1 ¹ Yaz Phao-lô cloon Ti-mô-thê songc ayx Njâuv Zâu Yê-su nyăngz cumh pâuz munh.* Yaz ja jeenx zuyz phunz Tênb-Hungh nyăngz munh yămz Phi-lipv Stengv nyăngz Đăngb zengh pec stingx, zeen Njâuv Zâu Yê-su nyăngz munh. Cloon Huyđ-đăngb munh côx yâuc cloon mukc sư zâpv sưc. ² Jođ Nzangc Pha Zâu Tênb-Hungh cloon Njâuv Zâu Yê-su sađ Pôz sađ pengh oonz phunz nyâuh yâuf pez ô stayx tinyh đoih. Phao-lô Coouv Zâu ³ Yaz laiv zanyf săngx tauv nyâuh yâuf pez tinyh đoih, Yaz yâuc wâyc nyâuh hâuđ yaz nyăngz Zâu Tênb-Hungh. ⁴ Yaz muif dlih numđ nyađ yâuc stăngc đoouc coouv Zâu phunz nyâuh yâuf pez ô stayx tinyh đoih. ⁵ Yaz hâuđ nănh wâyc nyâuh yâuf pez ô stax. Stăngc yaz ayx cumh pâuz lănv cuđ jeenx tăng coonz tauv nâyx zanyf. ⁶ Yaz zeen tingc Tênb-Hungh yămz nyâuh yâuf pez nyăngz stymz nyâuđ ayx gongx dlayc, ayx tuz nzuf tauv njâuv Zâu Yê-su năngx phunb đangz taih woax noib. ⁷ Yămz yaz nyăngz stymz nyâuđ laiv zanyf yâuc săngx tauv nyâuh yâuf pez ô stayx tinyh đoih. Năngđ nâyx six numđ hođ yaz nyăngz stymz nyâuđ, max cun Yaz zuc yămz nzauh, mah six tuz pungx seetb ninyh nzengz tuz hingh cuđ jeenx max phunz tuih. Yâuc phunz munh pâyz tuz Cuđ jeenx six seenz Gâyf. Phunz nyâuh tinyh đoih tuz songc Tênb-Hungh nyăngz phănc. ⁸ Tênb-Hungh stăngc yaz ayx zanyx manyf coong yaz songđ seenz stăngz nyâuh yâuf pez ô stayx. năngđ Njâuv Zâu Yê-su stăngz nyâuh nâyx. ⁹ Yaz jođ Zâu phunz nyâuh yâuf pez naih nyâuđ stăngz munh yâuc naih Tongb-manyh pâyz tuz muif hungđ gâyf đôz. ¹⁰ Phunz nyâuh yâuf pez songđ hayh saz tuz ayx gongx nyăngz jau. Ayx đăngb zengh nyăngz dlayc tauv Njâuv Zâu năngx taih woax noib songđ max naih tync nzêmh. ¹¹ Wâyc coouv Njâuv Zâu stăngc nyâuh yâuf pez tinyh đoih yămz nây stâyv sangc ayx muif hungđ gongx dlayc wâyc phunz munh nzâyz gwăngz-eng taih phunz Tênb-Hungh. Phao-lô zuc njab langb stayb Six phunz cuđ jeenx phutx hongđ ¹² Yaz oix nongc nyâuh yâuf pez pâyz tuz yaz pongh zuc nâyx đomc dlayc, songđ phunz Cuđ jeenx zunx đanv quăng ninyh. ¹³ Wâyc zuc zu Hungh tync nyăngz pengz cloon songx munh songđ pâyz tuz yaz wâyc lêpc Njâuv Zâu bix zuc yămz nzauh. ¹⁴ Yaz zuc yămz nây nzauh nâyx đomc dlayc six wâyc stăngc nyâuh yâuf pez tuz pungx stymz zeen Zâu đungx staox max zuc cumh nzav laiv hungđ ninyh lănv Tênb-Hungh nyăngz gâyf. ¹⁵ Songđ seenz naih ah phanx munh lănv cuđ jeenx oix stâyx munz nzengz zax. Six naih ah po seenz nongc nyâuđ lănv Njâuv Zâu