1 ¹ Săngđ coonz Tênb-Hungh zâyx Gungh zâyx nib. ² Woax zanyf bamh canz songđ max zengx naih lungđ, nzămc mengh com nzuf, Zâu Tênb-Hungh nyăngz singx lingh yâuh woa womz mync quaix ninyh quaix lauf. ³ Tênb-Hungh coong, "Oix zuc naih gwăngz, songđ naih gwăngz seetb taih. ⁴ Tênb-Hungh mangc phătc gwăngz songđ gongx, Nănh songđ zoz nzămc cloon gwăngz phunz tinyh gâyh. ⁵ Gwăngz nănh hipđ ayx bah noib zax, nzămc nănh hipđ ayx bah nzămc, naih cayx nzămc yâuc naih bah đoomz tonx, nây six zeetx noib. ⁶ Tênb-Hungh năngx coong, "Năngx zuc naih ah hungđ nzez cah zâyc nyăngz womz cloon cah đi nyăngz womz phunz tinyh gâyh. ⁷ Tênb-Hungh songđ zâyx tuz seetb woax hungđ hayh nzez tuz womz yămz cah đi yâuc yămz đamx yâuh. Songđ naih nâyx đomc dlayc seetb taih. ⁸ Tênb-Hungh coong đamx yâuh six hipđ ayx gungh, naih bah nzămc, yâuc naih bah đoomz, nây six nyâyc noib. ⁹ Tênb-Hungh năngx coong, "Cah đi nyăngz womz six zuc căpx dlonf yămz ah nomz tync, phunz nib gaib loi seetb taih. Songđ naih dlayc seetb taih năngđ nâyx. ¹⁰ Tênb-Hungh hipđ nib gaib ayx nib, womz căpx dlonf yămz nyăngz tync hipđ ayx tongz yangh coiđ. Nănh phătc năngđ nâyx seenz gongx nzongf. ¹¹ Tênb-Hungh năngx coong, "Nib mync oix zuc naih mađ bêux seetb taih, njăngx cloon njayz ah hungđ cănh naih woax hungđ pyâu naih nhlimb âyz nănh nyăngz phăn, songđ naih dlayc seetb taih năngđ nănh coong nâyx. ¹² Nib mync naih njăngx naih mađ bêux seetb taih săngh pyâu naih nhlimb cănh âyz nănh nyăngz phăn, Tênb-Hungh phătc nâyx đomc dlayc seenz gongx nzongf. ¹³ Naih cayx nzămc yâuc naih bah đoomz, nây six tah stamz noib. ¹⁴ Tênb-Hungh coong, "Năngx zuc naih gwăngz yămz cah zâyc gungh, nongc ayx njih houđ, phunz tinyh gâyh noib cloon munf, nyăngv cloon zunb. ¹⁵ Nâyx đomc gwăngz six zuc yămz cah zâyc gungh syux nzac cah đi nib taih. songđ seenz naih nâyx đomc dlayc seetb taih năngđ nâyx. ¹⁶ Tênb-Hungh zâyx seetb iz nomz gwăngz taih, woax nomz năngx lub têx nongc syux bah noib zax, woax nomz năngx jeenz têx nongc syux bah nzămc, Nănh yâuc năngx zâyx cloon stingz tau seetb taih. ¹⁷ Tênb-Hungh phunz nâyx đomc gwăngz yămz cah zâyc gungh nongc syux nzac cah đi nib taih. ¹⁸ Phunz nâyx đomc cun yămz cah zâyc gungh, cun bah noib zax cloon bah nzămc. Tênb-Hungh phătc nâyx đomc dlayc seenz gongx nzongf. ¹⁹ Naih cayx nzămc, naih bah đoomz, nâyx six tah stâyx noib. ²⁰ Tênb-Hungh năngx coong, "Womz đi oix zuc naih zuy njênf naih mengc nyăngz muif hungđ byauf, yâuc zuc naih noc đayv yămz cah zâyc đamx gungh. ²¹ Tênb-Hungh songđ zâyx yămz coiđ lub nyăngz muif hungđ byauf, zunx âyz nănh stiz nyăngz phăn, yămz đamx yâuh nyăngz noc yâuc naih đatz hayh đayv âyz nănh nyăngz phăn. Tênb-Hungh phătc nâyx đomc dlayc seetb taih seenz gongx nzongf. ²² Tênb-Hungh năngx poou woac phunz nâyx đomc muif hungđ Nănh coong, "Byauf yâuc zuc zunx pong coiđ womz đi, noc yâuc zuc zunx pong nib mync. ²³ Naih gungh nzămc yâuc naih gungh gwăngz, nây six tah ngâuf noib. ²⁴ Tênb-Hungh năngx coong, nib mync oix zuc seetb muif hungđ naih mengc nyăngz zuy njênf stanyb hauđ, jămx staov cloon muif hungđ nyoongz nib nyănz zuy njênf ah hungđ cănh naih ah hungđ nyăngz phăn songđ seenz naih seetb taih. ²⁵ Tênb-Hungh zâyx seetb njămh nzongh cloon stanyb hauđ ah hungđ cănh naih ah hungđ nyăngz phăn, cloon muif hungđ nyoongz nib mync nyăngz zuy njênf ah hungđ cănh âyz ah hungđ nyăngz phăn Tênb-Hungh phătc seenz gongx nzongf. ²⁶ Tênb-Hungh năngx coong, pănh oix zuc âyz pănh nyăngz hanyh jangx zâyx tauh bamh munh taih seenz năngđ pănh nâyx, phunz nănh stiz cun coiđ nyăngz byauf, yâuc cun cloon yămz đamx gungh nyăngz noc, muif hungđ stanyb hauđ, cun cloon muif hungđ nyoongz nib mync nyăngz zuy njênf. ²⁷ Tênb-Hungh songđ zâyx seetb tauh bamh munh taih six âyz Tênb-Hungh nyăngz hanyh jangx zâyx munh taih, nănh zâyx seetb săngh tauh munh toonz. munh sab taih. ²⁸ Tênb-Hungh poou woac phunz nănh stiz, nănh coong, "Nyâuh năngx zuc naih sây stunz zunx pong gungh đi, yâuc cun nzuf gungh đi nyăngz zuy njênf yâuc cun yămz coiđ nyăngz byauf cloon yămz đamx gungh nyăngz noc, cloon muif hungđ nyoongz nib mync nyăngz zuy njênf. ²⁹ Tênb-Hungh năngx coong, "Mangc jađ yaz zoz yămz pong nib mync hayh seetb nhlimb nyăngz muif hungđ njayz mađ cloon muif hungđ njăngx naih nhlimb nyăngz pyâu jaoz phunz nyâuh nhlync. ³⁰ Yămz nib mync nyăngz stanyb hauđ, jămx staov cloon njămh nzongh yămz đamx gungh nyăngz yeetx stong noc, cloon hayh nyoongz nib mync naih mengc nyăngz zuy njênf, yaz zoz muif hungđ mađ mengz phunz nănh stiz nongc ayx nhlync hopb songđ seenz naih năngđ nâyx. ³¹ Tênb-Hungh phătc nănh zâyx taih nyăngz zuy njênf songđ seenz gongx nzongf, naih gungh nzămc yâuc naih gungh gwăngz nây six tah guc noib.