¹ A-bô-lô năngx yămz Cô-lin-tô woax zanyf, Phao-lô clăngv jau quaix tauv Ê-phê-sô Stengv, Yămz woa nănh pongh ah đomc zeen Zâu nyăngz Munh.” ² Nănh naic, “nyâuh Yâuf-pez tăng nyâuh lêpc Zâu tuz Stipx Singx-lingh max zengx? “Nănh stiz tauz, “Buz max zengx tuz numđ lănv tauv Singx-lingh đêh.” ³ Phao-lô naic, “Ha nyâuh Yâuf pez ayx quaix womz nyăngz Gâyf toix laiv tauh? nănh stiz tauz, “Buz quaix Giăng.” ⁴ Phao-lô bux, “Giăng ayx quaix womz nyăngz gâyf, Six cungb phunz Munh coi nyâuđ quanyf Stoif, “Six nănh lănv bux songx Munh coong, “Năngx naih ah tauh taih đangz Yaz, “woax tauh six Zâu Yê-su.” ⁵ Numđ Phao-lô coong nzuf, “Nănh stiz songđ tingz Zâu Yê-su nyăngz bux ayx quaix womz nyăngz Gâyf.” ⁶ Phao-lô, Songđ tăpx puf ănz nănh stiz, “Singx-lingh songđ nzac taih Tauv nănh Stiz, “Nănh stiz songđ coong seetb pitc hungđ woac. Songđ quef coonz coong Stênx-stengb nyăngz woac.” ⁷ Woax đomc Munh naih cox săpc nyâyc lanh Munh.” ⁸ Phao-lô Ninyh woa Huyđ-toongh pôz lav, Pungx stymz lănv gâyf quynb Yiu-thai Munh six zuc stipx Tênb-Hungh ayx Zâu cun Munh nyăngz gâyf.” ⁹ Six yămz woa Naih ah đomc Yiu-thai Munh hănđ Zâu Yê-su max canx Zeen, Yâuc năngx coong đomc plix-plaiz woac ănz.” Phao-lô songđ max yămz woa năngx ênz đomc Yâuf pez lêpc nănh ninyh tauv Ti-sa-nu, nyăngz Hakc-toongh, Yămz woa muif noiđ nzaox songx munh.” ¹⁰ Nănh năngđ nâyx ayx tuz iz nyăngv, Mungc Phao-lô ayx nyăngz cumh pâuz, Yiu-thai Munh cloon max Zâyf Yiu-thai Munh, Yămz thêuz-av, Songđ Numđ Zâu nyăngz woac nzuf.” ¹¹ Tênb-Hungh nongc Phao-lô ayx seetb đungx hungđ jix-caox njingc nyăngz dlayc lub nzongf, ¹² “Phao-lô nongc nănh stayb Gwuyz quav woax lepz stab mynb buyx, Nzâyz ninyh plongz ănz toix tauh gumf Munh, Yâuc tuz gumc gongx nzuf, njinh manđ yâuc zuc luiđ seetb ninyh nzuf.” ¹³ Six naih batz lanh Yiu-thai Munh yâuh ninyh đungx đoif luiđ Manđ, “Nănh stiz Stâyv mangc jađ nănh stiz nongc Zâu Yê-su nyăngz bux luiđ manđ, Six tuz seetb tuz mah six max tuz? Nănh stiz jaf ayx tingz Zâu Yê-su nyăngz bux, six Phao-lô lănv woax tauh Zâu Yê-su seetb lanyf luiđ manđ mâyh six zuc seetb ninyh.” ¹⁴ Naih ah tauh stayb munh pyây, Bux hipđ ayx Sê-va, Nănh nyăngz nhlic lanh toonz năngđ nâyx ayx.” ¹⁵ Naih ah hâyđ manđ tauz nănh Stiz, “Buz pâyz Zâu Yê-su, Yâuc pâyz Phao-lô, ha mâyh six toix laiv tauh?” ¹⁶ Woax