1 ¹ Yaz Pha-lô, ayx âyz Njâuv Zâu Yê-su nyăngz cumh pâuz munh, wâyc lănv Tênb-Hungh nyunc phunz nyăngz woac, phunz munh coouv Njâuv Zâu Yê-su tuz mengc săngh.” ² Yaz ja jeenx phunz yaz stăngz nyăngz toonz Ti-mô-thê, Jođ nzangc pha Zâu Tênb-Hungh cloon Njâuv Zâu Yê-su hâuđ lênh, yâuc sađ pengh oonz phunz mâyh.” Phao-lô oonz Ti-mô-thê nyăngz nyâuđ ³ Yaz muif noib muif munf nzangh dlih đoouc coouv hâuđ Tênb-Hungh yâuc săngx đamv tauv mâyh, năngđ pănh nyăngz stungz zez tâuh nongc đăngb zengh nyăngz nyâuđ Canyx bongc woax tauh. ⁴ Yaz laiv zanyf săngx tauv mâyh yâuc haoh mâyc womz njâuc seetb taih, yaz mungc tuz ninyh tayđ phătc mâyh năngx njâu, phunz yaz numđ nyađ. ⁵ Yaz săngx tauv mâyh zeen tingc, năngđ lôx noib mâyh nyăngz côx ti Lô-itc, cloon mâyh nyăngz nzif Yu-nitv, seenz zeen woa nâyx. yaz nâyx zanyf lauf zeen tingc mâyh lauf năngx zeen năngđ woa nâyx. ⁶ Wâyc zuc yaz săngx tauv, yaz tăpx puf ănz mâyh woax zanyf, Tênb-Hungh sađ phunz mâyh nyăngz phănc, mâyh six zuc phunz năngđ tâuf sac hongđ nâyx. ⁷ Tênb-Hungh max zâyf sađ lanz nyăngz stymz nyâuđ phunz pănh numđ cumh nzav, nănh phunz mâyh nyăngz stymz nyâuđ naih jab stăngz munh yâuc hayh leđ tuz stynb. Năngx gâyf numđ nyayz ⁸ Stăngc Yê-su ayx zanyx manyf, năngx gâyf numđ nyayz, yaz wâyc Zâu Yê-su bix zuc yămz nzauh, mâyh năngx gâyf numđ nyayz, mâyh six zuc coouv Tênb-Hungh nyăngz jab, wâyc nây cuđ jeenx zuc tanyđ zâuđ nanc. ⁹ Tênb-Hungh Njâuv pănh, yâuc êu pănh taih ayx đăngb zengh nyăngz munh, max zâyf wâyc pănh ayx laiv hungđ gongx nyăngz dlayc, six wâyc nănh nyăngz zux ix, cloon nănh nyăngz pôz, nâyx hungđ pôz six tăng cah lof, banc stâyv banc đaic, Tênb-hungh nongc Njâuv Zâu Yê-su sađ phunz pănh. ¹⁰ Six nâyx zanyf, pănh nyăngz Njâuv Zâu Yê-su nzac bamh canz taih, goib yangh nâyx hungđ pôz, wâyc zuc Njâuv Zâu mêtc nzuf tayc nyăngz jab, yâuc nongc cuđ jeenx phunz munh pâyz tuz stâyv quâyx max hayh tayc nyăngz săngb mengc. ¹¹ Tênb-Hungh paiđ yaz ayx lănv gâyf nyăngz munh, ayx cumh pâuz munh, yâuf ayx stênx stengb lănv nây cuđ jeenx. ¹² Yaz nâyx zanyf wâyc nây cuđ jeenx zuc tanyđ zâuđ nanc, yaz yâuc max numđ nyayz, wâyc zuc yaz pâyz tuz yaz zeen six toix laiv tauh, yaz yâuc pâyz tuz yaz jaoz phunz nănh woax đomc muif hungđ, nănh songđ hayh lif tuz gongx tauv stămđ stoif woax noib. ¹³ Six zuc nongc yaz nzaox mâyh quaix woax đomc woac ayx jix caox, yâuc coouv Njâuv Zâu Yê-su phunz taih nyăngz seenz stymz stăngz munh. ¹⁴ Six zuc lif năngx gongx Tênb-Hungh phunz Singx lingh yămz pănh cah njaf jaoz phunz pănh nyăngz seenz gâyf. ¹⁵ Mâyh pâyz tuz A-si stengv nyăngz munh tinyh đoih quanyf yaz nzuf, njynh Phi-gen, cloon Hetc-mô-gen, lauf quanyf yaz. ¹⁶ Yaz jođ Zâu hâuđ lênh Ô-nê-si-phô-rơ, woax siênz pyau munh, nănh stăngc yaz đungx hâyđ, yaz zuc njab langb stayb, nănh yâuc max numđ nyayz. ¹⁷ Yaz ninyh tauv Lô-ma nzêuh woax zanyf, nănh yâuc seetb ninyh stunb lov tuz pongh yaz. ¹⁸ Mâyh yâuc pâyz tuz yaz yămz Ê-phê-sô stengv woax zanyf, nănh seenz stăngc yaz đungx hâyđ, yaz yâuc jođ Zâu phunz nănh, tauv stămđ stoif woax noib, nănh yâuc tuz Zâu hâuđ lênh. Ayx Njâuv Zâu nyăngz panyz maf gongx