¹ Phao-lô buz ninyh tauv Đetc-bơ, Cloon Liv-zah, Yămz woa, “Naih ah lanh zeen Zâu munh, Bux hipđ ayx Ti-mô-thê, Nănh nyăngz nzif six Yiu-thai Munh, Nzăngđ lêpc Zâu, Nănh nyăngz Pha Six Hi-lapc Munh.” ² Zeen Zâu nyăngz Yâuf-pez, Yămz Liv-zah, Cloon I-cô-ni, bongc Ti-mô-thê, ayx zanyx manyf gongx phunz Nănh.” ³ Phao-lô oix ênz Ti-mô-thê, Lêpc nănh, Six muif tauh Yiu-thai Munh yămz woax nomz Stâyz-phangz, Yâuc pâyz tuz Ti-mô-thê nyăngz Pha Six Hi-lapc Munh, Nănh songđ ayx quaix catz nyăngz gâyf phunz Ti-mô-thê, wâyc oix ayx tuz hopđ Yiu-thai Munh nyăngz nyâuđ.” ⁴ Phao-lô, cloon Nănh nyăngz toic, Ninyh tăng nâyx nomz Stengv, Năngx yâuh tauv pitc nomz Stengv, Cumh pâuz munh cloon munh côx, Yămz Yê-lu-sa-lem Stengv, Zoz tingc taih nyăngz gâyf jaoz phunz songx munh ayx âyz.” ⁵ Huyđ-toongh munh songđ muif noib nzac pâu, Cun ayx cun đungx staox, Yâuc naih seenz stymz yongb.” ⁶ Singx-lingh max phunz Phao-lô buz Nzônh cuđ-jeenx, Yămz Zâu av stâyz phangz, Phi-ri-gi, Cloon Ga-la-ti.” ⁷ Six nănh stiz ninyh tauv Mi-si-a, nyăngz Stâyz-phangz căpx caix, Nănh stiz hangc nzac Bi-thi-ni, Ninyh, “Six Zâu nyăngz singx-lingh max phunz nzac.” ⁸ Wâyc năngđ nâyx, Nănh stiz songđ zav quaix Mi-si, nyăngz Stâyz-phangz, ninyh tauv Zô-êkv.” ⁹ Ninyh tauv woax munf Phao-lô Phătc hynđ yangh nyăngz dlayc, Nănh phătc ah tauh munh tăng Ma-si-đoan taih jođ nănh Coong, “Jođ claof quaix Ma-si-đoan ninyh stăngc Buz.” ¹⁰ Phao-lô, Phătc hynđ yangh nyăngz dlayc, Buz songđ bênc ninyh Ma-si-đoan, wâyc zuc buz songđ pâyz tuz Tênb-Hungh êu buz ninyh lănv Cuđ-jeenx phunz woax nomz Stâyz-Phangz munh Mungv.” ¹¹ Buz songđ tăng Zô-êkv, nzac Đangđ ninyh zac tauv Sa-mô-zakv coiđ Synh. Cah đangz noib buz songđ clăngv quaix Nê-A-bu-ni Muôngf” ¹² Buz songđ tăng woa yăngh staux ninyh tauv Phi-lipv Stengv, Thôkc Lô-ma Côkz, Ma-si-đoan nyăngz Stengv Lub, Buz songđ yămz woa ah dlapc batz lauh. ¹³ Tauv tingc congz noib, “Buz seetb woa stengv cungh ngwoaic ninyh tauv woa coiđ synh, nyâyh coong hayh lov tuz ah nomz tync nongc nzomf clo-Zâu, Six buz phătc naih batz lanh munh nzif nzomf woa, Buz songđ stâyv nzac ninyh cloon nănh stiz lănv woac.” ¹⁴ Mungv woax đomc munh nzif, taih ah tauh bux hipđ ayx Li-đi, Quê yămz Ti-A-ti-la, Nâyx tauh munh nzif ayx nyăngz cumh pâuz six maic buyx Stib côx, Nănh six Canyx-bongc Tênb-Hungh nyăngz