tauh blaz manđ nyăngz Munh, đanyz nzac nănh stiz nyăngz Mungh tongx congv ninyh lou woax đomc Munh Gunx tinyh đoih zuc munz nzuf, blănf stynb tyuv pletx seetb ninyh nzuf.” Wâyc zuc nănh yongb nzongf.” ¹⁷ Yămz Ê-phê-sô Stengv nyăngz Munh, Max cun Yiu-thai Munh cloon max Zâyf Yiu-thai numđ lănv nâyx đomc dlayc nănh stiz seenz cumh nzav nzongf, songđ pâuh Zâu Yê-su nyăngz manyh yangh.” ¹⁸ Naih đungx lanh zeen Zâu nyăngz Munh Nhlimc lănv nănh stiz ayx huđ nyăngz Stoif." ¹⁹ Naih đungx lanh lôx noib ayx papz nyăngz Munh, Nzâyz nănh stiz woax đomc ayx papz nyăngz Stâub stekb taih dlonf đuiz ănz woa, Toongx songx Munh cah đangc pu nzuf, Nâyx đomc Stâub stunx zax Taih, Naih bengc ngâuf săpc lepz nyanh pec.” ²⁰ Nâyx đomc dlayc quaix nzuf, Zâu nyăngz woac, Sâuđ noib lunc đanv cun ayx quăng ninyh.” ²¹ Quaix đangz, Phao-lô tingc nyâuđ oix ninyh Yê-lu-sa-lem Stengv, Nzăngđ zav quaix tauv Ma-si-đoan Stâyz-Phangz. Nzăngđ ninyh tauv Miênh-Nam Hi-lapc, Nănh bux coong, “Yaz zav ninyh tayđ Yê-lu sa-lem Stengv songf nzof, Yaz zâyf năngx ninyh Lô-ma Stengv.” ²² Phao-lô paiđ nănh stiz iz lanh zayb ninyh đangc, “Ti-mô-thê, Cloon Ê-phatv-tu, Ninyh tauv Ma-si-đoan đangc, “Six nănh năngx yămz vungh Thiêuz-av ah dlapc.” ²³ Woax zanyf, wâyc Zâu nyăngz gâyf, Yămz Ê-phê-Sô Stengv, Naih dlayc lunc seetb Taih.” ²⁴ Naih ah tauh ayx nyanh stangc nyăngz Munh, Bux hipđ ayx Đê-mê-ziu, Nănh nongc nyanh ta Săngh Miuc-hanyh-jangx, Atc-ti-mitv, Nuyf dlănh, Nănh ayx nâyx đomc cumh pâuz lov tuz nyanh đungx nzongf.” ²⁵ Đê-mê-ziu, êu nănh woax đomc ayx nyanh stangc nyăngz Munh taih Nzomf woa Sangv ngwoangh coong, “nyâuh pâyz pănh tinyh songc ayx nâyx hungđ congz ayx stanyb âyx lov tuz nyanh đungx.” ²⁶ Nyâuh tuz numđ, Yâuc tuz phătc, Phao-lô, hoiđ pănh tăng laiv đungx, Nănh quynb đungx lanh Munh yămz Ê-phê-sô Stengv, Njynh cloon songx munh yămz vungh thiêuz-av! Nănh coong, “Nongc bamh munh nyăngz puf ayx taih nyăngz dlănh, Six max Zâyf dlănh zuy đêh.” ²⁷ Năngđ naz max zâyf cungb ayx pănh nyăngz stanyb âyx jau tuih nzuf, Cumh nzav Munh hayh mangc stam cloon pănh nyăngz nuyf-dlănh Atc-ti-mitv, nyăngz Miuc pyau, zuc miêtc nzuf, Yămz vungh thiêuz av nuyf dlănh Atc-ti-mitv, Lomc nây Gungh đi muif tauh Munh congx dlănh nyâyf Atc-ti-mitv nyăngz manyh tauh platb nzuf.” ²⁸ Woax đomc munh numđ nzuf nâyx đomc