1 ¹ Yaz Phao-lô ayx Tênb-Hungh nyăngz pâuz, yâuc ayx Njâuv Zâu Yê-su nyăngz đayf, wâyc stăngc Tênb-Hungh sên taih nyăngz munh hayh zeen tuz wăn, wâyc phunz nănh stiz pâyz tuz seenz gâyf, yâuc hayh yeenv phunz munh pâyz gao lêpc seenz gâyf. ² Nănh stiz zeen nyăngz jau, cloon seenz gâyf nyăngz coonz tay six munh naih tync mungc, yâuc tuz stâyv quâyx nyăngz mengc, nâyx six max zâyf Tênb-Hungh puv maoh, six tăng cah lof banc stâyv banc đaic woax zanyf, Zâu nyunc phunz nyăngz mengc. ³ Bengc săngx huđ, Tênb-Hungh phunz nănh nyăngz pâuz hynđ yangh seetb taih. zoz nâyx đomc gâyf jaoz phunz yaz lănv, yaz songđ âyz pănh nyăngz Zâu Tênb-Hungh lănv phunz munh mungv,six Njâuv Zâu. ⁴ Yaz ja jeenx zuyz phunz yaz nyăngz seenz toonz Titv lex, wâyc pănh tinyh đoih zeen Yê-su songc seenz stymz, jođ pănh nyăngz Nzangc pha Zâu Tênb-Hungh Njâuv Zâu Yê-su hâuđ lênh yâuc sađ pôz sađ pengh oonz phunz mâyh. Titv yămz Cơ-rêtv coiđ ayx cumh pâuz ⁵ Yaz njâuh mâyh yămz woa Cơ-rêtv coiđ synh, wâyc phunz mâyh stăngc bênc ayx max zengx nzuf nyăngz dlayc, yâuc yămz muif nomz stengv êu munh ayx Huyđ-đăngb nyăngz munh côx, năngđ yaz bux mâyh nâyx. ⁶ Ayx huyđ đăngb munh côx oix zuc ayx max naih tync nzêmh nyăngz munh, cungb nongc ah lanh au, nănh nyăngz sây yâuc zuc zeen Zâu, yâuc zuc pungx stymz ayx max phunz munh naih tync nzêmh nyăngz dlayc. ⁷ Ayx Tênb-Hungh nyăngz munh côx cun songx munh six max hopđ zuc ayx phunz munh naih woac yônx, nănh max tuz cloon munh tinyh nzengz, yâuc max siv nhleenx căn, max tuz hopb tyu, yâuc max tuz ayx guyc, yâuc max tuz mauh jaf munh nongc. ⁸ Ayx munh côx six zuc naih stymz stipx zeb, yâuc stăngz ayx gongx nyăngz dlayc, yâuc zuc naih tongb manyh, vaic ayx pengh stymz, songđ hayh cun tuz stynb. ⁹ Nănh stiz six zuc lif năngx gongx zeen tuz wăn nyăngz seenz gâyf, phunz nănh stiz hayh zoz seenz gâyf taih nzaox phunz munh pâyz tuz zengv gâyf nyăngz munh, phunz nănh stiz pâyz tuz nănh stiz ayx six longđ. ¹⁰ Wâyc zuc naih ayx quaix catz nyăngz gâyf woax đomc Yiu-thai munh, aox seenz gâyf, coong bah camx bah caiz jaf munh. ¹¹ Mâyh zuc ayx phunz nănh stiz payx nzeetx, wâyc zuc nănh stiz nzaox max hopđ zuc nzaox nyăngz gâyf, ayx phunz max pâyz sax siênz pyau munh lunc nzuf, woax đomc munh six nzaox êu mauh puv quâyx nyăngz jau cungv. ¹² Nănh stiz Cơ-rêtv munh cănh naih ah tauh tâuc woac munh coong quaix nâyx đomc woac, (Cơ-rêtv) munh muif dlih cungb coong puv maoh, huđ năngđ stanyb hauđ, lâyc matc, yâuc cungb pâyz nhlync max pâyz ayx. ¹³ Tâuc woac munh coong nănh stiz seenz toix nzuf, oix zuc coong năngx đăngb zac phunz nănh stiz hayh naih seenz stymz pâyz zeen wăn seenz gâyf. ¹⁴ Max mungv Yiu-thai munh coong nyăngz ưrx jeetx woac, max mungv seenz gâyf nyăngz munh bênc taih nyăngz đoouc-lif gâyf. ¹⁵ Đăngb zengh nyăngz munh, six ayx đăngb zengh nyăngz dlayc, cah lôh nyăngz munh tăng nănh stiz nyăngz pyây lâyf nyâyh max đăngb zengh nyăngz dlayc, stiz nyăngz stymz nyâuđ songđ huđ nzuf. ¹⁶ Nănh stiz coong stiz pâyz Zâu Tênb-Hungh, six nănh stiz ayx nyăngz dlayc, cayx năngđ nănh stiz max pâyz, nănh stiz cungb hox bây munh max mungv woac, yâuc max ayx laiv hungđ gongx dlayc.