nyăngz cuđ jeenx. ¹⁶ Nây six wâyc nănh stiz nyâyh taih pâyz tuz yaz wâyc nzengz max phunz Tênb-Hungh nyăngz cuđ jeenx tuih songđ zuc yămz nây nzauh. ¹⁷ Six woax đomc max nongc nyâuđ lănv Njâuv Zâu nyăngz Cuđ jeenx stâyx munz munh, tâuh cănh tuz gongx woax đomc munh. nănh stiz nyâyh taih ayx năngđ nâyx six phunz yaz yămz woa nzauh zuc dlauc huđ năngx nzongf têx tymb! ¹⁸ Six max đâuc, max cun nănh stiz tinyh phanv nzônh, Njâuv Zâu nyăngz cuđ jeenx yaz lauf numđ nyađ. Six yaz lauf năngx numđ nyađ têx tymb. ¹⁹ Mungc nyâuh yâuf pez đoouc coouv Njâuv Zâu nyăngz Singx-lingh stăngc yaz. Yaz zeen coong yaz songđ tuz pungx seetb nzauh taih njâu. ²⁰ Yaz songđ zeen coong yaz naih tync mungc, max naih laiv hungđ ayx phunz yaz zuc nyayz. Njâuv Zâu songđ tuz gwăngz-eng yămz yaz cah njac, max cun yaz săngh mah six tayc. ²¹ Yaz săngh six săngh wâyc Njâuv Zâu.* Yaz hănđ tayc yâuc naih phănc. ²² Six coong yaz săngh hayh ayx phunz yaz naih tync mungc tuz Pôz nyăngz cumh pâuz, yâuc max pâyz tuz cayx sên ayx toix laiv hungđ cumh pâuz. ²³ Nây iz hungđ nzăpc yaz ănz mungh tongx seenz zâuđ phunz yaz sên, yaz numđ oix gâyh nâyx nomz stynb stayđ ninyh cloon Njâuv Zâu Yămz six năngx gongx têx. ²⁴ Six yaz săngh wâyc phunz nyâuh yâuf pez nongc seen quaix. ²⁵ Wâyc năngđ nâyx yaz pâyz tingc yaz năngx zuc săngh yămz nây yangh stâyv wâyc stăngc nyâuh yâuf pez zeen nyăngz jau naih seenz stymz zeen tuz gongx yâuc tuz numđ nyađ. ²⁶ Tauv yaz laiv zanyf ninyh tauv woa tayđ nyâuh yâuf pez nyâuh songđ naih woac lănv nyâuh tuz cloon Njâuv Zâu Yê-su songc mengc săngh. Nyâuh songđ năngx numđ nyađ yaz. ²⁷ Nongc seen quaix six nyâuh yâuf pez yămz nây stâyv sangc oix zuc ayx muif hungđ payh tuz hođ Njâuv Zâu nyăngz Cuđ jeenx. max cun yaz tuz ninyh tayđ nyâuh yâuf pez mah six yămz côz. Yaz yâuc numđ munh lănv coong nyâuh hopđ stymz tongh âyx zeen tuz wăn. Nzengz max phunz cuđ jeenx tuih. ²⁸ Năngx gâyf cumh nzav cloon nyâuh tinyh hănđ woax đomc munh, nây six ayx jix houđ phunz nănh stiz pâyz tuz nănh stiz zuc mêtc, Six nyâuh yâuf pez songđ tuz Tênb-Hungh Njâuv nyâuh. ²⁹ Tênb-Hungh sađ pôz phunz nyâuh canyx bongc Njâuv Zâu. max zâyf cungb zeen nănh cungv, năngx zuc tanyđ zâuđ wâyc nănh. ³⁰ Đangc dlih nyâuh yâuf pez songđ tuz phătc yaz nzengz max bây cuđ jeenx tuih. Nâyx zanyf nyâuh songđ tuz numđ munh lănv coong yaz lauf năngx nzengz max phunz Cuđ jeenx tuih năngđ nyâuh tuz phătc nâyx.