1 ¹ Yaz Gia-cơ, ayx Tênb-Hungh nyăngz pâuz, yâuc ayx Njâuv Zâu Yê-su nyăngz pâuz, ja jeenx zuyz phunz nyâuh săpc nyâyc stingx yămz đanv nyăngz munh. Seenz stymz cloon tongb manyh ² Yaz stăngz nyăngz yâuf pez lex, nyâuh pongh zuc muif hungđ zâuđ nanc nyăngz dlayc, six stunx săngh hônb hiđ. ³ Wâyc zuc nyâuh yâuf pez pâyz tuz nyâuh pongh woax đomc stâyv nyâuđ nyăngz dlayc, six stâyv mangc nyâuh yâuf pez nyăngz seenz stymz, phunz nyâuh naih stymz tanyđ tuz. ⁴ Six zuc nongc noic tanyđ tuz tauv tauh, wâyc phunz nyâuh pênx clakx clunh nyăngz munh, max yêmv laiv hungđ. ⁵ Six coong nyâuh yâuf pez toix laiv lanh naih tongb manyh max caux, six zuc jođ Tênb-Hungh, nănh songđ sađ phunz nyâuh yâuf pez, wâyc zuc nănh nyâuđ quăng nzongf, songđ oix phunz songx munh max zuc nzêmh. ⁶ Jođ nyăngz munh six zuc nongc seenz stymz đoouc coouv, max tuz nyâuđ plungh plănb, wâyc zuc nyâuđ plungh plănb, six năngđ nzaox sâyb womz gapb loongc nâyx. ⁷ Woax tauh munh gâyv mungc tuz Zâu sađ laiv hungđ phunz nănh. Seenz stymz cloon tongb manyh ⁸ Wâyc zuc woax hungđ munh naih iz tyuh nyâuđ, hănđ ayx laiv hungđ yâuc max tingc wăn. Munh zâuđ cloon munh puv quâyx ⁹ Woax đomc yâuf pez zâuđ tuz Tênb-Hungh pâuh staox njangb songđ tuz numđ nyađ. ¹⁰ Woax đomc puv quâyx munh zuc Tênb-Hungh phunz nănh stiz tuz ayx jeenz yămz haiđ, lauf zuc numđ nyađ, wâyc zuc puv quâyx munh six năngđ mađ phăngh nâyx hayh zuc jac nzuf. ¹¹ Wâyc zuc bah noib seetb taih joomz paz songđ njengh nzuf, phăngh yâuc platb jac nzuf, puv quâyx munh ayx nyăngz congz lekc six năngđ mađ phăngh nâyx, ah manc jac platb nzuf. ¹² Laiv lanh pongh zuc stâyv nyâuđ nyăngz dlayc, yâuc tanyđ tuz tauv tauh, woax lanh songđ tuz oonz loc gôh, wâyc zuc tanyđ nzuf Tênb-Hungh songđ sađ săngh mengc phunz nănh, six seenz zâyf Tênb-Hungh nyunc phunz stăngz nănh woax đomc munh nyăngz săngb mengc. ¹³ laiv lanh pongh zuc jaf nănh pamf stoif nyăngz dlayc, năngx gâyf yônx Tênb-Hungh, max zâyf Zâu jaf pănh pamf stoif, wâyc zuc okx njangh nyăngz dlayc, max hayh jaf tuz zuc Tênb-Hungh, nzof Tênb-Hungh yâuc max jaf laiv lanh pamf stoif. ¹⁴ Wâyc zuc woax đomc munh zuc jaf pamf stoif, six yămz nănh nyăngz nyâuđ cănh hox nănh ninyh pamf stoif. ¹⁵ Stymz nyâuđ cănh nyâyh ayx nyăngz stoif, six pây năngđ munh nzif naih stynb, stoif stengb stâyv lub taih songđ ayx phunz nănh zuc tayc. ¹⁶ Yaz stăngz nyăngz yâuf pez lex, năngx gâyf bây nyâuh zuc munh jaf. ¹⁷ Yeetx stong gongx yâuc clakx clunh nyăngz dlayc, six tăng woa Tênb-toongh taox nzac taih, seenz zâyf zâyx gungh bah noib lav stingz tau syux gwăngz yămz stâyv sangc muif hungđ gwăngz-eng woax tauh sađ phunz pănh, nănh stâyv quâyx max hayh coi wănc, cayx năngđ toongz gwăngz max hayh nzămc. ¹⁸ Tênb-Hungh âyz nănh nyăngz zux ix ayx nongc seenz gâyf yungf pănh, wâyc phunz pănh yămz nănh zâyx taih nyăngz tah yeetx hungđ zunb. Mungv yâuc ayx âyz ¹⁹ Yaz stăngz nyăngz yâuf pez lex, nyâuh muif lanh pâyz tuz oix zuc coonx mungv, ah manc coong, yâuc năngx siv nhleenx căn. ²⁰ Wâyc zuc munh siv nhleenx cănh six max hayh ayx tuz hopđ Tênb-Hungh nyăngz zux ix. ²¹ Wâyc năngđ nâyx, nyâuh yâuf pez songđ zuc quanyf muif hungđ cah lôh, cloon okx njangh nyăngz dlayc, six zuc nongc dlênc nyâuđ mungv Tênb-Hungh songx ănz nyâuh nyăngz nyâuđ njaf woax đomc gâyf, seenz hayh njâuv tuz nyâuh nyăngz mengc hoonh woax hungđ gâyf. ²² Năngx gâyf jaf pănh stynb coong yaz numđ nzuf Đoouc lif gâyf six nănh max ayx âyz. ²³ Laiv lanh numđ nzuf Đoouc lif gâyf yâuc max ayx âyz, six năngđ munh nongc munh sây canyx syux nănh nyăngz mynb. ²⁴ Mangc nzuf, songđ lênh dlih nyâuđ cob nănh nyăngz hanyh jangx, six năngđ laix. ²⁵ Tênb-Hungh clakx clunh nyăngz Đoouc lif gâyf, hayh ayx phunz munh tuz pungx goib dluyh stymz, laiv lanh zah mangc pâyz nzuf Đoouc lif gâyf, yâuc muif dlih ayx âyz, woax lanh six tuz pôz gongx. Jix caox tanv Tênb-Hungh ²⁶ Laiv lanh cănh stunx nănh zeen tuz gongx, yâuc max cun tuz nănh nyăngz nzeetx gongx, woax lanh six cungb cănh jaf nănh, nănh zeen nyăngz jau six max săngh nongc. ²⁷ Âyz nzangc Pha Tênb-Hungh mangc, pănh zeen tuz hopđ six ayx đăngb zengh năngđ nâyx, phătc canh sây cloon au qua pongh zâuđ nanc, yâuc zuc jămđ, yâuc max nongc phunz bamh canz nyăngz jau taih hox nyâuh ninyh yăngh bah lotb nyăngz jau. Stăngz muif lanh