1 ¹ Yaz Phao-lô ayx Njâuv Zâu Yê-su nyăngz cumh pâuz munh, tuz Tênb-Hungh sên yaz taih hipđ ayx nănh nyăngz dlayf, Nănh êu yaz ninyh lănv nănh nyăngz cuđ jeenx bux muif lanh munh. ² Nây cuđ jeenx tăng lôx Tênb-Hungh nyunc săngh nzof, yâuc nongc nănh nyăngz tâuc woac munh ja taih woax đomc Canyx-stâub. ³ Cuđ jeenx ja lănv tauv Nănh nyăngz toonz Njâuv Zâu Yê-su, stengb stâyv taih pênx bamh munh, six tăng Đa-vitv Hungh woax zâyz six miuh.” ⁴ Đăngb-zengh nyăngz Singx-lingh yâuc phunz nănh ayx Tênb-Hungh nyăngz Sây, “Wâyc zuc nănh tayc, Tênb-Hungh năngx phunz Nănh nyăngz quênf ayx phunz Nănh nyăngz toonz săngh phunb stengb taih. ⁵ Njâuv Zâu Tênb-Hungh nongc Nănh nyăngz pôz Sađ phunz yaz ayx Nănh nyăngz cumh pâuz (Đăkc-biêtc), wâyc nănh nyăngz manyh ênz nây gungh đi munh phunb đangz lauf lov nănh, Canyx bongc Nănh, yaz ayx nyăngz dlayc six ayx wâyc Nănh.” ⁶ Njynh nyâuh yâuf pez yămz Lô-ma stengv nyăngz munh, yâuc tuz hipđ ayx Njâuv Zâu, Yê-su nyăngz munh nzof gôh.” ⁷ Yaz ja jeenx zuyz phunz nyâuh yâuf pez yămz Lô-ma nzêuh nyăngz munh, yâuc tuz Tênb-Hungh hâuđ lênh nyăngz munh, Tuz êu taih pênx Đăngb zengh nyăngz pec stingx, “Jođ pănh nyăngz Nzangc Pha Zâu Tênb-Hungh, Cloon Njâuv Zâu Yê-su sađ Pôz sađ pengh oonz phunz nyâuh yâuf-pez ô stayx tinyh đoih.” Phao-lô oix ninyh yămz Lô-ma nzêuh ⁸ Njâuv Zâu Yê-su phunz yaz wâyc nyâuh songx munh, yaz hâuđ pănh nyăngz Tênb-Hungh, “Wâyc zuc Gungh đi munh numđ lănv tauv nyâuh yâuf pez naih seenz stymz.” ⁹ Tênb-Hungh six phunz yaz pong nyâuđ stăngc ayx Nănh nyăngz cumh pâuz lănv Nănh toonz nyăngz cuđ-jeenx woax tauh, Nănh stăngc yaz ayx zanyx manyf, Nănh pâyz tuz yaz muif dlih đoouc coouv Zâu yâuc đamv tauv nyâuh yâuf pez.” ¹⁰ Yaz laiv zanyf đoouc coouv Zâu yâuc jođ Tênb-Hungh phunz yaz naih congv ninyh tayđ nyâuh yâuf pez, Năngđ hođ Nănh nyăngz âyx, Nâyx đomc dlayc six săngh congz.” ¹¹ Yaz seenz oix pongh nyâuh yâuf-pez, wâyc phunz nyâuh nyăngz mengc hoonh tuz sâuđ nyâyc.” Stăngc nyâuh hayh zeen tuz năngx yongb têx.” ¹² Yaz coong nyăngz dlayc six nyâuh yâuc tuz Phătc yaz seenz stymz. yaz yâuc oix tuz phătc nyâuh yâuf pez nyăngz seenz stymz. Lanh songđ hayh stăngc lanh zeen tuz gongx” ¹³ Songx yâuf pez lex! Yaz oix nongc nyâuh yâuf pez pâyz tuz yaz sax hâyđ oix ninyh nyâuh woa, Six naih dlayc zeenv yaz max hayh ninyh, “Yaz cungb oix yămz nyâuh woa mungh tongx yeenv nyâuh zeen Zâu, Năngđ yaz yămz pitc stingx munh yeenv nănh stiz nâyx.” ¹⁴ Yaz sămv Hi-lapc munh mah six max zâyf sămv Hi-lapc munh ah hungđ cumh pâuz niđ nzongf, max jez munh lemđ, mah six munh oongx.” ¹⁵ Wâyc năngđ nâyx, yaz seenz oix lănv cuđ-jeenx phunz nyâuh yâuf pez yămz Lô-ma nzêuh nyăngz munh.” ¹⁶ Yaz songđ max numđ nyayz cuđ jeenx, wâyc nây cuđ jeenx six Tênb-Hungh nyăngz quênh, Hayh Njâuv tuz yeetx stong zeen nyăngz munh, Njâuv Yiu-thai munh đangc, Quaix đangz nzăngđ njâuv tauv max zâyf Yiu-thai munh.” ¹⁷ Nây cuđ jeenx coib yangh Tênb-Hungh năngđ laix nâyx phunz munh cloon nănh hopđ nyâuđ, “Tăng coonz zeen, six zuc zeen năngx tauv tauh, Năngđ Canyx-stâub ja coong nâyx, “Laiv lanh zeen coouv