1 ¹ Yaz Phao-lô, wâyc Njâuv Zâu Yê-su zuc yămz nzauh, Yaz cloon yaz nyăngz yâuf (i-mô-thê ja jeenx zuyz phunz buz stăngz nyăngz toic, six cloon buz songc congz ayx nyăngz munh yămz Phi-li-môn, ² Yâuc ja phunz buz nyăngz muc Apv-phi, năngx cloon buz ayx pengz woax tauh An-zipv. ³ Jođ pănh nyăngz Nzangc pha Zâu Tênb-Hungh cloon Njâuv Zâu Yê-su sađ pôz sađ pengh oonz phunz nyâuh yâuf pez ô stayx. Phi-li-môn zeen Zâu gongx ⁴ Yâuc Phi-li-môn lex, yaz muif dlih đoouc coouv hâuđ Tênb-Hungh yâuc săngx đamv tauv mâyh. ⁵ Wâyc zuc yaz numđ lănv coong, "mâyh zeen gongx Yê-su, yâuc stăngz Zâu Tênb-Hungh nyăngz songx munh. ⁶ Yaz jođ Tênb-Hungh phunz mâyh zeen nyăngz jau naih tinyh tongb, stăngc pănh pâyz pâu đungx staox pănh tuz cloon Njâuv Zâu songc mengc săngh woax hungđ gâyf. ⁷ Yâuc lex, mâyh tăng laiv stăngz munh phunz yaz numđ nyađ, wâyc zuc mâyh stăngc tuz Tênb-Hungh nyăngz munh nyâuđ zeen yongb staox taih. Phao-lô stăngc Ô-nê-sim jođ Phi-li-môn ⁸ Wâyc zuc pănh tinyh đoih six zeen Yê-su nyăngz yâuf pez, yaz songđ hayh naih gâyf êu mâyh ninyh ayx hopđ zuc ayx nyăngz cumh pâuz. ⁹ Six wâyc zuc yaz stăngz mâyh, yaz songđ jođ mâyh, yaz Phao-lô yâuc côx nzof, yaz nâyx zanyf wâyc Njâuv Zâu Yê-su năngx zuc yămz nây nzauh. ¹⁰ Yaz jođ tah stăngc yaz nyăngz toonz, Ô-nê-sim, yaz zuc yămz nzauh woax zanyf, yaz tuz Ô-nê-si-matv taih ayx yaz nyăngz toonz. ¹¹ Cah đangc noib mâyh phătc nănh max săngh nongc, six nâyx zanyf nănh wâyc mâyh wâyc yaz, nănh săngh nongc nzof gôh. Woac đaif ¹² Nâyx zanyf yaz stungx nănh ninyh mâyh woa, six năngđ yaz stungx yaz nyăngz stymz nyâuđ ninyh phunz mâyh. ¹³ Yaz wâyc cuđ jeenx zuc yămz nzauh, yaz yâuc oix njâuh nănh cloon yaz yămz nây, tayv mâyh tex yaz. ¹⁴ Six yaz max oix êu tah ayx laiv hungđ bix tah max nyeenc, six dluyh mâyh stymz ayx max zâyf yaz yac. ¹⁵ Naih dlih Ô-nê-sim gâyh tah ah dlapc, năngx phunz mâyh nyunc stipx nănh phunb đangz lauf cloon mâyh stâyv quâyx yămz. ¹⁶ Six nâyx zanyf nănh max zâyf ayx nâuh, six nănh ayx năngx lub têx nâuh, nâyx zanyf nănh ayx zeen Zâu nyăngz yâuf pez, yaz seenz numđ stăngz nănh, mâyh yâuc zuc stăngz nănh, wâyc zuc nănh cloon mâyh six tinyh đoih ayx zeen Zâu nyăngz yâuf pez. ¹⁷ Six coong mâyh năngđ stunx yaz cloon mâyh songc congz ayx, mâyh six zuc stipx nănh năngđ stipx yaz nâyx. ¹⁸ Six coong nănh năngđ ayx laiv hungđ peo mâyh, mah six sămv mâyh laiv hungđ, mâyh phanv stunx bây yaz. ¹⁹ Yaz Phao-lô nongc puf ja nâyx đomc woac, yaz cănh clao phunz tah, nzof tah năngđ sămv yaz laiv hungđ, yaz lauf max đamv tauv. ²⁰ Tah lex, jođ mâyh stăngc yaz ayx phunz yaz numđ nyađ, wâyc zuc pănh tinyh đoih six zeen Njâuv Zâu nyăngz munh. ²¹ Yaz ja nâyx zây jeenx phunz tah, yaz zeen tingc coong tah six âyz yaz coouv nyăngz woac ayx. ²² năngx naih ah hungđ dlayc tymb, yaz oix jođ nyâuh yâuf pez stăngc yaz bênc ah nomz tync zu phunz yaz, yaz zeen coong Tênb-Hungh six tauz nyâuh yâuf pez đoouc coouv nyăngz woac, phunz yaz max lauh năngx tuz ninyh tayđ nyâuh yâuf pez ô stayx. ²³ Ê-phapv-ra, lauf wâyc Njâuv Zâu Yê-su bix zuc cloon yaz songc yămz nây nzauh woax tauh, lauf cloon yaz zuyz woac tayđ nyâuh. ²⁴ Cloon yaz songc congz ayx nyăngz munh, Makv, A-ri-takc, Đê-ma, cloon Lu-ca lauf zuyz woac tayđ nyâuh. ²⁵ Jođ Njâuv Zâu Yê-su sađ pôz phunz cloon nyâuh yâuf pez yămz A-men.".