1 ¹ Yaz Phao-lô âyz Tênb-Hungh nyăngz âyx ayx Njâuv Zâu Yê-su nyăngz pâuz, ja jeenx zuyz phunz yămz Ê-phê-sô stengv naih stymz zeen Njâuv Zâu Yê-su nyăngz munh. ² Jođ pănh nyăngz Nzangc Pha Zâu Tênb-Hungh. Cloon Njâuv Zâu Yê-su sađ pôz sađ pengh oonz phunz nyâuh yâuf pez ô stayx. Singx lingh sađ phunz nyăngz pôz ³ Tanv pănh nyăngz Nzangc Pha Zâu Tênb-Hungh. Wâyc zuc pănh cloon Njâuv Zâu Yê-su songc mengc săngh Tênb-Hungh songđ sađ yămz Tênb-Côkz nyăngz singx-lingh muif hungđ Pôz gongx phunz pănh. ⁴ Tăng max zengx zâyx Gungh nib woax zanyf, Zâu songđ sên pănh taih phunz pănh pênx Njâuv Zâu nyăngz munh gongx munh đăngb zengh yămz nănh nyăngz cah đangc. Clakx-clunh max naih tync nzêmh. ⁵ Tênb-Hungh stăngz pănh, Nănh songđ nongc Njâuv Zâu Yê-su phunz pănh pênx nănh nyăngz namh-nyâuf, nây six âyz nănh nyăngz zux ix ayx hođ nănh nyăngz nyâuđ. ⁶ Pănh six zuc tanv Zâu Tênb-Hungh, wâyc zuc nănh Sađ lub nzongf nyăngz pôz phunz stăngz nyăngz toonz woax đomc pec stingx. ⁷ Pănh coouv Njâuv Zâu zuc tayc nyăngz samđ suc pănh phunb đangz lauf, phunz pănh tuz quanyf stoif. Nây six Tênb-Hungh puv quâyx nzongf nyăngz pôz. ⁸ Tênb-Hungh Sađ nănh nyăngz Tongb-manyh cloon nănh pâyz tuz muif hungđ dlayc nyăngz Pôz sađ phunz pănh đungx nzongf. ⁹ Nănh hynđ phunz pănh pâyz tuz nănh max zengx plongx yangh nyăngz dlayc pinyx yămz Njâuv Zâu. âyz nănh nyăngz zux ix bênc săngh phunz pănh pâyz. ¹⁰ Nănh nyăngz zux ix six ayx săngh nzuf nănh bênc taih nyăngz cumh pâuz pong stâuv, nănh zoz yămz Gungh yămz bamh canz nyăngz muif hungđ jaoz phunz Njâuv Zâu ayx pyây cun nzuf. ¹¹ Yeetx stong dlayc seetb taih âyz Tênb-Hungh nănh bênc săngh nyăngz zux ix sên pănh taih, phunz pănh cloon Njâuv Zâu songc mengc săngh, pênx nănh nyăngz namh-nyâuf. Nây six âyz nănh bênc taih nyăngz zux ix ayx. ¹² Pănh six ayx coonz coouv Njâuv Zâu nyăngz pec stingx tuz sên naih tync mungc nyăngz munh. six zuc tanv Zâu Tênb-Hungh nyăngz gwăngz-eng. ¹³ Nyâuh numđ seenz gâyf woax zanyf, six phunz nyâuh yâuf pez tuz Njâuv nyăngz cuđ jeenx, nyâuh yâuf pez yâuc tuz Njâuv Zâu Tênb-Hungh âyz nănh nyunc nyăngz woac sađ Singx-lingh phunz nyâuh yâuf pez năngđ tăpb yeenx nâyx, phunz nyâuh pênx nănh nyăngz munh. ¹⁴ Singx-lingh six năngđ nyanh tingc, zu nănh suc nănh nyăngz munh phunb đangz lauf, songđ tuz Tênb-Hungh nyunc woac phunz nyăngz munh sâub pănh pênx nănh nyăngz jax toongx. Pănh six zuc tanv nănh nyăngz gwăngz-eng. Phao-lô coouv Zâu wâyc huyđ đăngb ¹⁵ Tăng yaz numđ lănv coong nyâuh yâuf pez zeen Njâuv Zâu Yê-su nyăngz seenz stymz, nyâuh yâuc stăngz Tênb-Hungh nyăngz songx munh. ¹⁶ Yaz njynh leox hâuđ Tênb-Hungh, wâyc Săngx tauv nyâuh yâuf pez, laiv zanyf Coouv Zâu yâuc đamv tauv nyâuh tinyh đoih. ¹⁷ Yaz jođ pănh nyăngz Njâuv Zâu Yê-su nzangc Pha Zâu Tênb-Hungh. gwăngz-eng nyăngz Pha Sađ Singx-lingh phunz nyâuh yâuf pez naih tongb-manyh pâyz tuz nănh hynđ yangh nyăngz jau pâu đungx staox. ¹⁸ Yaz coouv Zâu jođ Nzangc Pha Zâu Tênb-Hungh coib goib phunz nyâuh yâuf pez nyăngz nyâuđ hayh pâyz nănh nyăngz gwăngz-eng. Songđ pâyz nănh êu pănh taih phunz nyâuh yâuf pez naih tync mungc oix tuz nyăngz laiv hungđ nănh nyunc phunz puv quâyx nyăngz pôz gongx, yâuc coouv Zâu phunz nyâuh yâuf pez pâyz Tênb-Hungh nyunc njâuh phunz nănh nyăngz munh woax đomc Pôz tăng laiv lub yâuc gwăngz-eng. ¹⁹ Yâuc phunz nyâuh yâuf pez pâyz tuz nănh nyăngz quênh tăng laiv lub. Tênb-Hungh njengx phunz pănh zeen nănh nyăngz munh, nây six nănh nyăngz lanyf. ²⁰ Njâuv Zâu tayc ninyh six Tênb-Hungh nyăngz quênh ayx phunz nănh săngh phunb stengb taih. Yâuc phunz nănh naih quênh stâyv Tênb-Hungh nyăngz byaoh phanx. ²¹ Tênb-Hungh jaoz muif hungđ phunz Njâuv Zâu ayx năngx lub quaix yeetx stong cun đamx gungh, naih quênh naih lanyf ayx Hungh cun dlayc woax đomc, yâuc phunz nănh naih manyh yangh ayx lub, max zâyf cungb cun nâyx nzêuh Gungh đi, năngx cloon đangz nzêuh gungh đi. ²² Tênb-Hungh tăpx muif hungđ ănz njâuv Zâu nyăngz staux đi, êu nănh ayx pyây cun Huyđ-đăngb. ²³ Huyđ-đăngb six Njâuv Zâu nyăngz stynb, Njâuv Zâu six ayx phunz muif hungđ Clakx-clunh woax tauh. Pănh tuz stipx săngb mengc