2 ¹ Mâyh nzaox munh, six zuc nzaox naih coonz tay gongx nyăngz gâyf. ² Seenz zuc nzaox nyăngv tauh njangb nyăngz munh nzif, ayx dlayc payh tuz munh tanv, yâuc zuc nzaox nănh stiz hayh zeen gongx yâuc naih stymz, stăngz munh. ³ Lauf tinyh năngđ, six zuc nzaox woax đomc nyăngv tauh côx nyăngz munh bôf, ayx dlayc payh tuz zeen Tênb-Hungh nyăngz munh, năngx gâyf coong woac huđ, yâuc năngx gâyf hopb tyu, nănh six zuc nzaox êu munh ayx gongx dlayc, ⁴ Năngđ naz nănh songđ hayh nzaox tuz munh bongf, hayh stăngz langh yâuc hayh hâuđ lênh sây. ⁵ Naih tongb manyh bokc dlih langh, yâuc vaic lif pyau, ayx stymz pengh, wâyc max phunz munh năngx naih woac coong peo Tênb-Hungh nyăngz gâyf. ⁶ Yâuc tinyh năngđ, mâyh yâuc zuc nzaox munh baox naih tongb manyh hayh cun tuz stynb. ⁷ Ayx muif hungđ gongx nyăngz dlayc nongc ayx jix caox phunz nănh stiz hođ, nzaox gâyf nyăngz săngx huđ, yâuc zuc naih stymz nzaox. ⁸ Six zuc nongc naih coonz tay nyăngz woac taih nzaox, wâyc phunz cloon mâyh tinyh nzengz woax đomc munh songđ zuc nyayz, wâyc phunz nănh stiz lov max naih woac taih pib pănh. ⁹ Six zuc nzaox ayx nâuh nyăngz munh ayx muif hungđ dlayc phunz nănh stiz nyăngz Zâu numđ nyađ, năngx gâyf taux nzeetx. ¹⁰ Yâuc năngx gâyf ayx stac nymc laiv hungđ, ayx muif hungđ dlayc, six zuc pungx stymz ayx phunz munh pâuh Zâu Tênb-Hungh nyăngz manyh. ¹¹ Tênb-Hungh nyăngz pôz songđ hynđ yangh seetb taih phunz nyeenh mănh tuz Njâuv. ¹² Nâyx hungđ pôz, six nzaox êu pănh quanyf yămz bamh canz âyz stymz nyâuđ nyâyh, max oix lêpc Tênb-Hungh woax đomc yeetx stong, yămz nzêuh gungh đi songđ ayx tuz pengh stymz lêpc gongx Tênb-Hungh yâuc hayh cun tuz stynb stayđ. ¹³ Năngđ nâyx ayx zu tauv pănh naih tync mungc nyăngz Zâu Tênb-Hungh cloon Njâuv Zâu Yê-su yămz woa gwăngz-eng cah njaf huyđ seetb taih. ¹⁴ Nănh wâyc pănh sez tuz tayc nănh nyăngz mengc suc pănh phunb đangz lauf gâyh đutb huđ nyăngz dlayc, nănh yâuc đaox tuz dlăngc đăngb zengh taih săngh nănh nyăngz munh, pănh songđ zuc joomz nyâuđ ayx muif hungđ gongx dlayc. ¹⁵ Mâyh six nongc nâyx đomc woac nzaox munh, nongc nzuf mâyh nyăngz lanyf nzaox munh, yâuc năngx gâyf phunz laiv lanh phătc mâyh stam.