Tênb-Hungh, songđ tuz cloon Nănh hopđ nyâuđ, “Pengh stymz nyăngz munh six yămz wâyc seenz stymz.” Gungh đi munh muif lanh pamf stoif ¹⁸ Tênb-Hungh yămz woa Tênb toongh, Goib yangh Nănh hănđ munh nyăngz Stoif, Nănh numđ hănđ mangc stam nănh woax đomc munh, Yâuc numđ hănđ munh ayx huđ dlayc, Nănh stiz ayx nyăngz huđ dlayc pinyx max phunz munh pâyz seenz gâyf.” ¹⁹ Tênb-Hungh songđ tingc nănh stiz nyăngz stoif, wâyc zuc nănh stiz pâyz Tênb-Hungh, Six nănh cănh goib yangh phunz nănh stiz pâyz.” ²⁰ Tăng Tênb-Hungh zâyx Gungh zâyx nib taih woax zanyf, Tênb-Hungh stâyv quâyx yămz nyăngz quênh max zuc hănđ.” Cloon nănh nyăngz stymz nyâuđ, Max cun hănđ six mâyc mangc max Phătc, Six Tênb-Hungh cănh phunz pâyz tuz manyh pec, Nănh stiz mangc tuz phătc Tênb-Hungh zâyx taih nyăngz muif hungđ, songđ pâyz tuz Tênb-Hungh, “Nănh stiz songđ max naih tync zay stynb.” ²¹ Nănh stiz pâyz tuz Tênb-Hungh, Six nănh stiz max clo ănz, yâuc max nhlimc Tênb-Hungh ayx Zâu. Nănh stiz nyâyh nyăngz jau max săngh nongc, songđ wav săngh munh oongx.” ²² Nănh stiz cănh tanv nănh stiz naih tongb-manyh, Six nănh stiz wav săngh (bauh-buôkc) munh oongx.” ²³ Nănh stiz hopđ zuc congx stâyv quâyx săngh yâuc gwăngz-eng nyăngz Tênb-Hungh. Six stiz max congx, bix ninyh congx miuc hanyh, congx cloon munh tayc nyăngz hanyh jangx, noc hanyh, cloon stanyb hauđ nyăngz hanyh jangx.” ²⁴ Wâyc nâyx Tênb-Hungh dluyh nănh stiz nyăngz nyâuh cănh ayx bah lotb nyăngz dlayc, nongc nănh stiz nyăngz stynb stayđ lanh cloon lanh ayx nyayz nyăngz cumh pâuz' ²⁵ Nănh stiz nzâyz Tênb-Hungh nyăngz seenz gâyf taih coi pênx za gâyf taih nongc, Nănh stiz Canyx bongc munh nongc puf zâyx taih nyăngz muif hungđ, Tayv zâyx muif hungđ woax tauh, six munh stâyv quâyx hopđ zuc tanv woax tauh A-Men.” ²⁶ Wâyc munh ayx năngđ nâyx, Tênb-Hungh songđ dluyh pyeenz nănh Stiz nyăngz nyâuđ cănh nyâyh ayx nyayz nyăngz dlayc. Munh sab hopđ zuc nongc munh baox, six nănh stiz max nongc, munh sab cănh ninyh lov munh sab nongc.” ²⁷ Nzof munh baox yâuc tinyh năngđ, quanyf munh sab max nongc bix cănh nongc munh baox tih stanv, nyâuđ njaf joomz boongh năngđ tâuf pu Nâyx, Lanh cloon lanh ayx nyayz nyăngz dlayc, Nănh stiz ayx huđ dlayc, songđ cănh zuc đamz toongz nănh stiz nyăngz stoif.” ²⁸ Wâyc munh nyăngz nyâuđ nhlengc max oix pâyz Tênb-Hungh, Tênb-Hungh songđ max cun nănh stiz, “dluyh nănh stiz cănh ayx bah lotb nyăngz dlayc.” ²⁹ Nănh stiz cungb ayx muif hungđ huđ nyăngz dlayc, mauh muif hungđ, lanh cloon lanh ayx max săngh nongc nyăngz cumh pâuz, Nănh stiz stâyx munz munh, tayx munh, jaf munh tinyh nzengz, nyâyh oix hoiđ munh, coong cloon woac huđ, ³⁰ Lanh coong huđ ănz lanh, hănđ Tênb-Hungh, Coong peo munh, ayx guic zanyb lub, Ta zux ix ayx huđ dlayc, Max mungv nzif pha nyăngz woac.” ³¹ Nănh stiz oongx max âyz nyunc woac ayx, “Max stăngz munh yâuc max hâuđ lênh munh.” ³² Nănh stiz pâyz tuz Tênb-Hungh nyăngz gâyf lănv coong ayx nâyx hungđ dlayc six zuc tayc, Max six nănh stiz cănh ayx, Nănh stiz zâyf năngx ninyh hox pitc tauh ayx tymb.” Tênb-Hungh oix stămđ muif lanh munh nyăngz stoif