Munh, Zâu songđ coib nâyx tauh munh nzif nyăngz nyâuđ phunz Nănh Mungv Phao-lô lănv woac.” ¹⁵ Tah bôf cloon nănh nyăngz pyau njaf Munh nyunc ayx quaix womz nyăngz Gâyf nzuf, quaix đangz nănh êu buz ninyh sec nănh nyăngz pyau. Nănh bux coong, “nyâuh Yâuf pez năngđ phătc Yaz seenz zâyf zeen Zâu munh Têx, Jođ nyâuh taih sec yaz nyăngz zeb pyau geh! Nănh seetb jab hađ buz, Buz nyâyh ayx laix max Săngh, Songđ zuc ninyh sec nănh nyăngz pyau.” ¹⁶ Naih ah hâyđ, “Buz ninyh tauv munh căpx dlonf clo-Zâu nyăngz tync, Yâuc pongh ah tauh munh Sab pâuz, Blaz Manđ đătc biêtc, Hayh ayx quax yâuc hayh tex Munh nyăngz Mengc, Hayh lov tuz nyanh đungx nzongf, Phunz nănh nyăngz Zâu.” ¹⁷ Nâyx tauh munh sab pâuz lêpc Phao-lô cloon buz cah đangz ninyh, Yâuc hamv coong, “Lâyc đomc ya Munh six yămz njăngb quaix woax tauh Tênb-Hungh nyăngz pâuz, Nănh stiz taih lănv tuz Njâuv nyăngz jau phunz Munh mungv.” ¹⁸ Nâyx tauh munh sab ayx năngđ nâyx đungx noib, “Phao-lô buz numđ nhleenx songđ wynb đangz lauf mađ stanyv manđ coong, “Yaz tingz Njâuv Zâu Yê-su nyăngz Bux seetb Lanyf luiđ mâyh seetb lâyc tauh munh sab nyăngz stynb zec căn têx, Stânyv manđ songđ lênh dlih pleetx seetb ninyh gâyh nâyx tauh munh Sab.” ¹⁹ Nâyx tauh munh sab pâuz nyăngz Zâu, Mangc phătc max hayh nongc nâyx đomc jau, Nongc lov nyanh nzof, “Nănh stiz songđ nyopz zoz Phao-lô cloon Si-la, Nzâyz ninyh woa caiz Sangc pongh ayx lub nyăngz Munh.” ²⁰ Nănh stiz đănx Phao-lô, Cloon Si-la, Ninyh tauv Lô-ma Quanz cah đangc, cooux nănh stiz coong, “Nâyx đomc six Yiu-thai Munh, nâyx đomc munh lou phunz pănh nyăngz stengv âyx jau lunc nzuf nzof gôh.” ²¹ Nănh stiz nzaox êu pănh Lô-ma nzêuh Munh max hopđ ayx nâyx đomc gâyf.” ²² Songx munh yâuc lêpc đangz taih cooux nănh stiz, “Quanz songđ phunz pengz njic Phao-lô, Cloon Si-la, nyăngz Gwuyz bix bopc đonf.” ²³ Nănh stiz bopc tuz sangb nzongf, Songđ sukc ănz nzac nzauh ninyh, “Bux cun nzauh quanz cun nzauh năngx gongx.” ²⁴ Nyunc tuz nâyx đomc lanyf, Cun nzauh Quanz songđ clangđ nănh stiz ănz woa phongh cah njaf, Yâuc năngx nongc njăngx Gumf ja nănh stiz iz lanh nyăngz staux.” ²⁵ Tauv đămx munf, Phao-lô cloon Si-la, clo-Zâu, Yâuc ayx nzungz tanv Tênb-Hungh, Njynh woax đomc Stoif-munh yâuc tinyh đoih numđ nzuf.” ²⁶ Lênh dlih naih ah đitb nib tongf tuz đănz nzongf, Njynh nzauh jengh goib nzuf, Stoif-munh nyăngz