1 ¹ Huyđ đăngb nyăngz munh côx, ja jeenx phunz yaz seenz numđ stăngz sây Gai-utv. Six yaz seenz stăngz nzongf nănh. ² Yaz stăngz nyăngz pyeoz toic lex, yaz đoouc coouv poou phunz mâyh ayx muif hungđ, mengc hoonh tuz yămz gongx, stynb a yâuc tuz yămz zoongx. ³ Yaz numđ nyađ, naih ah đomc yâuf pez taih ayx zanyx manyf lănv bux yaz, "mâyh laiv zanyf yâuc naih stymz lêpc seenz gâyf, ayx âyz seenz gâyf. ⁴ Max naih laiv hungđ hayh ayx phunz yaz năngx numđ nyađ têx nây gôh. yaz numđ munh lănv coong, "yaz nyăngz sây muif dlih zeen gongx seenz gâyf. Tanv Gai-utv stipx zeb gongx ⁵ Yaz stăngz nyăngz pyeoz toic lex, mâyh seenz stăngc tuz zeen nyăngz yâuf pez gongx nzongf, hănđ six max phătc quaix nyăngz munh, mâyh yâuc nongc nyâuđ stăngc nănh stiz. ⁶ Nănh stiz yămz nâyx nomz huyđ đăngb ayx zanyx manyf lănv coong, "mâyh seenz naih stymz stăngc nănh stiz seetb jau âyz Tênb-Hungh êu ninyh nyăngz munh. ⁷ Stiz seetb ninyh wâyc Njâuv Zâu nyăngz manyh yangh, yâuc max zâuđ nongc max zeen nyăngz munh stăngc nănh stiz toix laiv hungđ. ⁸ Wâyc năngđ nâyx, pănh songđ zuc stăngc woax hungđ munh, pănh songđ tuz cloon nănh stiz tinyh songc ayx seenz gâyf nyăngz cumh pâuz. Đê-ô-zê-phê ayx max săngh nyăngz dlayc ⁹ Yaz tuz ja jeenx bux quaix huyđ đăngb, six Đi-ô-zê-phê, nzengz ayx lub max oix mungv yaz bux nyăngz woac. ¹⁰ Six coong yaz năngđ ninyh tauv nyâuh woa, yaz six ngwâyz lănv năngx nzuf nănh nyăngz coonz tay. nănh cungb coong woac zokb, coong woac huđ, yâuc taux cah đangz lănv pib yaz nyăngz manyh yangh. buc nâyf lauf max zengx quaix nănh nyăngz stymz, nănh yâuc max oix stipx quaix jau nyăngz yâuf pez. Yâuc năngx cangđ max phunz munh stipx, nănh yâuc năngx luiđ munh seetb nănh woa huyđ đăngb. Đê-mê-jêu ayx gongx ¹¹ Stăngz nyăngz pyeoz toic lex, năngx gâyf ayx huđ, six zuc ayx gongx. ayx gongx woax lanh six pênx Tênb-Hungh nyăngz munh, laiv lanh ayx huđ dlayc, woax lanh songđ max tuz phătc Tênb-Hungh. ¹² Songx munh tanv Đê-mê-jiu ayx tuz gongx. mâyh songđ pâyz tuz buz coong nyăngz zanyx manyf woac six seenz nyăngz. Stêtb mâyv woac ¹³ Yaz năngx naih đungx hungđ oix ja bux nyâuh yâuf pez, six yaz max oix nongc pătx ja. ¹⁴ Yaz nyâyh taih max naih lauh, yaz mungc ănz tuz pongh cloon nyâuh toix mynb coong woac. ¹⁵ Jođ Zâu phunz mâyh naih pengh oonz. yămz nây songx yâuf pez yâuc đamv tauv mâyh, yaz songđ lauf zuyz woac tayđ tauv nănh stiz tinyh đoih.