3 ¹ Đăngb zengh nyăngz yâuf pez lex, nyâuh pênx Tênb-Hungh sên taih nyăngz cumh pâuz munh, six zuc nyâyh tauv Yê-su, âyz pănh nhlimc nyăngz jau ayx cumh pâuz yâuc ayx stayb-munh woax tauh. ² Yê-su naih stymz ayx paiđ Nănh taih woax tauh nyăngz cumh pâuz, Năngđ Mô-sê naih stymz ayx Tênb-Hungh pyau munh nyăngz cumh pâuz nâyx. ³ Yê-su tuz munh zanyb năngx njangb têx Mô-sê, cayx năngđ ayx pyau stangc nyăngz munh, tuz munh tanv năngx đungx têx woax siênz pyau. ⁴ Muif siênz pyau songđ naih munh zâyv, nzof muif hungđ six lauf zâyf Tênb-Hungh zâyx taih. ⁵ Mô-sê naih stymz stăngc ayx cumh pâuz phunz Tênb-Hungh nyăngz pyau munh, wâyc ayx zanyx manyf coong Tênb-Hungh oix lănv đangz phanx nyăngz dlayc. ⁶ Njâuv Zâu naih stymz năngđ Tênb-Hungh nyăngz pyau Sây, pănh six Nănh nyăngz pyau, six coong pănh năngđ pungx stymz zeen wăn pănh naih tync mungc oix tuz stipx nyăngz phănc, pănh songđ tuz pênx Tênb-Hungh nyăngz pyau njaf munh. Pănh oix zuc stâyv quâyx săngh âyz Zâu ⁷ Songđ năngđ singx lingh coong, “Six coong nyâuh nâyx noib numđ Tênb-Hungh bux nyăngz woac, max tuz ayx stymz nyâuđ nhlengc. ⁸ Max tuz ayx stymz nyâuđ nhlengc năngđ nyâuh nyăngz stungz zez tâuh Y-sa-la-ên munh yămz stâyz phangz blănf, stâyv Zâu woax đomc munh. ⁹ Nyâuh nyăngz stu stongz buz phătc yaz ayx nyăngz cumh pâuz stâyx săpc nyăngv cah njaf, six nănh stiz lauf năngx stâyv yaz yâuc yônx yaz. ¹⁰ Yaz numđ nhleenx woax nzêuh munh songđ coong, “Nănh stiz nyăngz nyâuđ muif dlih max lêpc yaz, yâuc max pâyz tuz yaz nyăngz jau. ¹¹ Yaz numđ nhleenx songđ zaux coong, “Nănh stiz stâyv quâyx six max tuz nzac yaz nyunc phunz nyăngz hitb conv tync. ¹² Yâuf pez lex, nyâuh six zuc buôngh stymz, yămz nyâuh woa năngx gâyf bây laiv lanh naih okx stymz, max zeen naih săngh mengc nyăngz Zâu Tênb-Hungh. ¹³ Nyâuh muif noib six zuc lanh bux lanh, tinyh phanv năngx naih munh coong hipđ ayx nâyx noib nyăngz noib, wâyc max phunz laiv lanh zuc stoif jaf nănh nyâuđ nhlengc. Yê-su ayx năngx lub quaix stayb-munh ¹⁴ Six coong pănh năngđ zeen tuz wăn tauv tauh tauv mâyv, năngđ tăng coonz zeen woa nâyx têx, pănh songđ tuz cloon Njâuv Zâu songc phănc. ¹⁵ Canyx-stâub coong, “Six coong nyâuh nâyx noib numđ Tênb-Hungh coong bux nyăngz woac, six năngx gâyf ayx nyâuđ nhlengc năngđ nyâuh nyăngz stu stongz Y-sa-la-ên munh ayx stymz nyâuđ nhlengc zengv Tênb-Hungh woax hâyđ nâyx. ¹⁶ Numđ Tênb-Hungh bux nyăngz woac bix năngx nyâuđ nhlengc woax đomc munh six mănv? Max zâyf Mô-sê ênz seetb Y-yiêpv-tô stâyz phangz woax đomc munh mah? ¹⁷ Tênb-Hungh siv nhleenx stâyz săpc nyăngv woax đomc munh six mănv? Max zâyf pamf stoif bix zuc tayc yămz woa stâyz phangz blănc woax đomc munh mah?” ¹⁸ Tênb-Hungh zaux coong, “Nănh stiz stâyv quâyx max tuz nzac yaz nyunc phunz nănh stiz tuz sec hitb conv woax nomz tync six coong ănz mănv? Six aox max mungv Nănh woax đomc munh. ¹⁹ Pănh tuz phătc nănh stiz max tuz nzac Tênb-Hungh nyunc phunz nyăngz hitb conv tync, six wâyc nănh stiz max zeen.