njab langb yâuc đutb nzuf.” ²⁷ Cun nzauh quanz nyoongz quef taih tex Mangc nzauh jengh goib nzuf, nănh laic Stăngz six Stoif-munh tyuv nzuf, Nănh songđ lutz nzuc đao taih cayx ta cănh tayx Nănh.” ²⁸ Six Phao-lô, hamv coong, “Max nongc cănh hoiđ Mâyh, “Buz tinyh đoih yămz nây dloih lêđ đêh! ²⁹ Cun nzauh quanz songđ êu munh pu toongz tyuv nzac Phao-lô, Cloon Si-la, buz woa Ninyh, “Quâyc nzac nănh stiz nyăngz staux synh ninyh stynb synx nzuf.” ³⁰ Nzof nănh ênz nâyx đomc iz lanh Munh seetb cungh ngwoaic taih naic coong, “Zâu lex! Yaz six zuc ayx laix nzăngđ tuz Njâuv?” ³¹ Nănh stiz tauz, “Mâyh six zuc zeen coouv Zâu Yê-su, Mâyh cloon mâyh nyăngz pyau Munh songđ tinyh đoih tuz Njâuv.” ³² Phao-lô songđ lănv Zâu nyăngz gâyf phunz woax tauh cun nzauh Quanz cloon Nănh nyăngz pyau munh Mungv.” ³³ Toongx woax munf, woax tauh cun nzauh Quanz, Songđ ên Phao-lô buz ninyh đaox nănh stiz zuc bopc sangb nyăngz tync songf nzuf, Cun nzauh Quanz njynh cloon Nănh nyăngz pyau munh nyunc ayx quaix womz nyăngz gâyf nzuf.” ³⁴ Quaix Gâyf nzuf, “cun nzauh Quanz ênz Phao-lô Cloon Si-la, Muf nănh nyăngz pyau bênc năngv banh nănh stiz nhlync năngv, Cun nzauh Quanz cloon nănh nyăngz pyau munh Seenz nzuf jab tinyh đoih numđ nyađ nzongf, wâyc zuc nănh tuz stipx Zâu.” ³⁵ Tah nyâyc noib gungh Gwăngz, Lô-ma quanz paiđ Canyz-satx ninyh bux cun nzauh quanz coong, “Pungx nâyx đomc iz lanh munh seetb nzauh ninyh gôh! ³⁶ Cun nzauh quanz bux Phao-lô coong, “Quanz seetb lanyf êu yaz pungx nyâuh iz lanh seetb nzauh ninyh nef, Nâyx zanyf, nyâuh iz lanh seetb jau ninyh pengh oonz gôh.” ³⁷ Six Phao-lô bux woax đomc Canyz-satx coong, “Buz six Lô-ma nzêuh nyăngz pec stingx, Nănh stiz zoz buz toongx songx bopc buz, Yâuc năngx zoz buz clăngđ ănz zauh, Six nâyx zanyf stingb njâuh pinyx pungx buz six max hođ gâyf, Quanz six zuc tongf stynb taih tauv nây pungx buz, Buz nzăngđ seetb ninyh.” ³⁸ Canyz-satx muf lănv bux Lô-ma Quanz, Quanz pâyz tuz Phao-lô cloon Si-la, Six Lô-ma Munh, Nănh stiz seenz cumh nzav Nzongf.” ³⁹ Wâyc năngđ nâyx, “Nănh stiz Songđ ninyh jođ Phao-lô, cloon Si-la, Pungx nănh stiz seetb nzauh ninyh, “Yâuc jođ nănh stiz seetb gâyh Stengv.” ⁴⁰ Nănh stiz iz lanh seetb nzauh taih, Songđ ninyh tauv Li-đi nyăngz pyau, Pongh đomc Yâuf pez toic, Lănv woac oonz yâuf pez nyăngz nyâuđ Songf, songđ seetb jau ninyh.”