woac, Nănh stiz seenz numđ Nhleenx nzongf, Songđ hamv coong, “Atc-ti-mitv, Six yămz Ê-phê-sô nyăngz nuyf-dlănh!.” ²⁹ Njynh săngh nomz Stengv nyăngz Munh lunc nzuf, “Songx Munh ênz cloon lêpc Phao-lô nyăngz toic, Tăng Ma-si-đoan taih tauv woax đomc Gai-utv, Cloon A-ri-takc, Tyuv nzac Ninyh tac Songx Munh ninyh Glungf-glungf têx, ayx đaoc, ayx nzungz.” ³⁰ Phao-lô lauf cayx ninyh cloon Songx Munh lănv woac, Six zeen Zâu nyăngz Munh max phunz nănh Ninyh.” ³¹ Naih đomc nzauf quyênh nyăngz Munh, Yămz vungh thiêuz-av, Pungx woac ninyh bux max phunz Phao-lô, Ninyh tac nănh stiz ayx đaoc ayx nzungz.” ³² Căpx dlonf nyăngz Munh hamv nhlingz-nhlingz têx, ah po hamv Nây, ah po hamv woa, Munh hongđ nzongf, Nănh stiz lenf lôx, Max pâyz tuz nănh stiz wâyc săngh laix bix ninyh dlonf woa ayx lungđ.” ³³ Yiu-thai Munh Songđ nzopz zoz ah tauh Munh, Bux hipđ ayx A-likc-sơn, nzâyz taih Stâuđ songx Munh nyăngz cah đangc, hangc puf oix cayx ta lănv bux songx Munh. ³⁴ Songx Munh saz tuz Nănh six Yiu-thai Munh, Songx munh tinyh đoih songc stingb hamv cox naih iz săngx huđ cah njaf coong, “Yămz Ê-phê-sô nyăngz nuyf dlănh Atc-ti-mitv, Đi-any, ayx năngx lub têx!” ³⁵ Woax zanyf, Yămz woa Stengv naih ah tauh quanz tôngz-thư jiv, Seetb taih êu Nănh stiz quengx woac, Nănh songđ bux coong, “Ê-phê-sô nyăngz Munh lex! Toix laiv tauh lauf pâyz tuz Ê-phê-sô, Six stengv baoz tuônh, nuyf-dlănh Atc-ti-mitv. dlănh đăngb tăng Gungh nzac taih.” ³⁶ Max naih toix laiv tauh hayh aox tuz hingh coong max zâyf đêh, nyâuh six zuc binyh tinyx nyâyh nyâuh ayx nyăngz dlayc.” ³⁷ Nyâuh nzâyz nâyx đomc munh taih nây, Nănh stiz max Nymc toix lungđ, mah six coong peo pănh nyăngz nuyf dlănh toix laiv lungđ nef.” ³⁸ Six coong, “Đê-mi-ziu, Cloon nănh nyăngz toic naih toix laiv hungđ oix cooux têx, Six cănh naih bênc dlayc noib lec. Nănh stiz năngđ naih toix laiv hungđ dlayc oix ocoux bix mănc ninyh woa toah anx cooux geh.” ³⁹ Six coong nyâuh Năngđ naih toix lungđ dlayc oix lănv, Bix zu tauv Huyđ toongh coib Songx bênc dlayc, nzof mănc ninyh woa coong geh, ⁴⁰ “Cumh nzav nâyx noib seetb taih nyăngz dlayc, Hungh pâu pâyz songđ oix cooux, wâyc zuc pănh hayh max naih tync zay Stynb nâyx noib seetb taih nyăngz dlayc max naih lungđ nongc seen buc laiv.” ⁴¹ Nâyx tauh tôngz thư jiv coong songf songđ phunz nănh stiz Muf.”