuv Zâu Stăngz nyâuh tăng laiv đungx, woax zanyf yaz jođ phunz nyâuh yâuf-pez naih Tênb-Hungh Clakx-clunh nyăngz stăngz yămz pong nzuf nyâuh nyăngz nyâuđ njaf. ²⁰ Tênb-Hungh nongc nănh nyăngz zux ix ayx săngh cumh pâuz yămz nyâuh yâuf-pez nyăngz nyâuđ cah njaf, Yaz jođ phunz pănh songđ hayh stăngz tuz tauv Nănh. ²¹ Yaz songđ jođ Nănh nongc Njâuv Zâu Yê-su yămz Huyđ-toongh Stâyv quâyx tanv Nănh nyăngz Gwăngz-eng Tauv banc stâyv banc đaic ( A-Men.)